(請安裝Taigi Unicode字形，配合Firefox來讀)
228筆記—1
紀錄者：鄭雅怡
踏話頭：
1947年228 hit 站，有 chōe-chōe 台灣人 tī 路頭 hō͘中國軍隊拍–死。不而過，in ê 家屬 hoān-sè m̄ 知，抑是驚惶過頭，m̄敢講–出來，敢無，死者可能無親人、後嗣（āu-sû）thang 替 in 伸冤，致到 in ê 遭遇罕得人知，mā 無 hông 列入官方或者學界 ê 歷史檔案，實在遺憾。2018-2019有幾 ā 位兄姊願意分享228當其時 in ê家族、朋友 ê 經歷。我整理 in ê 口述記錄，用按呢ê庶民(sù-bîn) 記持（kì-tî）來紀念228。
以下是第一篇「228筆記」ê內容大綱：
主題：高雄市228受難者曾正己， sió-khóa 提起澎湖228關係人許整景
受訪者：莊碧錦女士
訪談地點：高雄市同盟二路客家文化園區、屏東市頂柳仔、台南－高雄台鐵火車頂頭、高雄市大埤湖
訪談日期：2018年10月15日、10月24日、10月28日、11月21日
受難者/關係人和受訪者的關係：表阿伯和姪女、世交、澎湖同鄉
Bak血ê遺書．Bē赴求婚ê chhiú-chí（戒指）── Takao 228受難者曾正己老師
我號做莊碧錦，bat tī 高雄市做補習班導師，chit-má teh 讀研究所，翻頭 koh 做學生。1955年我 tī 澎湖 Má-keng 出世。Má-keng，漢字應當寫做「媽宮」，意思是「má-chó͘-keng，媽祖宮」，taⁿ 官方 kā 寫做「馬公」。
阮老爸 hit-pêng，莊–家 ê 祖先 tī Má-keng 市外 ê 東文里世居徛起，是在地的大家族。阮神主牌仔頂ê族譜記載 kah chiâⁿ 完備。
結婚進前，阮爸母 tī 澎湖蹛仝庄。阿母是家庭主婦，聽伊講，初嫁入莊–家，猶有阿祖ài奉待。身為上蓋下輩（ē-pòe）ê干仔孫新婦，ta̍k工透早3點伊 tio̍h-ài 起床，chiah 會赴款 hō͘ 規家伙仔食穿。
阮莊–家ê厝宅頭前就是海，阮kā號做「門口海」。古早hia不管時都 pha 足 chōe 帆船，攏是tùi唐山載貨來澎湖交易–ê。聽阮阿爸講，阮查某阿祖姓劉，是清國時期出世–ê，可能是tùi唐山tòe in老爸來澎湖賣hûi-á（瓷器），阮查埔祖祖看這個查某囡仔有kah意，就kā留落來做新婦仔。尾手in規隻船ê人攏倒轉去唐山，chhun阮查某祖一個人留tiàm東文里。
大約民國五十幾年ê時，hín 阮全家已經搬來 Takao ah。有一工金門司令劉安祺ê sun-á（姪）坐jì-puh（吉普車）來 kah 阮兜拜訪。阮老爸講這位是「阿叔」，應該就是阮查某祖hit爿ê唐山親chiâⁿ。這位劉阿叔華語足 gâu 講–ê。
出世才十月日，我就 tòe 爸母搬來 Takao，m̄-chiah 我講台語無澎湖腔。Hit 當陣阮老爸 teh 做工程包工，tú 好高雄有 khah 濟工事 thang báu，伊就 chhōa 某囝搬來 chia。頭起先阮 tòa tī 前金，óa 現在五福三路、大立百貨 ê 1 chōa 細條路。續–落阮搬去仁愛路，chit-má 改稱做仁愛街，近倚大同一路 ê 角勢。過一站，阮又閣搬徙，tòa tiàm 中正三路 ê 忠孝教會（高雄浸信會）hit tah，我國校仔讀就近 ê 信義國小。Koh 來，阮搬去到六合一路、民族二路交接 hit 箍圍。尾–仔，搬去商業學校（雄商）óa 廈門街 ê 所在。
