台灣小夢獸

文圖:林益彰

1. 許石阿公 ê 音樂篋仔

阮將冊本掀起來
內底有甜甜 ê 音樂
有靜靜 ê 音樂
有幼幼 ê 音樂
彼是毋是許石阿公 ê 聲

阮將冊本掀起來
音樂咧拋輾斗
冊本也咧拋捙輪
阮也綴咧拋麒麟

許石阿公 ê 音樂篋仔
一直咧咇噗跳
叫冊本牽阮幼幼 ê 手
綴音樂咧踅玲瑯
歡歡喜喜 ê 踅玲瑯

 

2.台灣文學館咧眠夢

有一本冊欲罩衫
有兩本冊欲穿褲
有三本冊欲穿鞋
做伙相招行入
文學館 ê 身軀內

有一本冊想欲跳舞
有兩本冊想欲𨑨迌
有三本冊想欲變鬼變怪
做伙相招行入去
文學館 ê 眠夢內

台灣文學館咧眠夢
伊夢著冊本變做枕頭
伊夢著冊本變做紅毛塗
伊夢著有一本冊佮兩本冊
牽著三本冊 ê 手
做伙相招台南 ê 冊
慢慢起出台灣文學館 ê
夢夢厝

 

3.台南是一尾魚

台南是一尾魚
一尾大大 ê 魚
一尾幼幼 ê 魚

台南是一尾魚
伊有海翁仔 ê 翼股
伊有劍獅 ê 面模
伊有鹽田 ê 色水
伊有紅樹林 ê 跤佮手
也有媽祖婆
伊溫溫柔柔 ê 目睭

台南是一尾魚
佇軟㽎㽎 ê 塗沙
泅過來,泅過去
泅過鳳凰木
泅過水閹雞
泅過蝴蝶蘭
慢慢仔佇臺南
泅出空色 ê
綿綿軟㽎㽎 ê 塗沙

台南是一尾魚
大大 ê 魚,幼幼 ê 魚
大魚 ê 身軀內
有軟軟綿綿 ê 雲
有甜甜媠媠 ê 番薯
有愛𨑨迌 ê 烏面抐桮
有愛哭愛吼 ê 苦楝舅
做伙佮臺南 ê 魚咧
泅過來,泅過去

台南是一尾魚
一尾大大 ê 魚
一尾幼幼 ê 魚
伊親像安平劍獅的面
雖罔歹看面
卻有一粒親像媽祖婆
伊溫溫柔柔 ê 心

 

4.愛𨑨迌 ê 河樂廣場

泅過來,泅過去
阮是一尾魚
一尾佇臺南快樂 ê 魚

行過來,行過去
阮是一蕊雲
一蕊佇台南
微微仔笑 ê 雲

走過來,走過去
阮是一隻獅仔
一隻佇安平 ê 獅仔王
逐工攏笑文文 ê
獅仔王

快樂 ê 魚
快樂樂樂
微微仔笑 ê 雲
微微仔笑
文文仔 ê 獅仔王
文文仔笑

一尾魚佮一蕊雲
牽著一隻獅仔
相招做伙行去河樂
快快樂樂 ê
泅過來,泅過去
行過來,行過去
走過來,走過去

廣告/聖經充滿我-經文填充本

我有話要說