Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎久保光彥
Iok-hān Hok-im 13:34~35
“Góa hō͘ lín chi̍t tiâu sin ê kài-bēng: Lín tio̍h saⁿ-thiàⁿ; chiàu góa thiàⁿ lín án-ni, lín mā tio̍h saⁿ-thiàⁿ. Lín nā saⁿ-thiàⁿ, chèng-lâng ōe tùi che lâi chai lín sī góa ê bûn-tô͘.” (Hiān-tāi Tâi-gú E̍k-pún)
Nā-sī beh thó-lūn “Sin ê kài-bēng”, lán seng lâi khòaⁿ “Kū ê kài-bēng”. Taⁿ ū-ê lâng beh mn̄g góa: siáⁿ-mi̍h sī “kū ê kài-bēng? Góa kóng “kū ê kài-bēng,” in-ūi góa kám-kak chit ê “Sin ê kài-bēng” sī ū chi̍t ê chiân-thê ê kài-bēng. Siáⁿ-mi̍h khoán ê chiân-thê?
Hit ê chiân-thê to̍h-sī Kū-iok Sèng-keng ê kong-iàu ê kài-bēng. Lán seng lâi khòaⁿ Má-thài Hok-im 22:34~40 ê kò͘-sū:
Hoat-lī-sài-phài ê lâng thiaⁿ-tio̍h Iâ-so͘ hō͘ Sat-to͘-kai-phài ê lâng bô ōe thang ìn, chiū chū-chi̍p chòe-hé. Kî-tiong ū chi̍t ê lu̍t-hoat-kàu-su lâi mn̄g chi̍t ê būn-tôe, beh kā I chhì-thàm, kóng, “Lāu-su, Mô͘-se ê Lu̍t-hoat tó chi̍t tiâu sī siōng-tōa ê kài-bēng?” Iâ-so͘ ìn kóng, “Lí tio̍h choân-sim, choân-chêng, choân-ì thiàⁿ Chú—lí ê Siōng-tè. Che sī siōng-tōa koh tē-it ê kài-bēng. Tē-jī ê mā siâng-khoán: Tio̍h thiàⁿ chhù-piⁿ chhin-chhiūⁿ thiàⁿ ka-kī. Choân-pō͘ Lu̍t-hoat kap sian-ti ê kà-sī lóng ēng chit nn̄g tiâu chòe kun-kù.”
“Tio̍h thiàⁿ Siōng-chú” kap “Tio̍h thiàⁿ chhù-piⁿ chhin-chhiūⁿ ka-tī” sī tī Kū-iok Sèng-keng tiong-kan siōng iàu-kín ê kài-bēng.
Lán mā ē-sái kóng chit nn̄g tiâu lu̍t-hoat sī hit-ê sî-tāi ê Iû-thài lâng ê siông-sek. In-ūi án-ne, Iâ-so͘ tī chia m̄-bián soat-bêng chit ê tāi-chì.
Só͘-í Iâ-so͘ tī kin-á-ji̍t ê Sèng-keng tiong-kan hō͘ lán “Sin ê kài-bēng” m̄-sī chi̍t-ê to̍k-li̍p ê kài-bēng. Lán ài kì-tit chit-ê kài-bēng kap “Kū ê kài-bēng” sī bô hoat-tō͘ thiah-sòaⁿ–ê.
Só͘-í, lán mā ē-sái kóng tī Kū-iok kap Sin-iok Sèng-keng lāi-bīn ū saⁿ tiâu siōng iàu-kín ê kài-bēng. Tē-it sī thiàⁿ Siōng-chú. Tē-jī sī thiàⁿ chhù-piⁿ chhin-chhiūⁿ ka-kī. Tē-saⁿ sī lán tio̍h saⁿ-thiàⁿ.
× × ×
Chiah-ê kài-bēng lóng sī teh kóng THIÀⁿ. Thiàⁿ chiū-sī Ki-tok-kàu tiong-kan chiok te̍k-pia̍t ê kài-liām. Sù-tô͘ Iok-hān kóng “Siōng-tè sī thiàⁿ” (I Iok-hān 4:16)
Lán chai-iáⁿ chit saⁿ tiâu kài-bēng sī koan-hē lán-lâng kap Siōng-chú ê thiàⁿ, í-ki̍p lán-lâng kap lâng ê thiàⁿ.
