Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳柏壽
我是南部草地庄跤出世大漢ê gín-á，對北部，尤其是對海邊小港，完全無印象，只有對窗仔門看外口來想像。一直到入去基隆海洋學院，尤其是tòa入去安瀾橋，才真正知影故鄉ê海口，以及海口ê風情世事，才深深知影台灣ê海洋文化。佇海洋學院讀冊ê時，有一景tiāⁿ佇心內，就是向倒爿一直去就是海洋學院，彼个角頭叫安瀾橋。學長李明清租一間教室hō͘愛繼續讀日本話ê同學補習。佇我入學進前，陳澄美老師就佇海洋教日文，伊嫁台灣人就改名。伊人細漢細漢，日文教了真好，編一本教日文ê冊，阮到今真濟人繼續咧用伊ê冊。
窗仔門框ê雨水一直滴是我真懷念ê所在。教室面對漁港，有真濟擺我看人落貨白帶魚，基隆外港就是白帶魚ê產地，貨濟ê時，漁民有時掠白帶魚出來街仔路賣。這個細細ê所在，雖然這陣chió-chió ê人聚集，但是看起來有出真濟受人敬重ê人，有人去美國歐洲留學，讀到博士，嘛有人去日本ê商社工作，有人做真成功ê國際貿易，真有才情。人毋通看阮是phú-phú，阮是真材實料，毋通講阮是歹竹出好筍。這真正是可愛hō͘人懷念。
這實在是上帝恩待ê所在，佇這個小小山坡頂，定期聚集全國全島來ê青年，尤其是長老教會ê人，攏主動會來報到，親像定期beh來ê雨水，時期若到，in主動會飛來遮聚集；時間若到，in自動會飛去in家己ê前程。按呢一年過一年，永遠袂停。按呢毋知會tòng偌久，年久月深，可能永遠湧落去，親像安瀾橋ê海湧，永遠咧湧。In親像樹根仔soan-tîn（旋籐）真深，遍佈到真闊，恬恬生湠。雖然我嘛佇附近山坪，看過大尾ê牛角花，但是阮少少ê一陣人做伙，娶某生囝，雖然無出名，但是佇上帝ê所在，有記載：是講in已經認真做人，完成in人所互上帝交代ê任務，雖然無記載，無出名，但是已經是完成人生ê人。
這陣佇安瀾橋咧聚會開講交陪ê chió-chió人雖然chit-má四散佇世界逐所在，但是佇阮每一個人ê心目中，目睭攏看到清清楚楚，有時有人佇Amsterdam ê街仔路，有人佇New York散步相逢。好朋友啊，請你去，飛愈高，飛愈遠，愈好，因為我知影，有一日恁一定會閣轉來遮恁古早出發ê所在。
