Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎做工á人台語工作室
【漢羅】
咱今á日來講gâu，gâu有真厲害，真khiàng ê意思。親像人tāi-chì做了bē-bái，真成功，咱to̍h ē kā伊o-ló講：「有夠gâu！」我國校á hit chūn，leh kah朋友sńg ê時，ûn-ná tiāⁿ-tiāⁿ ē講tio̍h chit句：「真gâu！真gâu！出國比賽！」M̄知ta̍k-ke kám bat聽–過？想–起-來有影蓋心適。Nā是有人bē博假博，咱mā ē-tàng叫伊「mài假gâu」。
Koh一種狀況是leh講，人對某mih tāi-chì真內行，真有研究，咱mā 會當用gâu來講，親像，「gâu唱歌」、「gâu讀冊」、「gâu趁錢」án-ne。M̄-koh有時mā ē用tī khah負面ê所在，像講「gâu sái-lāng」、「gâu彎話」、「gâu食錢」。
Siōng尾一款情形，to̍h是比較的ê khah ē發生ê tāi-chì。直接用例來解說to̍h khah好理解：「Gín-á人to̍h ài食hō͘飽，睏hō͘好，chiah ē gâu大！」「寒流nā來，ài穿hō͘燒，無to̍h ē真gâu感–tio̍h。」「我真無頭神，物件蓋gâu phàng-kiàn。」
【Pe̍h-ōe-jī 】
Lán kin-á-ji̍t lâi kóng gâu, gâu ū chin lī-hāi, chin khiàng ê ì-sù. Chhin-chhiūⁿ lâng tāi-chì chò liáu bē-bái, chin sêng-kong, lán to̍h ē khì kā i o-ló kóng: “Ū-kàu gâu!” Góa kok-hāu-á hit chūn, leh kah pêng-iú sńg ê sî, ûn-ná tiāⁿ-tiāⁿ ē kóng tio̍h chit kù: “Chin gâu! Chin gâu! Chhut-kok pí-sài!” M̄-chai ta̍k-ke kám bat thiaⁿ–kòe? Siūⁿ–khí-lâi ū-iáⁿ kài sim-sek. Nā sī ū lâng bē phok ké phok, lán mā ē-tàng kiò i “mài ké-gâu”.
Koh chi̍t chióng chōng-hóng sī leh kóng, lâng tùi bó͘-mih tāi-chì chin lāi-hâng, chin ū gián-kiù, lán mā ē-tàng iōng gâu lâi kóng, chhin-chhiūⁿ, “gâu chhiùⁿ-koa”, “gâu tha̍k-chheh”, “gâu thàn-chîⁿ” án-ne. M̄-koh ū-sî mā ē iōng tī khah hū-bīn ê só͘-chāi, chhiūⁿ kóng “gâu sái-lāng”, “gâu oan ōe”, “gâu chia̍h chîⁿ”.
Siōng bóe chi̍t khoán chêng-hêng, to̍h sī pí-kàu tek ê khah ē hoat-seng ê tāi-chì. Ti̍t-chiap iōng lē lâi kái-soeh to̍h khah hó lí-kái: “Gín-á lâng to̍h ài chia̍h hō͘ pá, khùn hō͘ hó, chiah ē gâu tōa!” “Hân-liû nā lâi, ài chhēng hō͘ sio, bô to̍h ē chin gâu kám–tio̍h.” “Góa chin bô-thâu-sîn, mi̍h-kiāⁿ kài gâu phàng-kiàn.”
