請大家做伙o͘-ián台語文創商品

Koeh Iàn-lîm

今年3月,台灣教會公報社長方嵐亭牧師特別送筆者筆khok仔。這ê筆khok仔kap一般筆khok仔無仝,因為筆khok仔正面書寫「Khiam-pi chiū ē ū Chun-kùi.」翻寫做華文是「尊榮以前必有謙卑」,是台語文創商品。

今年筆者佇國中擔任台語社團指導老師,專工提筆khok仔問學生意見,chhím-thâu學生毋知影筆khok仔kap台語課有啥關聯,一直到我提醒,學生chiah注神看白話字,一字一字ta̍uh-ta̍uh-á拼,一字一字ta̍uh-ta̍uh-á唸,總算唸好ah,mā總算hō͘學生注意著台語文創商品。這門課,kan-nā七ê學生選修,下課後毋知影in是毋是會繼續講台語?繼續看台語文章無?會用台語文思考無?答案若是無,代表咱ê環境對台語文無友善,所以台語文必須ài hông看著、聽著,甚至是摸著,台語文創商品ê重要性kap價值性佇chia。

「Soaⁿ-Kha Kàu-Hōe,2006.10.23」,頂面ê文字刻印佇一雙箸,che是前山腳教會黃哲彥牧師(現此時是汐止教會牧師)上任山腳教會時製作ê紀念品,到taⁿ我猶原繼續teh使用。普通ê箸無啥稀罕,總是箸頂面印台語白話字,用箸ê人見遍看著白話字會加強使用台語文ê企圖心,che應當mā是設計者ê用心。所以食飯時提出這雙箸,看著白話字,我會想著黃哲彥牧師,想著Sooaⁿ-Kha Kàu-Hōe,想著耶穌基督……

佇台灣街仔路, tiāⁿ-tiāⁿ看著東南亞新住民以in本國ê文字做khan-páng,新住民人口數佇台灣按比率雖然是少數,但是in ê東南亞語文商品佇台灣愈來愈sù-siông,甚至明年佇國民小學東南亞語文會正式開課。咱台灣講台語ê人無算少,但是相關台語文創商品真oh chhōe,問題出佇toh?

台灣教會公報社為欲開發台語文創商品,透過聖靈牽線,加上政府實施新南向政策,特別委託印尼廠商CV SHALOM設計木製手工藝品,筆者手頭ê台語文筆khok仔是一例。可是干單按呢iáu無夠額,筆者bat佇台羅會ê Line看著一寡趣味ê圖,一寡少年家用白話字為元素,設計古錐ê貓仔相借問,結合資訊kap科技,是真好ê台語文創商品。

真歡喜台灣教會公報社開發台語文創商品,向望逐家相挺,支持台語文創商品。
(作者為台灣教師聯盟副理事長)

我有話要說