游泳池畔

◎梁望惠

搬來台南已經 teh beh 4年,逐日天猶未光,騎腳踏車經過勝利路台南一中附近 ê 時,攏會聽著一陣人 teh 開講。原來 in 是 teh 聽候游泳池開門。Nái 會即呢仔拍拚,即早 tō 來佇遐?我感覺真好奇。無拍算,最近我嘛加入此個「晨泳俱樂部」。Bē 少人喔,透早6點以前 tō 已經有20 thóng 個,游泳衫穿好勢,落水 teh 泅。

講「泅」,其實變化真濟,內容嘛真豐富。

有一個太太,不時 tō 穿 kah súi 噹噹,戴一頂帽仔,帽仔頂閣結一蕊花,坐佇游泳池邊 ê 椅仔,teh 等待伊 ê 翁婿。伊恬恬仔坐佇遐,kā 這個游泳池增加一寡 súi 光景。閣伊對翁婿 ê 感情嘛互人真感動。

有一個先生,chēng 行入大門開始,tō kā in 某 ê 手牽牢牢。去到游泳池邊,嘛是按呢,小心 kā 牽 teh。正港是「牽手」!一半擺仔 chô͘-kiáⁿ 出現,雖然無落水,kā 媽媽 tàu 換衫,吹頭毛,嘛佇游泳池邊 kā 媽媽 ia̍t 手加油,伊美麗 ê 身材及有孝 ê 心,大家攏有看著。

最近才發見,嘛有父仔 kiáⁿ 做伙來。看著 in 兩人,年紀大 ê choh 前,壯年 ê choh 後,做伙行佇游泳池邊,beh 去泡燒水 ê 所在,實在是一幅真 súi ê 圖。

阮這 chōa 水道,會當講是上輕鬆自由 ê。有 ê 泅半 chōa,有 ê 干單佇水內 teh 行路,有 ê 提一塊板慢慢仔進前。真正會曉泅25公尺 ê,速度嘛是無緊,互我這個 taⁿ-á 來 ê 菜鳥仔一點仔 tō 無壓力。

我本來是逐日及阮先生佇成大校園行路運動,最近龍骨淡薄仔受傷,正腳 bē chih 力,才來泅水。無拍算,kui 身軀佇水內,人感覺真輕鬆。泅了以後,精神嘛變好。水 ê 浮力互我感覺 ná 親像主 teh 扶持,手小可 poe̍h 一下,身軀就會向前行。游泳池邊 ê 親情、友情、愛情,嘛互我逐日真享受。

無久以前佇教會及兄弟姊妹分享講,我 chit-má 腳 teh 痛,m̄ 知 beh 按怎行到天國。一個兄弟用手比飛龍機 teh 飛 ê 款式 kā 我講:「天國,m̄ 是按呢飛去 ê 嗎?」現在,我感覺天國 ná 親像會當用泅 ê 過去,m̄ 免出偌濟力,主會佇身邊 kā 咱撐 teh。就按呢,咱 beh 及主同齊,一直行到天國。

廣告/美好腳蹤368認購

我有話要說