上帝 ê 天使

(請安裝Taigi Unicode字形,配合Firefox瀏覽器來讀)

作者:陳柏壽

經文:但以理書10章12~21節、以弗所6章12~17節

以賽亞書30章21節按呢講:「你若是向倒爿(tò-péng),或是向正爿(chiàⁿ-pêng),佇你 ê 後面有聲給你講,這邊是正路,著向前去,毋免憢疑!」咱人生 ê 道路中最大 ê 問題,就是毋知向倒爿較好,或是向正爿較好,佇 hia gōng-gōng-se̍h。咱信上帝 ê 人,著揀一條正路,就是看著上帝愛咱行 ê 彼條,勇敢下決心,行落去。每日你我攏會拄著真濟分叉路,每一項代誌我著做選擇,揀一條咱感覺是上帝指示 ê 路。

天公上帝 teh 安排

離開 New York 已經有30冬。這擺閣轉去,體驗New York閣較深。除了教會會友 ê 熱情招待 kah 鼓勵,kah 古早無變以外,New York kah 西雅圖有真大 ê 無仝,熱起來真熱,寒起來真寒;佇車頭等火車親像佇火爐,一下入車煞親像入去冰箱;人人佇街路駛車攏親像咧拚生命,無欲讓人,我欲看路名,開車小可踏擋仔,toh 有人 tùi 後面給你 poⁿ,poⁿ 了伊欲共你超車,閣越頭目睭共你 kàng 一下。人人互相看樣,人 poⁿ 我嘛 poⁿ,poⁿ 來 poⁿ 去真自然,這是New York ê 文化,變做家己生活 ê 一部分,家己生命 ê 一部分。教會內 ê 人,踏出門外,就嘛變做Newyorker。

回想過去十幾冬佇 New York 讀冊及牧會 ê 時陣,我 ê 生活態度、性格、思想、講話,可能就是一個完全 ê Newyorker。真正有影,tòa 一所在,就產生一款人:台灣 tòa 久會變做台灣人,日本 tòa 久會變做日本人,Norway、Denmark tòa 久自然帶有海賊 ê 氣質,但是 chit-má 是非常開明 ê 海賊。

我對雲林庄腳出身,去日本娶某,生四個囝,做牧師退休佇西雅圖,回想過去 ê 一切一切,嘛攏毋是我會當控制 ê 代誌。以前攏想講一切是我家己 ê 決定,家己 ê 奮鬥,家己 ê 才情。Chit-má 想起來,攏毋是,攏是天公上帝佇後壁 teh 安排。

咱 ê 先輩,佇日本時代,變做有日本人 ê 性格 ê 台灣人,這個台灣性格是明治時代受德國教育 ê 福澤諭吉、後藤新平等傳落來 ê「日本台灣」性格。今仔日佇台灣經過60年中國教育以後 ê 台灣人,嘛已經變做無共款 ê 台灣人。佇北京共產教育下面 ê 中國人,及世界各地人有真無仝款 ê 所在。有一個牧師來共我講,伊去 Mercy Island 教會,有中國來 ê 婦人人共伊講,請你改用「國語」講道,「我下禮拜會帶 2、30人來互你!」伊問我 ê 意見。我給伊講,我嘛有仝款經驗,但是我攏共 in 講,「請恁毋通來!」中國人著去講中國話 ê 教會,台灣人 ê 教會是台灣人骨肉 ê 關係,有台灣人 ê 天使 teh 管,中國教會有中國人 ê 天使 teh 管。

人人頭殼頂有家己 ê 天使

上帝是創造 ê 上帝,伊容允不同環境塑造不同 ê 人間。不同 ê 天使培養不同 ê 體格、思想、性格、運命。人活咧毋是佇肉體,毋是佇摸會著、看會著、鼻會著、啖會著 ê 物質,毋是因為食啥物、穿啥物、hiù 啥物芳水,才變做一個人,嘛毋是因為伊 ê 家世血統祖公家譜,才變做一個人。每人在佇顧佇伊頭殼頂 ê 無共款 ê 天使,造成一生不同 ê 命運。咱台灣人講:「頭頂三尺有神明」,我想講是人人頭殼頂有伊家己 ê 天使。

紀元前5世紀波斯帝國占領全部西南亞洲及東地中海。但以理受命做波斯帝國 ê 宰相。伊做宰相 ê 第一日,思思念念 ê 只有一項代誌,就是求上帝互波斯王開恩,放伊 ê 猶太人百姓轉去耶路撒冷重建聖殿。聖經講但以理有這一項意念 ê 第一日,上帝已經聽見伊 ê 祈禱。但是聖經嘛寫:伊 ê 祈禱,去互另外一個波斯 ê 靈界 ê 勢力,白話字聖經寫做「波斯 ê 天使」,阻擋21日,袂得通過。

上帝 ê 天使著及別個天使 ê 勢力鬥爭21日。聖經講,上帝毋是無 teh 聽,但以理 ê 祈禱第一日上帝已經有聽著。但是對第一日,上帝 ê 天使,及對敵 ê 天使就開始戰鬥。上帝 ê 勢力及另外地上 ê 勢力戰鬥21日 ê 時間。21日,但以理艱苦流目屎,袂食袂睏,心情艱苦。伊以為上帝無 teh 聽。

