Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎陳俊宏
指導◎陳金花
“Ah! Chhâi-phòaⁿ, tán–chi̍t-ê, pí-sài ài chiām-thêng! Kán-ná ū lâng iōng iá-kiû khian-tio̍h góa ê sió-thúi. O͘h, iáu-siū, ū kàu thiàⁿ–ê lah.” Chhâi-phòaⁿ cháu–kòe-lâi mn̄g kóng, “Lāu-su, lí sī án-ná? Lí ū iàu-kín–bô?” Góa kóng, “Góa kám-kak ū lâng the̍h kiû khian góa ê kha, chiok thiàⁿ–ê lah.” Chhâi-phòaⁿ kóng, “Bô lah. Góa lóng tī lí ê āu-piah, bô lâng the̍h kiû kā lí khian.” Góa sim-lāi siūⁿ kóng, chit siaⁿ kám ē sī kha-kin khì hō͘ tn̄g–khì. Góa kā chhâi-phòaⁿ kóng, “Mâ-hoân lí kiò hō͘-sū lâi khòaⁿ–chi̍t-ê.” Tī in iáu-bē lâi ê sî-chūn, góa kóaⁿ-kín chē lo̍h–lâi kā Siōng-tè kî-tó kóng, “Chhin-ài ê Thiⁿ-pē Siōng-tè, góa ê kha chiok thiàⁿ–ê, khún-kiû Lí lâi kā góa i-tī, hō͘ góa ê kha ē-tàng bô tài-chì. A-men.” Chit-ê sî-chūn, hō͘-sū kap chú-jīm hn̄g-hn̄g chông–kòe-lâi. Choân-hāu ê ha̍k-seng-á mā lâi koan-sim. Kâng chi̍t ê sî-chūn, góa ê kha-té lú-lâi lú-chéng, o͘-chheⁿ lú-lâi lú bêng-hián, mā lú-lâi lú thiàⁿ. Hō͘-sū kóng, “Lí che khòaⁿ–khí-lâi chin giâm-tiōng, góa seng kā lí uh peng, tán–chi̍t-ê kiò kiù-hō͘-chhia lâi kā lí chài khì pēⁿ-īⁿ hō͘ i-seng khòaⁿ.” Chú-jīm sûi-sî kóng, “Góa chit-má tō chài lí lâi khì.” Góa oa̍t-thâu kā chú-jīm kóng: “Góa ê chéng-thâu-á chhi̍h bô góa ê kha-kin, góa kám-kak góa ê kha-kin eng-kai sī tn̄g–khì à. Nā-sī chin-chiàⁿ án-ne, chit-siaⁿ góa tō chhám–ah.” Chú- jīm an-ùi góa kóng, “Bē lah, bô chiah-nī giâm-tiōng lah. Góa chit-má kóaⁿ-kín kā lí sàng kip-chín hō͘ i-seng khòaⁿ-māi.” Tī chhia-lāi, góa kā chú-jīm kóng, “Chiàu góa kui-cha̍p-nî ê keng-giām, chit-pái choa̍t-tùi kha-kin tn̄g–khì ah.”
