Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎做工á人台語工作室
【漢羅】
今á日咱beh研究ê詞是so，chit ê so（挲），是用手tê-á輕輕á摸–leh摸–leh ê意思，像講「Goán kiáⁿ ùi學校轉來厝ê時，講伊今á日hō͘先生o-ló，我mā tòe leh真歡喜，頭殼kā-i so-so–leh，o-ló伊gâu。」So頭殼是兩ê人真tah-lia̍p chiah ē有ê動作，m̄是凊彩人ê頭殼lóng beh hō͘你so，m̄-thang烏白來。
Koh一種so，是ài雙手配合做伙so，像講「so索á」、「so圓á」、「so藥丸á」chit款–ê。So圓á hō͘我想tio̍h一句：「在人so圓tēⁿ扁。」Chit句ê意思to̍h是隨在別人去chhiâu-chhe̍k、安排、處置án-ne。「So圓á」koh有做公親ê意思，兩pêng ê利益leh chhiâu bē平ê時，叫第三者去調解，一pêng退一步，hō͘代誌ē圓滿，to̍h ē-tàng講是叫第三者去「so圓á」，beh講khah簡省–ê，講叫人去「so」mā ē-sái。
另外一款是，手面有mi̍h-kiāⁿ，beh抹去另外一ê mi̍h-kiāⁿ頂頭，像講魚á so鹽，to̍h是手hē寡鹽，平均抹tī魚身，thang看koh來beh煎a̍h beh炒，nā有關節痠痛a̍h是肢體痛疼，mā thèng好the̍h藥洗so-so thui-thui–leh，ûn-ná加減á有應效。
【Pe̍h-ōe-jī 】
Kin-á-ji̍t lán beh gián-kiù ê sû sī so, chit ê so, sī iōng chhiú-tê-á khin-khin-á bong–leh bong–leh ê ì-sù, chhiūⁿ kóng “Goán kiáⁿ ùi ha̍k-hāu tńg-lâi chhù ê sî, kóng i kin-á-ji̍t hō͘ sian-seⁿ o-ló, góa mā tòe leh chin hoaⁿ-hí, thâu-khak kā-i so-so–leh, o-ló i gâu.” So thâu-khak sī nn̄g ê lâng chin tah-lia̍p chiah ē ū ê tōng-chok, m̄ sī chhìn-chhái lâng ê thâu-khak lóng beh hō͘ lí so, m̄-thang o͘-pe̍h-lâi.
Koh chi̍t chióng so, sī ài siang-chhiú phòe-ha̍p chò-hóe so, chhiūⁿ kóng “so soh-á”, “so îⁿ-á”, “so io̍h-oân-á” chit khoán–ê. So îⁿ-á hō͘ góa siūⁿ tio̍h chi̍t kù: “Chāi-lâng so-îⁿ-tēⁿ-píⁿ.” Chit kú ê ì-sù to̍h sī sûi-chāi pa̍t-lâng khì chhiâu-chhe̍k, an-pâi, chhú-tì án-ne. “So-îⁿ-á” koh ū chò kong-chhin ê ì-sù, nn̄g pêng ê lī-ek leh chhiâu bē pêⁿ ê sî, kiò tē saⁿ chiá khì tiâu-kái, chi̍t pêng thè chi̍t pō͘, hō͘ tāi-chì ē oân-boán, to̍h ē-tàng kóng sī kiò tē saⁿ chiá khì “so-îⁿ-á”, beh kóng khah kán-séng–eh, kóng kiò lâng khì “so” mā ē-sái.
Lēng-gōa chi̍t khoán sī, chhiú-bīn ū mi̍h-kiāⁿ, beh boah khì lēng-gōa chi̍t ê mi̍h-kiāⁿ téng-thâu, chhiūⁿ kóng hî-á so iâm, to̍h sī chhiú hē kóa iâm, pêng-kin boah tī hî sin, thang khòaⁿ koh lâi beh chian a̍h beh chhá, nā ū koan-chat sng-thiàⁿ a̍h-sī ki-thé thàng-thiàⁿ, mā thèng-hó the̍h io̍h-sé so-so thui-thui–leh, ûn-ná ke-kiám-á ū èng-hāu.
