《那teh褪色 ê台灣俗語話》
一塊碗蓋一個白賊
李南衡
阮教會 ê 台語白話字班，有一工講 tio̍h 翁某生活 ê 時，我講30、40 年前 bat 讀過一篇文章，講一個人行佇人生 ê 道路頂面，上好是有一個伴做伙行，m̄-nā 會 tàng 互相照顧、有啥代誌有人 thang 參詳，抵 tio̍h 啥物歡喜 ê 代誌隨時有人 kah 你分享做伙歡喜，有啥物悲傷痛苦 ê 代誌有人kā 你安慰鼓勵，khah bē 感覺孤單。所以上帝 tio̍h 匹配夏娃 hō͘ 亞當做某。無管是做翁婿 ê 抑是做某 ê chit-ê 伴，那像是對手 ê 一條毯仔（thán-á），佇人生 ê 路途頂面若無一條毯仔，有小可欠缺遺憾 ê 感覺，若有會加真溫暖、tioh 好好珍惜。
咱看別人 ê 毯仔那像逐條都真舒適真好看，雖然每一條毯仔攏可能有缺失，有 ê 毯仔有鈎破孔 ê 所在，有 ê 毯仔食烟 ê 時陣無小心 hō͘ 烟 chhuh 一孔，有 ê 毯仔 bat hō͘ 囝仔 chhōa 尿過，睏3年、5年、甚至 20 年、50 年 ê 毯仔，無可能攏那像新 ê ，總是加減有小可無完美 ê 所在。但是，每一個人日時無蓋 ê 時陣攏會 kā 毯仔摺好勢，外人無可能看 tio̍h 任何 bē 見得眾 ê 部分，逐條毯仔mā看tio̍h súi-tang-tang。每一條毯仔有啥缺失家已上知影。
話講猶未完，一位姐妹接落去講。若抵 chiah 你講 chit 號情形，阮故鄉 ê 人會講：「一塊碗蓋一個白賊（chit-tè óaⁿ khàm chit-ê pe̍h-chhat）」哦？我 m̄-bat 聽過 chit 句俗語話，chit 句俗語話那會按呢講咧？
伊解說講，像講一個好額人 ê 大家庭，tòa 差不多有歸甲地 ê 花園洋樓，出門攏是雙 B ê 進口車，m̄ 是Mercedes-Benz tio̍h是 BMW，查某人捾 ê 皮包攏 mā 是 “LV” hit 級 ê ，穿 ê 衫攏 mā 是世界名牌 ê ，來往 ê 人 m̄是大企業家 tio̍h 是大官虎。囝仔 tio̍h 讀私立學校抑是美國學校。啥人看 tio̍h mā 攏真欣羨。其實，有時為 tio̍h 細項代誌同姒仔 mā 會變面無講話，有時為 tio̍h 小可錢，兄弟仔 mā 會相拍起冤家。若 m̄ 是兩年前才新娶入去 ê 新婦看 bē 慣勢，加減透露一絲仔 hō͘ 伊 ê 好朋友聽，啥人 mā 無可能會知影 in ê 底蒂。阮厝裡 ê 老大人聽了 tio̍h 講「一塊碗蓋一個白賊」，每一個家庭攏親像一塊碗，碗蓋 tiâu 咧，干單家己知影蓋 tio̍h ê 是啥物 niā-niā。碗有大細 súi-bái，那像是愈大塊 ê 碗蓋 tio̍h ê 白賊愈大，外表看起來愈 súi ê 碗，所蓋 ê 白賊 tio̍h愈奇巧。碗若無掀起來看，外人無人會知影蓋 tio̍h ê 是啥款 ê 白賊。
我緊轉來厝裡查看幾本台灣俗話 ê 冊，攏無 chit 句俗語話。我想，chit 句俗語話真有可能是地方性 ê ，別庄頭 ê 人可能攏 m̄-bat 過。所以 chit 款 ê 俗語話應該 bē 啥時行，擋 bē 久。
圖片來源：https://asia.si.edu/object/F1896.90/
