Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳柏壽
阮阿姊是「虎尾」女中畢業，但是阮雲林，我一直揣無「虎頭」ê所在。阮阿公ê園仔有一款虎頭蜂，會jiok人，真毒，人若是去hō͘ jiok–tio̍h，聽講無死嘛半條命。虎頭蜂無真大隻，伊會jiok佇人後壁，jiok–tio̍h了後，袂放你soa̍h。
阿公ê園仔有時會有虎頭蜂chông出來，閃tō閃袂離，差一屑仔頭殼tō hō͘釘kah tōa-phok sè-phok。阿公m̄知in孫仔去hō͘虎頭蜂tak kah走無路ê代誌，顛倒想講伊有一群護衛軍咧顧伊ê園仔。照阿公ê觀點，虎頭蜂是咧照顧伊園仔ê天使，伊會除去不止濟ê thâng-thōa，所以阿公容允伊ê存在。想來想去，咱應該瞭解阿公ê苦心，雖然對我來講無真公平，但是世間代éng-éng是按呢，有一好無二好。
虎頭蜂厲害ê所在，在佇伊有毒刺，因為按呢，真濟歹蟲擋伊袂條。世間若是無毒，tō無法度對付毒，叫做以毒攻毒。世間ê惡毒真厲害，閣有千萬款，若毋是用毒去攻毒， 絕對無法度對付對方ê毒勢。
上帝hō͘咱ê園內有虎頭蜂，來佇園內替咱來攻毒，為咱行頭陣，這是上帝代先為咱準備好勢。咱著利用虎頭蜂為咱來做工，為咱來出力。咱真濟做袂到ê所在，上帝代先為咱備辦好勢。這叫做上帝奇妙ê作為，上帝佇園仔內備辦，避免代誌發生，代誌發生ê時，已經有先頭部隊佇頭前為咱奮戰。
咱四圍ê虎頭蜂，看起來真兇惡，其實是徛佇咱身邊咧保護咱。真濟代誌看起來真兇惡，若準對咱是䆀–ê，但是上帝自然有伊ê攝理，伊暗中為咱準備好勢，四圍咧保護咱，做真濟好代誌。