有關曾正己表阿伯的代誌我攏是聽阮老爸講–ê。阮內公就是曾正己ê阿舅，所以我 ài 稱呼曾正己的老母「姑婆」，稱 in 老爸「丈公」。猶 tòa 澎湖 ê 時，丈公做海軍造船所 ê 技工，姑婆做農。後來 in 規家口仔 mā 搬來打狗，和阮 ê 家庭有 teh 交陪 sio-chhōe。
曾正己阿伯是 in 兜 ê 大囝，日治尾期伊去日本讀大學，o̍h 工科。其實 in ê 家庭並無好過，囡仔 koh 濟。Beh 去日本留學進前，正己伯來 kā in 外公，就是阮查埔祖，提旅費。去日本了，伊攏 tio̍h 送報紙來趁所費，than g講非常苦學。倒轉來台灣以後，伊頭一個頭路就是去工業學校（chit-má ê 高雄高工）教冊。
228發生 ê 時，足 chōe 工業學校的學生 mā 去高雄車頭附近，幫忙維護治安。Hín 高雄市有四間學校 ê 學生聯合起–來，做維持社會秩序、保護外省人 ê khang-khòe，包括高雄第一中學（現在 ê 高雄中學）、商業學校、工業學校，和高雄第一女中（現在 ê 高雄女中）。
大概是1947年3月初六 hit 工，曾正己去到高雄車頭和附近 ê 大港埔，想 beh 了解、關心伊 ê 學生 tī hia ê 實際狀況。無疑悟到佇 chit-má ê 中正三路、六合一路 hit 搭仔，soah 遇 tio̍h 市街戰，中國部隊去 kàu-tè 就對民眾無差別掃射。曾正己不幸 hông 彈–tio̍h。聽阮老爸講，槍子（chhèng-chí）tùi 伊倒爿（左旁）肩胛抑是胸坎鑽–入去，thàng 過伊 ê 倒爿手骨，致到伊流足濟血。有好心 ê 民眾 kā 伊 giú 入去一戶人家厝–nih。Hit 戶 ê 查某厝主叫伊去 bih tiàm上內底角 ê 浴間仔。
Hit 時曾正己想 tio̍h 一位醫生朋友，kap 伊仝時期去日本留學，o̍h 醫科–ê，tú 好 tī 大港埔開一間醫生館，號做「體仁病院」，就 tī chín 捷運美麗島站 ǹg 中正三路這爿。曾正己拜託收留伊 ê 人家厝主人去請體仁病院 ê 院長來 kā 伊糊藥仔。總–是，hín 市街戰 tng 慘烈，無人敢出門。自按呢，曾正己出血過多來過身，hín才27、28歲 niā-niā。斷氣進前，伊拆家己 ê 衫，搵家己 ê 血，寫一張遺書 hō͘ 一位澎湖同鄉兼好朋友呂安德，囑託對方替伊照顧爸母，牽成小弟小妹。尾後聽講這封血書有影有送到呂安德ê手頭。
曾正己過身了後，伊 ê 親人 tùi 伊 ê 外衫 ê lak 袋仔，chhiau-tio̍h 一腳 chhiú-chí，是伊準備 beh kā 心所愛 ê 人求婚–ê，可惜永遠無機會 thang 實現這個心願 ah。
曾正己阿伯頭起 tâi tī 林德官，倚近現在民權二路、五福一路ê sì-kho͘-lián-tńg。早前 hia 是規 phiáⁿ ê 荒埔野草，chōe-chōe 228受難者攏 hō͘ 人車來 chia 埋葬。正己伯 ê 爸母、小弟、小妹攏無啥 ài 提起伊 ê 代誌。照我所知，曾正己無 hông 列入二二八受難者名單。我 m̄-bat 聽講，伊 ê 家屬有得 tio̍h 賠償。
