(請安裝Taigi Unicode字形，配合Firefox來讀)
作者：李南衡
聽講阮某 in 台南護校 ê 李麗貞老師 beh 轉來台灣，in 班裡佇台北 ê 同學攏真歡喜，電話拍過來拍過去，約逐個 kah 李老師做夥食飯講話。李老師佇 1956 年去美國進修，是戰後台灣早期去美國留學讀公共衛生 ê 先進。轉來台灣做當時台灣上蓋需要 ê 防癆（肺病）工作，了後才去台南護理學校教冊。當時佇 16、7 歲查某學生 ê 心目中，李麗貞老師是 in ê 模範，用 chit-má 少年人 ê 講法叫作「粉絲」。
In 畢業 6、7 年後 ê 1964 年，李老師第二遍去美國，kah 伊 ê 翁婿葉國勢先生團圓。扮演賢妻良母 ê 角色以外，koh 協助葉先生拚台灣獨立運動，當時猶無美國全國性 ê 台灣同鄉會，葉國勢先生 tī 1969 至 1970 年當選早期 ê 美東台灣同鄉會會長。1970 年發生「四二四刺蔣事件」ê 救援工作，in 翁某貢獻誠濟。搬去德州了後，李麗貞老師專工去病院 chhōe 夜班 ê 護理工作，日時去大學進修，the̍h tih 心理治療師 ê 執照，而後作台美人第一位婚姻 kah 家庭治療師。
佇台灣北部連絡會 tio̍h ê 同學 hit 工攏拚來 kah 李麗貞老師見面。10 位同學 koh 加同學 ê 翁婿，hām 李老師攏總有 15 個人一大桌坐滿滿。李老師講逐個無閒 ê 中間會 tàng 來見面實在真歡喜，koh hō͘ 逐個所費請 chiah 呢豐沛 ê 暗頓實在真多謝。有人講，老師罕得轉來，今年 mā 是為 tio̍h 總統大選投神聖 ê 一票才專工轉來。真難得畢業 50 年猶會 tàng kah 老師見面；有人講「一個人客九主人」，是逐個做夥食飯，那會使算是請老師咧！有人講一個人客十幾個主人、不止九個，咱台灣俗語話 beh 按怎講？我應講：「羅漢請觀音。」逐個問講啥意思？
我才解說講，佛教傳到中國 ê 時，mā 有 kā 印度 ê 十六羅漢傳說傳入，羅漢是佛教釋迦牟尼 ê 得道弟子，已經修道到殺盡一切 ê 煩惱、疑惑、痴迷，維持正法，永久 tòa 佇世間、解脫輪迴。但是中國人比較 khah 合意「十八」chit-ê 數，像講「十八般武藝」、「女大十八變」，到唐朝 ê 時才增加作「十八羅漢」。講起唐朝，猶有一個趣味 ê 代誌，佛教 ê「觀世音菩薩」原本是印度梵語譯作漢語 ê 名號，意思是「觀察世間音聲覺悟有情」，因為唐太宗李世民 ê 名有一字「世」，「世」字 tio̍h 閃開「避諱」，才改作「觀音菩薩」，簡稱作「觀音」。真濟主人請一個人客，咱台灣俗語話 tio̍h 借用佛教傳說 ê 兩種人物，講作「羅漢請觀音」。有人隨時問講，若是顛倒反，一個主人請真濟人客，台灣俗語話 beh 安怎講？有人足巧，隨時應講是 m̄ 是講作「觀音請羅漢」？完全正確！
當日在場攏是七十外歲 ê 老人，都猶有人聽了 m̄ 知意思，相信 koh khah 少年 ê 一輩，有可能自然 m̄-bat 聽過「羅漢請觀音」chit 句台灣俗語話。
李南衡《那teh褪色的台灣俗語話》（1-2冊 )已經出版，歡迎交關，做伙進步
