Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Góa ê kò͘-hiong sī tī Tâi-tiong Lâm-khu ê chng-kha, goán tau ū cha̍p-it ê hiaⁿ-tī chí-bē, pâi-thâu sǹg–lo̍h-lâi góa pâi tī tē cha̍p, tō án-ne goán tau ê pn̄g-khaⁿ sī bô-té chhim-kheⁿ, góa ê pē-bú ko͘-put-chiong tō ài piàⁿ-sí chò chhân lâi kā chiah chē chhùi-khang chhī hō͘ pá. Ē-kì-tit in ta̍k-kang tùi thàu-chá ài piàⁿ kàu àm, bô-mê bô-ji̍t, ná ū êng-kang thang koán-lí chiah tōa tīn ê gín-á leh? Ta̍k-ke lóng mā sī tōa-hàn koán sè-hàn, téng-si koán ē-si, tî-thâu koán pùn-ki. Góa pâi tī bóe-á tē-jī, sǹg–khí-lâi kan-taⁿ ē-tàng koán chi̍t ê sió-tī, khiok ài hō͘ káu ê hiaⁿ-ché koán, góa in-ūi hō͘ lâng koán koàn-sì, sè-bīn khòaⁿ khah chē, tì-sú piáu-bīn khòaⁿ–khí-lâi khah koai-khá, tō khah tit lâng thiàⁿ, m̄-kú kóng si̍t-chāi, khó-lêng sī góa khah gâu nǹg-khang nǹg-phāng, gâu sūn-hong sái-chûn, koh chin chió poa̍h-lo̍h-gám, siūⁿ–khí-lâi che mā sī chi̍t chióng pún-téng, mā sī chi̍t pé kang-hu !
Tī goán chhân-piⁿ ê iap-kak-á ū pa̍t-lâng chèng ê pa̍t-á-chhiū, góa ta̍k pái nā khòaⁿ-tio̍h chú-lâng lâi bán pa̍t-á ê sî, tō oàn-thàn lāu-bú bô chèng pa̍t-á, nā bô, goán ke-kiám mā ē-tàng khioh chi̍t-kóa khò-siong–ê, á-sī bái-phôe-saⁿ–ê lâi chia̍h, goán mā m̄-bián kan-ta khòaⁿ leh giàn, giàn kah lâu-chhùi-nōa.
Hit chi̍t mê, ge̍h-kng chin àm, goán sim-lāi siūⁿ-tio̍h hia-ê pa̍t-á seⁿ khah lúi-lúi-lúi, chin hó-chia̍h-khoán, kan-ta iōng siūⁿ ê sim-lāi tō kám-kak pa̍t-á ê tak-chhè kap chheng-tiⁿ, chit-má góa tòng-bē-tiâu, sim-koaⁿ lia̍h thán-hoâiⁿ, siūⁿ-kóng, nā beh chia̍h pa̍t-á, eng-àm bô ji̍t-kng, chò chha̍t kám m̄-sī ài thàn chit-sî? Góa chiū cháu khì chhut-chio sió-tī chò-phōaⁿ chò-hóe lâi thau bán pa̍t-á, goán nn̄g lâng ûn-ûn-á kiâⁿ, kiâⁿ kàu pa̍t-á-chhiū kha, in-ūi thiⁿ chin àm, khòaⁿ bē chheng-chhó pa̍t-á ū se̍k bô? Tō tī bong-tio̍h pa̍t-á ê sî, iōng chéng-kah tàng khòaⁿ-māi leh, nā sī sió-khóa tàng ē lòe ê tō bán–khí-lâi, ti̍t-káu goán ê khò͘-tē-á té tīⁿ ê sî, chiah kóaⁿ-kín kiâⁿ tńg–khì, kàu chhù liáu-āu, chi̍t lâng chù-ì tōa-lâng ū lâi bô, chi̍t lâng nǹg ji̍p-khì bîn-chhn̂g-kha chhàng pa̍t-á, siāng-sî goán kín-tiuⁿ kah sim-koaⁿ-thâu phi̍t-pho̍k-chháiⁿ, kui sin-khu lâu-chhìn-kōaⁿ.
Hoan-tńg-kang, goán thiaⁿ-tio̍h tōa-lâng teh kóng khí, ū lâng cha-hng lâi lán chng-á-lāi thau bán pa̍t-á, tāi-ke tō ài chù-ì, in-ūi chèng pa̍t-á ê a-sáng thiⁿ-kng khì bán pa̍t-á ê sî, khòaⁿ tio̍h ta̍k lia̍p pa̍t-á ê phôe-saⁿ, lóng ū chéng-kah tàng lòe ê hûn-jiah, ta̍k lia̍p pa̍t-á lóng khì-liáu-liáu, bô lâng beh bé lah !
Thiaⁿ-tio̍h chia-ê ōe goán ê sim-lāi mā chin kan-khó͘, in-ūi goán ê tham-chia̍h hāi lâng sim-koaⁿ kiat kui khiû, siūⁿ kàu chia, goán hiaⁿ-tī-á ê lāi-sim siū chek-pī, mā m̄-káⁿ koh nǹg ji̍p-khì bîn-chhn̂g-kha chia̍h hia ê pa̍t-á!
Chit ê chò chha̍t-á ê keng-giām hāi goán kan-khó͘ kiaⁿ-hiâⁿ chin kú chiah pêng-chēng. Ū lâng kóng: “Thau-the̍h–ê khah hó-chia̍h.” Góa khòaⁿ chi̍t-tiám-á mā bô-iáⁿ !