我感覺二二八是一場時代悲劇，是台灣百姓參國民政府互相誤會續引起–ê。其實台灣人民非常ê善良，m̄-koh國民政府為tio̍h顧in ê政權，soah對台灣ê知識份子有敵意，因為誤會續來消滅chiah-ê台灣精英，想講採用武力就ē-tàng方便統治、管理。殊不知台灣知識份子ê犧牲對in ê家庭、家族ê傷害實在有夠大。
228過了，阮親阿伯和曾正己阿伯ê第二個小弟有錢項往來。Hit 時阮兜 tòa tī 仁愛路 kap 大同路 sio-kap ê所在。曾正己 ê 老母 tòa tī 大同國校附近，離阮兜無 jōa 遠。會記得我四、五歲 ê 時，姑婆差不多 ta̍k 日都行路來阮兜。伊若來，攏會 chah 燒餅、煎餅抑是索仔股做等路，來 hō͘ 阮 chiah-ê 囡仔食，mā 會叫阮老母替伊 gia̍p 目睫毛。
會記得姑婆 chhiâng 在穿長褲 kap 布鈕仔 tōa-khim-saⁿ，通常是烏–ê，暗色–ê，抑是素面–ê，m̄-bat 穿花–ê。伊是一位慈祥 ê 序大，會 kap 阮囡仔 pōaⁿ-nóa，kā 阮關心。有當時若歹天，姑婆無來，我攏會問阮阿母，「姑婆今á 哪會猶bē來？」路尾手我才知，姑婆 chia̍p-chia̍p 來阮兜，是希望 chhōe-tio̍h 機會，請阮老爸來處理 in 親兄參姑婆第三後生 ê 借貸問題。總–是，姑婆看阮兜囡仔規大陣，頭嘴 chōe 個，生活並無富裕，續也 m̄-bat kā chiah-ê 話講出嘴。等 kah 我讀高中，暗時讀冊讀 kah 真 òaⁿ，看爸母坐咧，煩惱 kah 睏 bē 去。原來阮爸母 koh kap 姑婆 ê 後生有寡財務問題，後來雖然無 sio 告，m̄-koh兩家親 chiâⁿ 自按呢就無 koh kau-chhap。
澎湖許整景醫師ê點滴
曾正己、呂安德、體仁病院院長，koh 有以下 beh 講起 ê 許整景醫師攏tī日治尾期去日本留學。呂安德 mā讀工科，後來bat做澎湖要塞司令部技正、澎湖縣建設局長和縣長。
許整景 ê 代誌我 mā 是聽阮老爸講–ê。阮內公和許整景 ê 老爸許令咸是足親足 bā ê朋友。阿爸細漢 ê 時tòe in 親生老母 tòa，阿公和細姨另外徛。阿爸去 chhōe 阮阿公 ê 時 chhiâng 在遇著許令咸先生，bat 聽 in 兩個長輩講起許整景 ê 代誌。
228 hit 站，許整景 teh 做澎湖海軍病院 ê 軍醫。（根據1992發表 ê〈許整景先生訪問紀錄〉，收錄 tī《口述歷史》第三期《二二八事件專號》，228 hit 當時許整景 ê 職稱是澎湖要塞司令部軍醫處主任。）許整景和 hiàng 時澎湖要塞司令史文桂中將 ê 關係友好。Hit 當陣局勢 chiâⁿ 緊張，官方禁止民眾結規群集會。有一工 Má-keng ê 觀音亭附近聚集 chōe-chōe 進香 ê 民眾，軍隊掠準是 beh 反亂，就起驚，準備 beh gia̍h chhèng掃射。許整景接 tio̍h 這個消息，就緊去 chhōe 史文桂，kā 伊說明，chiah-ê 群眾是 beh 去拜拜，慶祝觀音佛祖生，m̄ 是 beh 結黨造反，請軍隊 m̄-thang 對 in 開 chhèng。自按呢澎湖免除一場災難，講–來這是許整景對地方極大 ê 貢獻。
有關許整景ê事蹟會koh寫tī別篇「228筆記」。
