Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎王美書
聖經故事講起上帝kah咱ê關係， thang約略分做三種。頭一種故事teh講三位一體ê上帝是創造咱ê彼个上帝。第二種teh講上帝ín-chhōa咱行向世界路尾ê新天新地。第三種teh講，佇咱kah上帝變做chheⁿ-hūn、關係斷去ê時，伊主動來kah咱koh-hô，救贖咱。基督教ê神學tiāⁿ-tiāⁿ lia̍h救贖kah路尾ê新天新地做中心，創造就佇幕後受忽略。總是，智慧文學佇創造ê神學中間，特別對重受造性命ê有限，包含空間kah時間ê有限，接納這款ê有限性，無需要khah贏𪜶。智慧文學ê核心是：「有限ê人欲如何佇上帝ê面前好好仔活teh。」
「Chhōe求智慧」是上帝hō͘咱人一世人ê工課。佇上帝賞賜ê活命中間，人有耐性kah專心去分別生活ê特質kah品質。人類ê活命beh興旺、beh圓滿，毋是倚靠走閃á-sī beh khah贏人受造ê時陣就有ê有限kah無的確；反轉是必須明白、接受這款ê無完全，而且佇受造世界ê生活中間，明白每一个機會攏是上帝恩典ê賞賜。
聖經中間ê智慧文學主要關心ê毋是救贖á-sī終末（consummation），智慧文學kah上帝ê創造結連，人曉悟家己是受造–ê，這嘛是彼時ê西亞chhōe求智慧ê產物，有以色列ê智者向其他宗教kah文化學習ê成果。用開闊ê心胸來參與世界，關懷人類生活ê意義kah目標，毋是kan-ta對重特別ê國家或是民族ê故事。咱beh佇日常ê生活中間辨明上帝ê臨在，咱毋免祈求上帝施行神蹟、hō͘咱看見「異象」á-sī直接聽見特別ê信息；毋免去倚靠某一個民族特殊ê宗教經驗，因為這是以色列kah 𪜶ê厝邊共同發展出來ê。
根據這款智慧文學ê本質，咱佇台灣thang kā聖經ê傳道書第9章kah台灣ê智慧文學—唸歌ê〈勸世歌〉—做伙對照。因為，台灣ê勸世歌正正是台灣人ê日常生活kah人生智慧ê代表，顯明上帝創造ê智慧佇彼時ê以色列kah𪜶ê厝邊，嘛佇台灣ê土地kah人民。
〈勸世歌〉ê頭10 pha按呢講：
1.這款ê歌真稀罕，勸人做好在世間。
人有真𠢕真頇顢，俗語咧講為人難。
2.世界ê情理著淺淺，幾年ê中間來變遷， 若會得改惡來從善，一日無事是小神仙。
3.講到當今ê世界：鳥為食亡，人為財。想真做人著海海，死從何去生何來。
4.阮來出世無半項，轉去雙手也空空，tiàm在世界若眠夢，死了江山讓別人。
5.有人出世有家伙，兄弟無量起冤家，人在世間若人客，死了江山別人ê。
6.做人毋通siuⁿ phīⁿ-mī，人在世間無幾年， 人若欲死目一𥍉，萬事佮人袂相chiⁿ。
7.心肝一人想一款，海來上深天上懸，艱苦富貴免哀怨，莫非這是前世冤。
8.世情是我看上透，奸雄ê人毋通交，勸恁少年chìⁿ仝老，賰錢是命免人𠢕。
9.世間富戶that-that-tīⁿ，毋是人𠢕才會賰錢，命歹看你是偌𠢕變，嘛有𠢕人踢壁邊。
10.袂來出世命先註，嘛有土公佮莽夫，人敢好額錢遮爾有，𠢕人kā伊做軍師。
傳道書第9章kah〈勸世歌〉，攏講起世間ê情形hō͘聽ê人了解，無批評，欲hō͘聽ê人家己做判斷。我kā一寡趣味ê主題提出來講。
1.啥人掌管人ê命？
傳道–ê講，人ê命無佇人ê手頭，人ê命是佇上帝ê手頭。〈勸世歌〉嘛講，命運毋是人會當掌握ê，命是天註定，而且是袂來出世，命先chù。
2.對生死ê追問
傳道–ê講活咧ê人攏會死， 這是眾人ê命運，無論是義人、邪惡ê人、好人kah歹人，清氣kah無清氣ê，獻祭kah無獻祭ê攏仝款。總是，只要活咧就有向望。〈勸世歌〉嘛強調，人佇世間ê日子真短，目chi̍t nih（𥍉）就轉去。
3.死後人會去佗位？
傳道–ê講人死後會去陰間。〈勸世歌〉用問題來回應：「死從何去？生何來？」
4.人ē-tàng留sím-mi̍h？
傳道書講死ê人啥物lóng毋知，嘛無得著報賞；in ê名無人會記得。佇日光ê下面所發生一切ê代誌，永遠無in ê份。〈勸世歌〉講，咱出世無帶半項來，tńg–khì雙手嘛空空，死了江山niū別人。
5.人應當按怎活？
性命短koh有限，傳道–ê苦勸人tio̍h好好仔過日，7～10節，叫人享受上帝所賞賜ê生活——做你去，歡喜食飯，快樂啉酒，不時穿媠衫，頭殼抹油，kah某快樂過日。〈勸世歌〉勸人改惡從善，做人tio̍h有腹腸，看hō͘開，毋通siuⁿ phīⁿ-mī kah計較，雖罔無講起好好享受，是指出作人ê態度。
6.人生ê逆理
傳道–ê佇11～12節講gâu走–ê，無一定會先到，有力–ê無一定會較贏，聰明–ê無一定會得著米糧，明理–ê無一定會好額，有學識–ê無一定受看重。〈勸世歌〉提起gâu人踢壁邊，有土公仔kah莽夫，有人得著gâu人kā in做軍師；世間富戶是命，毋是因為人𠢕。傳道–ê講，上要緊–ê是人所抵著–ê攏在佇時kah機會。傳道書kah〈勸世歌〉對命運ê解說有仝款ê所在，就是人無法度完全倚靠家己ê聰明kah優勢；無仝–ê是傳道–ê認為重點是時kah機會，〈勸世歌〉用命來說明。傳道–ê提醒聽眾tio̍h把握時kah機會，〈勸世歌〉較濟是交互命運來決定，人毋免相爭。
傳道書9章13～18節有一个譬喻：有智慧ê少年人本來有機會解救伊ê城，智慧其實較贏氣力，總是人有可能無智慧去分辨，反轉用外貌來判斷，總是一遍失錯會破壞真多好事。這个結束留hō͘聽眾家己作決定，到底有得著智慧á無？〈勸世歌〉ê結束，是用台灣人ê多意感嘆詞「i～～」（61232165）結束，無講結論，hō͘人佇吟唱ê時思考進前所聽ê內容。
傳道書kah〈勸世歌〉攏kā咱講，佇這个日常ê世界，佇有限、短短閣一定空空ê人生中間，選擇智慧來過日，才是真正ê大智慧。
