◎林佩蓉（國立台灣文學館副研究員）
要記得那些坐牢的人，好像你們也跟他們一起坐牢。要記得那些在患難中的人，好像你們也在患難中一樣。（希伯來書13章3節，現代中文譯本修訂版）
台灣努力爭取「聯合國教科文組織」（UNESCO）的「世界記憶計畫」，已是行之有年的事，但由於台灣國家地位未定論之故，在世界上仍無法以一個獨立國之名爭取該項計畫。因此，由文化部文化資產局推動「台灣世界記憶國家名錄」徵選計畫，企圖與世界接軌。
從1992年聯合國教科文組織頒布「世界記憶計畫」後，全世界的文獻遺產，逐漸被召喚其生命與價值。當我們閱讀被收錄的國家及物件，可發現多半與極權統治、人權、社會公平正義的議題相關。戰爭與動亂不只造成資源短缺，更破壞地球上每個區域、國家的歷史建築與收藏。無情的砲火軍事侵略、人為的掠奪、毀損，就極有可能全然摧毀千百年的歷史與價值。而台灣在歷經荷、西、明鄭、清國、日本及因戰敗撤退移居的國民黨政府，被多層殖民與破壞後，許多宗教信仰、日常生活、文化觀念等，不斷被「教化」、改變，從而成為混雜的樣態。在經過台灣當代知識建制後，重新反思、整理並嘗試復歸過往的經歷，屬於台灣人徹底生存過的痕跡究竟是什麼？事實上，人權、教育、醫療等，都在台灣的歷史裡留下重要的記號，而這些也是全世界的共同記憶。
政府所推動的「台灣世界記憶國家名錄」徵選中，台灣基督長老教會的白話字歷史獲選，在2020年公布的第二階段中，擁有可觀的數量，吸引國人注意，相信在持續的推廣過程中，能讓更多人認識到這段超過150年的台灣史，並且嘗試存放在自己的記憶裡，由此自我認知、掌握身為台灣人的特色以及可與世界各國相應的節點。
台灣正在世界記憶裡！透過這次由長老教會相關機構及國立台灣文學館的提報收錄，我們再次看見宣教師的腳蹤，表面上是人為的教育、醫療工作，但這些美好腳蹤能夠歷經百年，保存至今，足以讓我們體認，這是上帝讓我們在他人生命裡，看見足以幫助我們更多、更好的了解與疼惜相關的所有見證。
誠如希伯來書12章1節所說：「既然我們有這麼多見證人，像雲彩一樣圍繞著我們，就應該排除一切的障礙和跟我們糾纏不休的罪，堅忍地奔跑我們前面的路程。」讓我們共同努力，使台灣繼續為世界留下美好的記憶！
台灣話 ê 天兵天將：Pe̍h-ōe-jī
介紹國立台灣文學館館藏 Pe̍h-ōe-jī 文物
◎Chiu Tēng-pang（國立台灣文學館助理研究員） 圖片提供／國立台灣文學館
Pe̍h-ōe-jī 是台灣經歷19世紀來 hiah 複雜 ê 世界殖民史、在地文學史 ê 重要見證。Chit 套 kō͘ La-teng（拉丁）字母書寫當地語言 ê 文字系統，tī 1865年 hō͘ 英國長老教會 ê 宣教師馬雅各（James Laidlaw Maxwell）引進入來台灣，liáu，1875年起巴克禮（Thomas Barclay）牧師 tī 台灣 mî-nōa chhui-sak，kàu 1885年 i 創立用 Pe̍h-ōe-jī 書寫 ê 機關刊物 TÂI-OÂN-HÚ-SIÂN KÀU-HŌE-PÒ（《台灣府城教會報》）liáu-āu，ta̍k-ê chiah khah 普遍使用 Pe̍h-ōe-jī。
Chhím-thâu，Pe̍h-ōe-jī kan-na tī 基督教會 ê 信徒–lìn leh 流通，用來寫聖經、聖詩、報紙、雜誌，só͘-tì，產生 bē-chió Pe̍h-ōe-jī ê 文學作品。Lo̍h-bóe koh hŏng 傳播去教會外口，1923年台灣文化協會決議 beh 展大 chhui-sak，hit 時蔡培火 koh 創立台灣 Pe̍h-ōe-jī 研究會，koh 霧峰林獻堂家族 ê 大力 chhui-sak，hō͘ Pe̍h-ōe-jī ê 影響進入世俗大眾。Kàu chia，台灣人已經 kā Pe̍h-ōe-jī 在地化，koh 利用 i ê 優點引進科學、文明 ê 新知識，kā 台灣 kap 國際接做伙，khui-hong 一般人用 ka-tī ê 語言自由書寫 ê 知識民主化 ê 歷程，kàu-taⁿ Pe̍h-ōe-jī iáu 是台語文學作家主要 ê 書寫文字。
