◎林芷安
人講台灣是寶島，四界全全寶，東南西北耍透透，恁敢知影，我上愛去ê所在是佗位？我上佮意ê所在，毋但會使予我看尪仔冊，閣看甲喙角笑甲離腮腮，這就是阮學校ê圖書館。
阮學校ê圖書館足闊，內面有三萬外本冊。我上佮意ê是故事冊，冊外口畫甲足媠，足吸引人。最近我借一本俗諺ê冊，阮規家伙攏愛看，攏愛學，會使予阮規家伙感情變好。
來到圖書館看冊ê感覺，若親像看一齣歡喜、心適ê好戲，閣若像食一頓甘甜滋味ê好料理。俗語講：「食果子拜樹頭。」愛知影感恩，最後，我欲感謝阮學校ê用心，為阮準備遮爾濟冊閣遮好ê圖書館。
