(請安裝Taigi Unicode字形，配合Firefox來讀)
Lí Ka-jiû 李佳柔
Hit kang ê chá-khí-sî, hǒng chi̍t-siaⁿ, chiok tōa-siaⁿ–leh! Kā góa chhá cheng-sîn, ùi chhù gōa thoân lâi chi̍t chūn koh chi̍t chūn sà-sà-kiò ê lo̍h-hō͘ siaⁿ, hō͘ lo̍h kah jú lâi jú tōa chūn, hō͘-chúi siaⁿ siaⁿ-siaⁿ phah ji̍p góa ê sim-lāi, ín-khí tùi lí ê siàu-liām. Khòaⁿ hō͘ tī leh lo̍h, chiū ē tàng iáⁿ tio̍h lí se̍k-sāi ê hêng-iáⁿ, thuh chi̍t-ki koáiⁿ-á, tùi góa bî-bî-á chhiò. Chiâⁿ kú bô án-ne kap lí sio tùi siòng–ah! Hiah-nī kú bô khòaⁿ tio̍h lí, chit-chām-á kám hó? Tī góa chit pêng ê sè-kài lóng it-ti̍t leh kā lí kòa-sim.
Hō͘ ti̍t-ti̍t lo̍h, lo̍h bē-thêng, siūⁿ khí lí chhōa Mê-á chham góa khì kong-hn̂g chhit-thô, chhu liû-lông sńg kah bô siūⁿ beh tńg–khì, siūⁿ bē kàu hiông-hiông lâi chi̍t chūn tōa hō͘, bô teh thang bih hō͘, kā lán saⁿ ê lâng ak kah tâm-lok-lok, khòaⁿ pān-sè, chi̍t sî-á bih bē kòe-hō͘, kiaⁿ goán kám–tio̍h, lí kā î-it ê hō͘-moa am tī góa kap Mê-á nn̄g ê lâng ê sin-khu téng, hō͘ lo̍h kah hiah-ní-á chho͘, tōa-lō͘ im-chúi, bē-su-leh kiâⁿ tī khe-chúi bīn-téng, chiok pháiⁿ kiâ-lō͘. M̄-nā án-ne, o͘-tó͘-bái koh tī pòaⁿ lō͘ kò͘-lō͘, bô-pō͘ chiū khan o͘-tó͘-bái iōng pō͘-lián–ê khì o͘-tó͘-bái tiàm siu-lí. Hit tong-sî lí bô moa hō͘-moa, m̄-chai lí kám ē kôaⁿ?
Mê-á chhut-sì āu, a-má tō bô hoat-tō͘ chôan-sim kò͘ nn̄g ê cha-bó͘-sun, só͘-í lí hū-chek kò͘ góa. Ē kì-tit góa sè-hàn ê sî, lí chia̍p-chia̍p khiâ thih-bé, ná chia̍h “tn̂g-siū-hun” chài góa sì-kè khì chhit-thô. Ta̍k-ji̍t chham lí tiàm tī chhù lāi thiaⁿ Tâi-gí kóng-pò tiān-tâi bē io̍h-á, ē-tàu sî-á kap lí tī têng-á-kha him-sióng Sin-tiong-ke ê hong-kéng, khòaⁿ lâng kap chhia lâi-lâi khì-khì, che pí khoàⁿ iàⁿ-phìⁿ koh-khah chhù-bī. Góa siōng ài tī lo̍h-hō͘ thiⁿ, tó tī îⁿ-îⁿ ê thiàu-chhn̂g kap lí tī têng-á-kha thiaⁿ hō͘-chúi siaⁿ, ká-ná sī chhui góa lo̍h-bîn ê ga̍k-khek, kài sáng-sè–neh, chiâⁿ kín khùn lo̍h-bîn!
Kap lí chò-hóe ê chit tōaⁿ sî-kan, sī góa chit-sì-lâng siōng kài khoài-lo̍k ê sî-chūn. Sui-bóng lán chū khah-chá kàu-taⁿ lóng bô hō͘-siōng kóng kòe “góa ài lí”, put-jî-kò͘, lí tī hō͘ tiong chhiò-bi-bi ê piáu-chêng, tō kám siū lí ê koan-sim kap thiàⁿ-thàng. Tng lí mn̄g góa kám ū chiàu-khí-kang chia̍h-pn̄g? Kám ū sam-put-gō͘-sî leh pôe-phòaⁿ a-má? Chhiáⁿ lí an chi̍t-pah ê sim–lah! Góa choa̍t-tùi ē thiàⁿ-sioh ka-kī, koh ē hō͘ a-má ta̍k-kang lóng hoaⁿ-hí. Hō͘ í-keng thêng–ah, m̄-koh lán hō͘-siōng ê su-liām, éng-oán bē tn̄g-chām.
彼工的早起時，hǒng 一聲，足大聲咧！共我吵精神，對厝外傳來一陣閣一陣 sà-sà 叫的落雨聲，雨落kah 愈來愈大陣，雨水聲聲聲拍入我的心內，引起對你的數念。看雨佇咧落，就會凍影著你熟似的形影，托一枝枴仔，對我微微仔笑。誠久無按呢佮你相對相矣！遐爾久無看著你，這暫仔敢好？佇我這爿的世界攏一直咧共你掛心。
雨直直落，落袂停，想起你𤆬美仔（註1）參我去公園𨑨迌，趨溜籠耍 kah 無想欲轉去，想袂到雄雄來一陣大雨，無塊通覕雨，共咱三个人沃甲澹漉漉，看範勢，一時仔覕袂過雨，驚阮感著，你共唯一的雨幔罨佇我佮美仔兩个人的身軀頂，雨落 kah 赫呢仔粗，大路淹水，袂輸咧行佇溪水面頂，足歹行路。毋若按呢，烏肚䆀閣佇半路顧路，無步就牽烏肚䆀用步輦的去烏肚䆀店修理。彼當時你無幔雨幔，毋知你敢會寒？
美仔出世後，阿媽就無法度全心顧兩个查某孫，所以你負責顧我。會記得我細漢的時，你捷捷騎鐵馬，ná 食「長壽薰（註2） 」載我四界去𨑨迌。逐日參你踮佇厝內聽台語廣播電臺賣藥仔，下晝時仔佮你佇亭仔腳欣賞新中街（註3）的風景，看人佮車來來去去，這比看影片閣較趣味。我上愛佇落雨天，倒佇圓圓的跳床（註4）佮你佇亭仔腳聽雨水聲，ká 若是催我落眠的樂曲，蓋爽勢呢，誠緊睏落眠！
佮你做伙的這段時間，是我這世人上蓋快樂的時陣。雖罔咱自較早到今攏無互相講過「我愛你」，不而過，你佇雨中笑微微的表情，就感受你的關心佮疼痛。當你問我敢有照起工食飯？敢有三不五時咧陪伴阿媽？請你安一百个心 lah！我絕對會疼惜家己，閣會予阿媽逐工攏歡喜。雨已經停矣，毋閣咱互相的思念，永遠袂斷 chām。
（註1）美仔（Mê-á）：小妹的小名。
（註2）長壽薰（tn̂g-siū-hun）：一種薰的牌子。
（註3）新中街（Sin-tiong-ke）：位佇高雄市左營區新庄仔的街仔路。
（註4）跳床（thiàu-chhn̂g）：囡仔𨑨迌的器材，華語叫做彈跳床。