Hiān-chhú-sî，大部分 ê Pe̍h-ōe-jī 文獻 lóng tī lán 台灣，chiâⁿ-chò 台灣珍貴 ê 文化資產。Ah Pe̍h-ōe-jī 文獻大部分 lóng 收 tī 國立台灣文學館，chia 館藏 ê Pe̍h-ōe-jī 文學 kiau 相關 ê 文物，年代 siōng 早 ê 是1926年，siōng-òaⁿ ê 是1977年，是文學館 tī 2001年起 kō͘ 3、4 冬 chiah 收集整理 hó-sè，文物 ê 類型有：圖書、期刊、手稿、phoe 信。Ē-té lán tio̍h 來 kā ta̍k-ê 介紹 chiah-ê 文物。
基督教文書
包含聖經、聖詩、佈道集、主日學教材、故事、教會典禮、兒童講道集、期刊等。
早期 ê 基督教文書 choân-lóng ùi 英文翻譯做漢文，chiah-koh ùi 漢文翻譯做Pe̍h-ōe-jī ，chhin-chhiūⁿ 德國宣教師Hoa Chi-an（花之安，Ernst Faber） tī 1879年 tù，1930年台南新樓書房出版 ê BÊNG-SIM-TÔ͘（《明心圖》）。Koh chhiūⁿ 何希仁牧師 tī 1913年，ùi 漢文翻譯做 Pe̍h-ōe-jī ê Pi̍t Siâ Kui Chèng（《闢邪歸正》），kiau 1914年聚珍堂出版 ê BIĀU-CHIOK BŪN-TAP（《廟祝問答》）。Chit 類 ê 文書主要 the̍h 來做佈道 ê lō͘-ēng。
Lia̍h-gōa，mā 有 kúi-nā 本 kā 中國古典經文註解做台語 Pe̍h-ōe-jī ê 冊，chhiūⁿ 1916年閩南聖教書局發售，廈門萃經堂代印 ê LÎ-LÔ͘ （《離婁》），冊名是 ùi「孟子曰：離婁之明公輸子之巧」來 ê，kui 本冊 lóng 是 kā 孟子 ê 言論 ùi 文言文翻譯做白話，chiah-koh kā 註解。Koh-ū 劉青雲 tù，昭和16年出版 ê Tāi-ha̍k Cheng-siông（《大學精詳》），chit 本冊有音讀、註釋、和譯、福譯，i seng kā 漢字注文言音，chiah-koh 做中文、日文、台語文三種註釋。
Kap 兒童有 khan-kha̍p ê 教材有1959年台灣宣道社出版 ê PEH-ŌE-JĪ THOK-PÚN（《白話字讀本》），chit 本冊 kō͘ 簡單 ê Pe̍h-ōe-jī 來編寫適合兒童閱讀 ê 教材，內容包含 o-ló 台灣地理 ê 歌頌 kap 台灣諺語 kiau 孟母三遷 ê 故事。Koh 有1955年教會公報社出版，羅福生姑娘（Miss Ruth Nowack）編輯，翻譯做台語 ê SAN-KAP BAT JĪ BAT TŌ-LÍ（《共同識字識道理》），hām 1960年陳光輝 tù ê JÎ-TÔNG KÁNG-TŌ CHIP（《兒童講道集》），lóng 是針對兒童信仰教育 ê 教材。
台灣文學館典藏的 Pe̍h-ōe-jī 史料 siōng chē ê 是期刊，lāi-té，嘉義宣道社 tī 1950年代發行 ê 刊物數量 khah chiâu-chn̂g。主要 ê 刊物有：1954年6月創刊 ê Oa̍h-miā ê Bí-niû（《活命的米糧》）、1958年3月創刊 ê Ka-têng ê Pêng-iú（《家庭的朋友》）、1957年11月創刊 ê KI-TOK-KÀU KÀU-IOK（《基督教教育》），kap 1960年1月創刊 ê Lú-soan Goe̍h-khan（《女宣月刊》）等，chiah-ê 刊物 khioh-khí 提供信徒 tī 信仰生活 téng-thâu ê 幫贊 lia̍h-gōa，mā 對家庭經營、身體保健提供實用 te̍k ê 教導。另外，iā 典藏1977年5月創刊 ê 戰後台語文學運動重要刊物TÂI-OÂN GÚ-BÛN GOEH-PÒ （《台灣語文月報》）。
語言類 ê 文書
