Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎黃姿勳
Chò Tâi-oân Ki-tok Tiúⁿ-ló Kàu-hōe ê sìn-tô͘ sī chin kong-êng ê tāi-chì, m̄-koh, góa sè-hàn ê sî m̄-sī án-ne siūⁿ. Tī Tâi-oân chit phiàn thó͘-tē, sìn Ki-tok-kàu ê lâng sī chió-sò͘, sì-kho͘-liàn-tńg lóng-sī chhoe-jī, cha̍p-la̍k chiàu-sî pài thó͘-tī-kong ê lâng, gún chhù–ni̍h iā sī án-ne.
Góa chò gín-á ê sî m̄-bat Ki-tok sìn-gióng, pē-bú kóng beh pài siáⁿ-mi̍h góa tō pài siáⁿ-mi̍h, āu–lâi tòe sió-ha̍k ê gín-á-phōaⁿ khì kàu-hōe chhit-thô, pē-bú bô hoán-tùi, góa tō sìn-kàu ah!
Sìn che bô siáⁿ-mi̍h lâng sìn ê chong-kàu, chia̍h-pn̄g tio̍h ài ba̍k-chiu kheh-kheh kî-tó, bô sìn-kàu ê pêng-iú káu-koài, chhàng lâng ê pn̄g-pau. Múi lé-pài-ji̍t tō-ài khì kàu-hōe, pêng-iú pài-ji̍t boeh chio chhut-khì thit-thô bē-tàng chio lí chit ê sìn Ki-tok-kàu ê lâng, lâng-iân si̍t-chāi bái! Nā káⁿ kóng ka-kī sī sìn-kàu ê lâng, bih-chhiu lóng bē-hù ah! Āu–lâi ta̍uh-ta̍uh-á hêng-sêng chit khoán kē-tiāu ê seng-oa̍h thài-tō͘, chiàu-kóng sī tio̍h-ài án-ne it-ti̍t lo̍h-khì, m̄-koh tha̍k Tâi-oân Kàu-hōe Kong-pò ê le̍k-sú liáu-āu, thài-tō͘ saⁿ-pah-la̍k-cha̍p-tō͘ péng-liàn-tńg, hō͘ Tâi-oân lâng tì-sek khai-hòa ê kong-pò, soan-kàu-su kiàn-li̍p ê Pe̍h-ōe-jī hē-thóng sī ta̍t-tit lán sì-kè pò-iông–ê.
Lán Tâi-oân Ki-tok Tiúⁿ-ló Kàu-hōe ê le̍k-sú tō-sī lán siōng tin-kùi ê pó-pòe. Éng-kòe Tiong-kok Kok-bîn-tóng chèng-hú ap-pek bú-gí, kàu-io̍k hē-thóng kóng Tâi-gí sī kē-lō͘ koh bô chúi-chún ê gí-giân. Lán nā-sī bô kak-chhíⁿ, tō ē tī chit khoán ê siā-hōe khoân-kéng tiong-kan kā Tâi-gí tòng-chòe saⁿ-téng ê gí-giân, liân goân-té bú-gí sī Tâi-gí ê sī-tōa-lâng mā hoán-tńg kám-kak kóng Tiong-hôa Bîn-kok Gí khah ko-sióng.
Lô-má-jîn-su 13 chiuⁿ 11 chat kóng: “Án-ni-siⁿ chai chit ê sî-hāu chiū-sī lín í-keng tio̍h khùn-chhíⁿ ê sî; in-ūi lán tit-tio̍h kiù, pí khí-thâu sìn ê sî khah kūn.” Lán kiám bô eng-kai khùn-chhíⁿ ah! Pe̍h-ōe-jī goân-pún eng-kai sī lán ê su-bīn iōng-jī. Keng-kòe só͘-cha̍p tang ê Hàn-jī Tiong-bûn kàu-io̍k, bat Pe̍h-ōe-jī ê lâng lú-lâi lú lāu, lú-lâi lú chió. Chhiūⁿ gún Jī-têng-po͘ kàu-hōe iáu-koh teh tha̍k Pe̍h-ōe-jī sèng-keng ê hōe-iú chhun chi̍t ê niā-niā. Jî-chhiáⁿ chit ê hōe-iú sī thòe-hiu ê tiúⁿ-ló, í-keng chhit-cha̍p-gōa hòe ah!
Liân-ha̍p-kok Kàu-kho-bûn Chó͘-chit (UNESCO) tēng-gī ê pin-gûi gí-giân la̍k-kip ê tiong-kan, Tâi-gí í-keng hông lia̍t ji̍p tē-saⁿ kip: “Tiōng-tāi Gûi-hiám”, to̍h-sī a-kong a-má ē-hiáu kóng, chóng–sī bô tiāⁿ-tiāⁿ tùi gín-á kóng. Nā-sī bô kiù Tâi-gí, chit khoán gí-giân kap bûn-hòa khó-lêng tō ē siau-sit. Siā-hōe phó͘-phiàn chai lán Tâi-oân Ki-tok Tiúⁿ-ló Kàu-hōe sī kóng bó-gí ê kàu-hōe, lán kóng Tâi-gí ê Ki-tok-tô͘ nā bô hó-hó-á tī seng-oa̍h tiong-kan sú-iōng Tâi-gí, chiàu chit khoán pān-sè, tī lán gâu iōng Pe̍h-ōe-jī ê tióng-chiá lóng bông Chú un-tiàu ê sî, Tâi-gí mā tòe leh bông Chú un-tiàu ah!
Góa ùi 2012 nî khai-sí tam-jīm jî-tông chú-ji̍t-o̍h hāu-tiúⁿ, kàu-taⁿ í-keng cha̍p-sì tang, chit kúi tang chiah tì-kak lán ê chú-ji̍t-o̍h kàu-io̍k hut-lio̍k Tâi-gí, jî-tông chú-ji̍t-o̍h kàu-châi sú-iōng Hôa-gí, Tâi-gí tī tó-ūi? Chóng-hōe Kàu-io̍k Úi-goân-hōe sī m̄-sī eng-kai tī kàu-châi pian-siá hē-kang-hu siat-kè Pe̍h-ōe-jī kàu-châi? Lán ê Tâi-gí choa̍t-tùi ē-tàng chiong lán ê sìn-gióng kàu-io̍k choh koh khah hó. Chhiáⁿ lán chiong sú-iōng bú-gí ê kiau-ngō͘ ùi ji̍t-siông ê sìn-gióng kà-sī tiong-kan têng-sin the̍h–tńg–lâi, lán ê gín-á thiaⁿ-ū lán só͘ kóng–ê, tha̍k ū lán só͘ siá–ê, iōng Tâi-gí kóng in tùi lán ê thiàⁿ, iōng Pe̍h-ōe-jī siá in só͘ siūⁿ–ê. A-men!