但以理耐心等21日,上帝才派天使長米迦勒出現,不但按呢,上帝閣講你接落去著應戰希臘天使 ê 勢力,一關過一關。亞述、巴比倫以後就是波斯,波斯去互隔壁 ê 小國希臘吞去,興起橫跨地中海 ê 亞歷山大帝國,續接就是羅馬帝國 ê 世界,然後產生真大 ê 歐洲文明、文藝復興、宗教改革,產生葡桃牙、西班牙、英國、日本、美國 ê 海上霸權,一國過一國,一朝過一朝,每一朝代上帝攏有安排無共款 ê 勢力來支配。會使講:上帝安排 ê 天使 teh 支配世界,這叫做歷史。

上帝確實有聽著

咱今仔日講 ê 但以理 ê 故事就是 teh 講佇彼個歷史 ê 時點,上帝佇歷史 ê 大輪中間做工。上帝 teh 做工,世間無仝款 ê 勢力,嘛 teh 做工。咱世間人無真容易了解,彼時陣嘛無容易看出。本來咱想講上帝一定會真緊答應,但是上帝無 hiah 簡單應聲。

咱祈禱時時講:「上帝啊,祢『chit-má』著緊來幫助,祢 chit-má 就互我 ê 病緊好!」這是咱做一個有限、脆弱、幼稚的人間會當發出 ê 心聲。但是毋知上帝為著欲完成咱 ê「chit-má」,著經過真濟艱苦 ê 21日 ê 戰鬥。21日以後上帝 ê 出現不過表示上帝及惡勢力戰鬥暫時 ê 結束。

以色列人重建聖城等21日,有真濟時陣咱等210日嘛無聽見上帝 ê 聲,有真濟時陣咱等2000日、20000日嘛無聽見上帝 ê 聲。咱台灣人求上帝互台灣獨立出頭天,祈禱200年,我想上帝確實有聽著,但是毋是 chit-má。Chit-má 不過是猶 teh 戰爭。

咱佇這個地面,是及上帝做伙戰鬥。天使長米迦勒是及另外一個看袂著 ê 靈 ê 勢力戰鬥。地上 ê 權勢及勢力,thang 講是各方 ê 天使,主宰各方 ê 個人、機構、組織、團體、政府、學校、教會。各有各的生長 ê 氣質及文化,因為各有各 ê 天使 teh 主宰。

活佇世間逐日攏 teh 相戰

這款每日戰鬥 ê 行為,用保羅 ê 話,就是每日 teh 對付「空中屬靈氣 ê 惡魔」。

空中,意思是講看袂著 ê 惡靈,遮 ê 惡靈其實就是活佇地面上,活佇咱生活四圍 ê 一切,in 活佇咱 ê 社會、公司、政府、學校、教會內面。In 活佇環境污染、氣候變遷、海水起漲、私慾橫行、獨裁橫霸、壓迫人權、歧視女性、種族優越等等現象。遮 ê 攏是地上惡靈 ê 作為。咱是活佇充滿惡靈 ê 世間內面,啥物時陣欲破病,啥物時陣欲互車 chông 著無人知,只有求上帝 ê 保惠師天使來保護。

咱著會記得咱活佇這世間逐日攏 teh 相戰,逐日 teh 為上帝相戰,逐日及天使長米迦勒做伙相戰,及世間執政 ê、掌權 ê、管轄幽暗世界 ê、空中屬靈氣 ê 惡魔相戰。這我想是上帝互咱做人活佇世間 ê 意義。

咱欲揀佗一旁

馬太13章36開始,主耶穌講一段真深的譬如,講一個主人,意思是講上帝,去園 nih 掖麥子,但是暗時若到,魔鬼就去田 nih 掖稗仔,麥仔及稗仔做伙大欉。農夫給主人講,請互阮去田 nih 給稗仔 khau khau 起來,主人講:「毋通!放 in 做伙大欉。等到最後,就是世界末日 ê 時,上帝會給稗仔捆捆做伙,放火燒。」

上帝容允魔鬼去田 nih 掖稗仔子,這項代誌實在真 oh 去了解,咱人按怎想嘛想袂通。不但按呢,上帝是日時掖麥仔,但是魔鬼是趁暗時,無人看 ê 時,來偷掖。就是佇咱不知不覺 ê 時,來走入去咱 ê 心田內面。

我讀國民學校 ê 時佇雲林古坑棋盤厝 bat 去田 nih khau 稗仔,囡仔腳卡細支袂去踏著稻仔,稻仔大到遮高 ê 時,稗仔會比稻仔卡高,閣會結子親像高梁彼款。阮若 khau 一叢趁5角。阮攏去仔店買含仔糖。

我感覺主耶穌對我 ê 教示有一項真深 ê 所在,就是上帝容允咱活佇這世間,是非不明,烏白不分,麥仔稗仔濫濫糝糝 ê 世界。上帝叫咱活佇這款世界,講起來實在真無道理。濟少我 teh 想有一項道理,就是上帝容允咱活佇這世間,各人有各人 ê 保護 ê 天使 ê 中間,咱欲揀佗一旁?

使徒約翰佇約翰一書3章給咱講:親愛 ê 兄弟啊,這世間有遮濟靈,有遮濟勢力,遮濟天使,但是毋通逐項攏信,今仔日信這個,明仔載信彼個,心神不定,飛來飛去!咱著去 chhōe 啥物才是出佇上帝,啥物是上帝 ê 好意,啥物才真正是上帝 ê 天使 ê 指示。咱著信靠飛佇咱頭殼頂 ê 天使來行天路。

廣告/手到心至抄寫本-箴言

我有話要說