【窗口無遮欄】苦難 ê 祈禱文

46
Image by reenablack from Pixabay
◎Chio̍h Bo̍k-bîn(靜宜大學台灣文學系兼任助理教授)

教會牧師的公子出外,在車禍中喪生。近日來,起自中國武漢的肺炎對舉世都是飛來橫禍,許多人喪失生命。更加令人深思在信仰中面對死失的態度。是以為牧師、為教會、為上帝的百姓草擬了祈禱文:
疼阮 ê 主,萬權 ê 上帝,阮成做一 ê 教會,來到汝 ê 殿;帶著感謝,嘛帶著大大傷悲 kap 毋甘。阮為著牧師 ê 家庭來啼哭、流目屎。

阮知影,上帝 ê 意念較懸阮 ê 意念;嘛知影,萬項代誌攏是上帝攝理, chhōa 路。阮更加知影, tī 苦難內底,上帝猶原賞賜向望。牧師公子,轉去父 ê 家, kap 上帝做伙,有永遠 ê 性命。總–是,阮 kap 牧師仝款,會數念 chit-ê 囡仔 tī 阮中間 ê 日子。伊是遐爾仔才情,遐爾仔 un-sûn , hō͘ 牧師 ê 家庭 kap 教會濟濟喜樂。有伊 tī 阮中間,阮有幸福 kap 歡喜。因為 án-ne ,主召伊轉–去 ê 時陣,阮更加毋甘,更加無慣勢,攏是因為主 kā 伊造 kah 遐可愛,遐聰明。

阮就欲為牧師 ê 家庭向主懇求,求主親自安慰牧師,伊 ê 牽手, kap 伊 ê 序細。做儂父母 ê 牧師、牧師娘,求主大大安慰,賞賜氣力;hō͘ 怹知影主對囡仔有更加好 ê 安排;tī 怹傷悲 ê 時陣,主 kap 怹 saⁿ-kap 佇咧。加添怹 ê 氣力,更加為著主來疼痛猶 tī 身軀邊–ê 序細。嘛求主安慰失去兄哥 ê 遮 ê 囡仔,hō͘ 怹會記得兄哥有對怹照顧,會記得兄哥真媠 ê 模樣,也 hō͘ 怹對 án-ne 來更加有孝怹 ê 父母。因為 án-ne,阮就看著主 ê 恩典 kap 向望;阮雖罔經過死蔭、烏暗 ê 山谷,嘛毋驚災害。因為主 kap 阮同在。嘛求主用 siāng-khoán ê 安慰,來安慰 chit-ê 教會;用 siāng-khoán ê 大氣力,加添hō͘ 教會。Hō͘ 阮 leh 流目屎 ê 時陣,猶原會感覺著主 ê 臨在,猶原奮興,來做主 ê 工。

求主 hō͘ 阮教會每一 ê 姊妹兄弟,對 án-ne 更加來相疼痛。Hō͘ 阮攏為著阮 ê 姊妹兄弟,來成做主 ê  thûi、主 ê 柺;成做主 ê 器具,來扶持阮 ê 姊妹兄弟。因為 án-ne,hō͘ 儂更加看–著,中興新村長老教會,有主 ê 保守 kap 祝福;tī 烏暗–ê 時陣,猶原 tī 主內面得著對主來 ê 氣力。對 án-ne 來顯明主 ê 恩典、榮光 kap 旨意。

主,阮歡喜甘願來做主 ê 百姓,毋是因為永遠袂有困難 kap 災害,乃是因為靠著主,tī 困難 kap 災害 ê 時陣,tī 對頭風 ê 時陣,阮 khiā 會在,阮會知影主已經備辦氣力,hō͘ 阮繼續 kap 主同行。行主 ê 天路,行疼痛 kap 恩典 ê 路。

主袂 hō͘ 阮擔袂起 ê 擔,因為主就是阮 ê 氣力。感謝主。感謝主。

阮 ê 感恩祈禱袂堪得,攏是奉靠耶穌基督 ê 聖尊名,阿們。

我有話要說