(請安裝Taigi Unicode字形，配合Firefox瀏覽器來讀)
作者：林碧堂
聽見林俊育長老佇真濟所在講起，巴克禮版 ê 聖經翻譯 lóng 無「悔改」，只有「反悔」，總是作基督徒，認罪悔改是非常要緊，全民台語聖經就改正巴克禮 ê 翻譯，成做有「悔改」ê 聖經。查考希臘文聖經 kah 字典，μετανοέω，這字 ê 意思是一個人改變伊家己 ê 心思或是目標。用使徒行傳 2 章 38 節做例，佇台灣普遍流通 ê 聖經，通常將 μετανοέω 翻譯做悔改（和合本、紅皮聖經、思高譯本、現代中文譯本、和合本修訂本、現代台語譯本、全民台語聖經）；也有一寡譯本毋是，像巴克禮翻譯做「Lín tio̍h 反悔」，客語翻譯為「你等每一個人愛離開罪惡」等等。因為這篇欲討論巴克禮用「反悔」無用「悔改」ê 因由，咱通 koh 用馬太福音 11 章 20～21 節做例，斟酌比較巴克禮 kah 全民台語聖經 ê 翻譯。
巴克禮版（白話字改做漢羅）：
耶穌 bat tī hiah-ê 城 kiâⁿ 濟濟權能，因為 in lóng 無反悔，hit 時 chiah 責備 in 講，Ko-lia̍p-sìn ah，你有災禍！Pek-sài-tāi ah，你有災禍！因為 tī lín 中間所行 chiah-ê 權能，若有行 tī Chhui-lô kap Se-tùn，in 就早早穿麻衫 sám 火 hu 來反悔。
全民台語聖經：
耶穌已經 tī hiah-ê 城行真 chē 神跡，因為 in lóng 無悔改，祂就責備 in 講：「Ko-la̍h-sìn，你慘 à！伯賽大，你慘 à！因為 tī lín 中間所行 ê 神跡，若行 tī 推羅 kah 西頓，in 早 to̍h 穿麻衫 sám 火灰來悔改。
無論是比較這兩所在 ê 經文或是其他經文，確實，就親像林長老所主張，巴克禮只用「反悔」，無「悔改」；但是，若根據巴克禮佇《台灣教會公報》所寫 ê 文章，咱會發現巴克禮毋是毋 chai「悔改」這個詞，毋是伊對這兩個詞 ê 差別分袂清，也毋是伊認為會通用「反悔」代替「悔改」；反轉，巴克禮是有意識用「反悔」，是 thiâu-kang 無欲用「悔改」這個今日基督徒常常提起 ê 詞。譬如 1893 年 3 月，巴克禮對英國轉來到台灣了後，佇《台灣教會公報》（第 95 期，光緒 19 年 2 月）寫批請安台灣 ê 教會，講起伊佇英國向英國 ê 基督徒報告台南 ê 代誌：
In 第一愛聽 ê，是愛聽我干證 lín 濟濟人有誠實反悔罪，靠救主，改前 ê 病來變做好人。親像前有人吃鴉片、搏筊，行各項 ê 壞，kiám-chhái 本來欲改，卻改袂掉，到聽見救主福音有信伊 ê 名改各項 ê 彼號 ê 壞，來行好──這號 ê 消息算是 siāng 好聽，hō͘ 人知基督 ê 福音到逐所在，猶原是上帝 ê 權能來救人（羅馬書 1 章 16 節），也知人來 chia 傳不是空空 tio̍h-bôa。
閣譬如巴克禮晚年 ê 講道，《台灣教會公報》517 期（1932 年 10 月）：
……入（基督）教 ê 條件，毋是 khu-chip 佇行好，是在佇悔罪信基督，這才是 siāng 要緊 ê。佇 chia 愛注意，就是愛反悔、認罪，毋是反悔、改變；因為若無信基督來互罪得赦，怎樣會改變？人較常 ê 情況是袂變；所以才會虧欠基督 ê 恩惠。Án-ni，愛會得救，第一要緊 ê，毋是行好，是反悔信基督就夠。……愛得救 ê 第二要件，就是當行好。怎麼會行好？因為基督已經救贖基督徒，所以基督徒才會行好。比論來說，某人有病症，咱豈叫伊著家己醫好，才去互醫生打點嗎？豈毋是醫生打點伊，伊才會好，若 án-ni，伊才會勇健；就親像是 án-ni，人必須愛先互基督救贖，才會行好。Án-ni，咱毋免失望講咱袂行好……
巴克禮將新約聖經翻譯做白話字是 1913 年到 1914 年（1916 年印刷出版）；舊約翻譯做白話字是 1927 年到 1930 年（1933 年印刷出版），對照頂面 ê 請安批 kah 講道，會發現巴克禮佇這 40 年中間 ê 神學思考、對人 ê 想法 lóng 一致：人愛反悔，不過，人常常袂因為反悔來改變，因為人本性難移，困難改變；人反悔了後必須信耶穌，才會改變。巴克禮毋將「悔」「改」這兩字連做伙，堅持順序必須是「悔」「認罪信耶穌」才會「改」，不可將「信耶穌」跳過。甚至咱也通講，巴克禮是根據伊 ê 神學思考 kah 對人性 ê 認識來翻譯聖經，所以將 μετανοέω 翻譯做「反悔」。盼望這款說明，通約略解答為怎樣巴克禮 ê 白話字聖經有「反悔」無「悔改」。