Kàu pēⁿ-īⁿ liáu-āu, ji̍p-khì kip-chín-sek. Kàu-ūi khòaⁿ-tio̍h lāi-té lóng-chóng sī pēⁿ-lâng, siūⁿ-bē-kàu Ko-hiông chhī-lāi ū chiah-nī chē ê pēⁿ-lâng su-iàu kóaⁿ-kín hō͘ i-seng khòaⁿ. Hó-ka-chài ū chú-jīm kā góa tàu cháu-chông, liâm-mi kòa-hō, liâm-mi khì chhōe i-seng. Tán sì-cha̍p kúi hun-cheng liáu-āu, ū nn̄g ê i-seng chò-hóe lâi hōe-chín. Góa tó tī pēⁿ-chhn̂g, i-seng kiò góa péng-sin, bīn hiòng thô͘-kha. I-seng kā chú-jīm kóng, “Lí chim-chiok kā i khòaⁿ, góa chit-má chhio̍k i ê chiàⁿ-kha hō͘ lí khòaⁿ, án-ne chhio̍k–loeh kha-chiáng ē tín-tāng, che tō-sī kin bô tn̄g, lí khòaⁿ tò-kha, góa kā chhio̍k–loeh, kha-chiáng lóng bē-tín bē-tāng, piáu-sī kha-kin tn̄g–khì, jî-chhiáⁿ sī oân-choân tn̄g liáu-liáu, che ài an-pâi khui-to kā kin chiap–khí-lâi. Khui-to liáu-āu chi̍t-tang chiah ē hó, put-jî-kò ài ho̍k-kiān chiah hó ē lī. Kin-á-ji̍t sī pài-saⁿ, lí āu lé-pài chiah koh lâi pēⁿ-īⁿ khui-to tō-ē-sái ah. Lí khì thâu-chêng la̍p-chîⁿ.” Thiaⁿ i-seng ê chín-toān liáu-āu, góa kui-sin-khu lóng nńg-kô-kô. Góa sim-lāi leh siūⁿ kóng, sī án-chóaⁿ ài tán-kàu āu-lé-pài, chit-má bē-sài nih? Sòa–loh-lâi, i-seng kā góa khōng chio̍h-ko, hó-sè liáu-āu, tō hō͘ góa tńg-khì chhù. Góa ka-tī tùi chhī-lāi khiâ o͘-tó͘-bái kàu goán tau tō ài 25 hūn-cheng chiah ē kàu. Hit-sî, hân-liû koh taⁿ-á-kàu, lú àm sī lú kôaⁿ. Kâng chit-ê sî-chūn, góa koh chhēng té-saⁿ té-khò͘. Góa hō͘ chú-jīm hû chhut-īⁿ liáu-āu, ka-tī khan-chhia chún-pī tńg-khì chhù. Khiâ chhia ê sî-chūn sī lú khiâ lú chùn. Góa sī chi̍t lō͘ chhoah kàu chhù. Si̍t-chāi sī oa̍h beh kôaⁿ–sí! Góa tû-liáu khiâ-chhia ē phi̍h-phi̍h-chhoah í-gōa, tùi lō͘-bīn kap chhia-hóng mā tō ài chin chù-ì. Siāng-kài gûi-hiám–ê sī tòng chheⁿ-âng-teng, it-tēng ài iōng chiàⁿ-kha thuh–tiâu leh. Nā sī bô sè-jī iōng tio̍h tò-kha, tō bē chih-la̍t, kui-ê-lâng tō chhu–lo̍h thô͘-kha, sūn-sòa khì hō͘ chhia kauh–kòe. Án-ne góa tō chhám–ah! Kàu chhù, góa thau-thau-á soan ji̍p-khì pâng-keng, m̄-káⁿ hō͘ lāu-pē kap lāu-bú chai, in-ūi in nn̄g-ê lóng lāu–ah, chi̍t ê 86 hòe, chi̍t ê 90 hòe. Góa nā kā in kóng góa kha-kin tn̄g–khì, in pah-bīn hoân-ló kah bē-chia̍h bē-khùn.
× × ×
Í-chá, góa kha-kin chiâu-choân ê sî-chūn, chò ta̍k-hāng tāi-chì lóng chin liú-lia̍h. Put-koán sī cháu, thiàu, that, a̍h-sī thiah-thúi, lóng chin khin-sang. Tn̄g kha-kin liáu-āu, siōng tāi-seng ài bīn-tùi ê sī sé seng-khu. Tī lī-khui pēⁿ-īⁿ chìn-chêng, i-seng kau-tài kóng, sé seng-khu ê sî-chūn bē-sái hō͘ chúi lâu ji̍p-khì chio̍h-ko. Chū hit-kang khai-sí, góa sé seng-khu chìn-chêng, tò-kha tō ài pau sok-ka lok-á, kha chiah bē hō͘ chúi sia̍p–ji̍p-khì. Jî-chhiáⁿ, sé ê sî-chūn, góa ê kha mā tō ài giâ kah pí tō͘-châi khah koân, chiàⁿ-kha ko͘ chi̍t ki kha ài khiā hō͘ chāi. Góa tō iōng chit ê chu-sè boah sap-bûn, chhiâng-chúi. Góa sim-lāi leh siūⁿ, nā-sī bô sè-jī khì hō͘ ku̍t–tò, thâu-khak khì kho̍k-tio̍h bé-tháng, án-ne tī e̍k-keng-á óng-seng mā lóng bô lâng chai. Góa lú siūⁿ lú pi-ai. Só͘-í, góa lú sé sī lú sè-jī.