Tān-sī, lán nā beh liáu-kái Ki-tok-kàu ê thiàⁿ kap lán beh án-chóaⁿ thiàⁿ, lán tāi-seng ài liáu-kái Siōng-chú ê thiàⁿ, liáu-kái lán só͘ niá-siū ê thiàⁿ sī sím-mi̍h khoán ê thiàⁿ.
Só͘-í, lán niá-siū ê thiàⁿ sī sím-mi̍h khoán ê thiàⁿ? Chit khoán ê thiàⁿ kap it-poaⁿ lâng ê thiàⁿ ū sím-mi̍h chha-pia̍t?
Iâ-so͘ ê thiàⁿ chiū-sī bô tiâu-kiāⁿ ê thiàⁿ. Lán mā ē-sái kóng Iâ-so͘ ê thiàⁿ sī bô jīm-hô lī-hāi koan-hē ê thiàⁿ. Sù-tô͘ Pó-lô kóng: “Jîn-ài éng-oán chûn-chāi.” Iâ-so͘ ê thiàⁿ sī éng-oán ê.
Tān-sī, lán nā beh mn̄g iáu-bōe sìn Iâ-so͘ ê pêng-iú, “Siáⁿ-mi̍h sī thiàⁿ”, in só͘ beh kóng ê m̄-sī lán só͘ khòaⁿ–kìⁿ ê. Kán-tan kóng, lâng ê thiàⁿ chiū-sī iú-hān ê, ū tiâu-kiāⁿ ê, kap sió-sió ê. Iâ-so͘ ê thiàⁿ kap lán-lâng ê thiàⁿ lóng bô kāng-khoán.
Iok-hān kóng “Lán tio̍h saⁿ-thiàⁿ, in-ūi Siōng-tè ū tāi-seng thiàⁿ lán.” (I Iok-hān 4:19) Lán Ki-tok-tô͘ ē-tàng thiàⁿ sī in-ūi Iâ-so͘ tāi-seng thiàⁿ lán. Lán í-keng niá-siū Iâ-so͘ ê thiàⁿ, só͘-í lán ê seng-oa̍h mā-ài ū chit ê éng-oán ê thiàⁿ. Nā-bô chit ê thiàⁿ, lán bô-hoat-tō͘ thiàⁿ.
× × ×
Lán Ki-tok-tô͘ ê chek-jīm sī si̍t-chiān chit saⁿ tiâu thiàⁿ ê kài-bēng thang hō͘ lâng chai Iâ-so͘ ê thiàⁿ ê chûn-chāi.
Siōng-chú ê ǹg-bāng sī lán hiah-ê iáu-bōe chò Ki-tok-tô͘ ê pêng-iú, thong-kòe lán ê thiàⁿ Siōng-chú, lán ê thiàⁿ chhù-piⁿ, thiàⁿ ka-tī kap lán ê saⁿ-thiàⁿ, beh lâi sìn Iâ-so͘.
Hong-chè (Francis of Assisi) kóng, “Siông-siông thoân hok-im, nā su-iàu, chiah ēng kóng-ōe.” Koan-hē thiàⁿ, lán mā ē-sái kóng kāng-khoán ê tāi-chì. Iok-hān mā ū kóng: “Siàu-liân pêng-iú, saⁿ-thiàⁿ m̄-thang chí-ū ēng ōe á-sī ēng chhùi kóng, tio̍h si̍t-si̍t-chāi-chāi si̍t-hêng.” (I Iok-hān 3:18)
Lán chai-iáⁿ Siōng-chú thiàⁿ lán. Lán chai-iáⁿ Iâ-so͘ kà lán kóng lán su-iàu si̍t-hêng thiàⁿ ê kài-bēng. Tī kin-á-ji̍t ê Sèng-keng tiong-kan Iâ-so͘ kā lán kóng, “chèng lâng beh tùi án-ni chai lín sī góa ê bûn-tô͘.” nā-sī lán si̍t-hêng thiàⁿ ê kài-bēng. Lán ki-tok-tô͘ chiū-sī Iâ-so͘ ê bûn-tô͘. Lán kè-sio̍k phah-piàⁿ si̍t-hêng chiah-ê thiàⁿ ê kài-bēng.