Pēⁿ-īⁿ khà tiān-ōe thong-ti góa ji̍p-īⁿ chhiú-su̍t hit-kang, góa chiok hoaⁿ-hí, chi̍t-tiám-á tō bē kiaⁿ. Tī pēⁿ-īⁿ thiam chu-liāu ê sî-chūn, hō͘-sū mn̄g kóng, “Lí beh tēng saⁿ tǹg bô? Lí beh chhiáⁿ khàn-hō͘ bô?” Chit nn̄g-hāng góa lóng kóng hó. Bô gōa kú, ū chi̍t ê chha-put-to 70 gōa hòe ê cha-bó͘-lâng lâi chhōe góa kóng, “Góa sī lí ê khàn-hō͘, ū sáⁿ-mi̍h ài tàu-kha-chhiú ê só͘-chāi lóng ē-sái kā góa kóng.” Góa khòaⁿ-khòaⁿ thiaⁿ-thiaⁿ leh, góa kám-kak kui-khì góa khí-lâi chò i ê khàn-hō͘ khah ū-iáⁿ.
Keh-kang, hō͘-sū lâi niû hoeh-ap sūn-sòa khak-tēng chu-liāu sī m̄-sī góa pún-lâng. Khak-tēng soah, tō chhiáⁿ khàn-hō͘ kā góa sak khì jī-lâu chún-pī khui-to. Góa hit ê sî-chūn ê sim-chêng sī chiâⁿ hoaⁿ-hí–ê. Kàu jī-lâu ê sî, beh khui-to chìn-chêng, koh hō͘ in khak-tēng nn̄g pái chu-liāu. Góa siūⁿ kóng khak-tēng chi̍t pái tō hó ah, sī án-ná beh hiah mâ-hoân, sī án-ná beh kā khì-hun bú kah chiah-nī kín-tiuⁿ? Á-sī pēⁿ-īⁿ kiaⁿ góa cháu–khì? Kàu bóe–á, hō͘-sū khai-sí khàm pò͘, chún-pī khui-to chìn-chêng ê khang-khòe.
Chit ê sî-chūn, góa soah siūⁿ beh pàng-jiō. Góa in-ūi ài bīn-chú soah m̄-káⁿ kā hō͘-sū kóng. Kâng chi̍t ê sî-chūn, hō͘-sū kè-sio̍k gia̍p-tang-gia̍p-sai. Góa gia̍h thâu kā hō͘-sū kóng, góa chiok kôaⁿ–ê, kám ē-sái koàn sio-khì? Sio-khì bô koàn bô tài-chì, koàn chi̍t ē góa lâng soah kiaⁿ-hiâⁿ khí–lâi. Góa sûi kiò hō͘-sū koaiⁿ–khí-lâi, iau-kiû i kóaⁿ-kín chù bâ-siā. I nā m̄ kín chù, góa ê jiō ē kìm bē-tiâu, mā hoân-ló khui-to ê sî-chūn m̄-chai ē soān tio̍h i-seng bē? Khui-to soah, hō͘-sū kā góa kiò cheng-sîn. Góa chhéⁿ–khí-lâi ê tē it kiāⁿ tāi-chì tō sī bong khòaⁿ khò͘ ū tâm–khì bô. Hó-ka-chài bô chō-sêng ta̍k-ê ê khùn-jiáu. Chhut-īⁿ tńg-khì kàu chhù, lāu-pē chai-iáⁿ góa khui-to tńg–lâi, i khòaⁿ tio̍h góa tō kóng, “Kiong-hí o͘h, lí ê jîn-seng koh kòe chi̍t khám ah!”