語言類 ê 文書主要是字典、語言教材 hām 課本。
Chit 批 Pe̍h-ōe-jī 文物 lāi-té，字典有1933年出版，甘為霖（William Campbell）tù ê《廈門音新字典》。教材 chit-pêng 有1930年 tī 廈門鼓浪嶼出版，H.P. De Pree kiau K.G. Chiu做伙編輯 ê 廈門話教材Lessons in the Amoy Vernacular。廈門話 ê 羅馬字 m̄-nā ē-tàng 記錄廈門話，mā ē-tàng 簡單了解漳州人 hām 泉州人 ê 語言，chiah 來制定 chit 本語言教材。Kui 本冊 lóng-chóng 有40課，分別 ùi「宗教」、「教育」、「音樂」、「商業」、「公務 hām 政治用語」、「家務」、「地理」、「專有名詞」chia-ê 領域 ê 辭彙來做英文 kap Pe̍h-ōe-jī ê 對照，koh 制定索引。Chit 本冊對早期閩南話辭彙 ê 比較研究有重要 ê 參考價值。
文學作品
包含傳記、劇本、小說、散文 kap 翻譯文學。
文學作品 lāi-té，頭一項 beh 介紹1925年出版，chit-chūn 已經 hŏng 列入國家重要古物，蔡培火所 tú ê CHAP-HĀNG KOÁN-KIÀN（《十項管見》），內容主要欲啟發台灣人意識，kap 新文明 ê 輸入、大眾文化 ê 提升，i「台灣是台灣人 ê 台灣」ê 主張，是台灣民族運動–lìn 極重要 ê 中心思想。Koh i ê 論述有 chiâⁿ 先進 ê 人生觀、社會觀 kiau 文明觀，對台灣人 kap 台灣 ê 特殊性有全面 koh 深入 ê 論述，ē-tàng 表現台灣 ê 族群 kap 文化特色。
Koh-ū 廉德烈（A.B. Nielson）hâm Tân Iân-lêng kā 1927年出版，英國楊格非（Griffith John）原 tù ê THIAN-LŌ͘ CHÍ-BÊNG（《天路指明》），ùi 漢文翻譯做台語 Pe̍h-ōe-jī ê 作品。Chit 批文物 lāi-té 年代 siōng 早 ê 文學是Hagu Ter-Phiⁿ e Siaur-soat（廈語短篇小說），chit 本冊是鼓浪嶼「廈語社」tī 1924年出版 ê，內面刊 nn̄g 篇文學作品：一篇是露西亞詩人Eroshenko ê 作品 ê 翻譯 GÓA HAK-HĀU SENG- OAH Ê CHIT TOĀN-PHIÀN（《我學校生活的一段片》），另外一篇是 Tiuⁿ Chò-eng 所tù ê CHIIⁿ NIIU CHU SUTT（《錢娘自述》）。
Kàu kah 戰後初期，文學作品有台灣教會公報社 tī 1949年出版，kā 班揚（John Bunyan）原作翻譯做 Pe̍h-ōe-jī ê THIAN-LŌ͘ LEK-THÊNG（《天路歷程》）。Koh 有台灣宣道社 tī 1956年出版 ê TIAN-LŌ͘ CHÍ-LÂM（《天路指南》）kiau 台灣宣道社 tī 1955年出版，G.M.Alexander 原作，王守勇翻譯 ê JIT CHHUT TĪ SO͘-KEK-LÂN（《日出蘇格蘭》），chiah-ê 歐洲基督教文學經典作品 ê 台語Pe̍h-ōe-jī 版本。
傳記 chit-pêng 有台灣宣道社 tī 1955年出版，楊石麟編譯 ê BÚ-TÌ Ê TOĀN-KÌ（《武知的傳記》）。Koh 有蘇造榮 tù，賴仁聲翻譯，1960年台灣宣道社出版，內容 leh 介紹中國宣教師宋尚節博士一生 ê 事蹟 ê SIŌNG-TÈ Ê LÔ͘-POK SÒNG SIŌNG-CHIAT PHOK-SŪ（《上帝的奴僕宋尚節博士》）。
劇本 chit-pêng 有 kō͘ 聖經故事做底去改編 ê SÈNG-KEK（聖劇）第三集，作者是黃懷恩，chit 本作品 lāi-té 有〈浪子回頭〉kap〈刺中花〉hit 兩齣戲 ê 劇本，1958年出版。Lia̍h-gōa，koh 有林茂生 tú，1925年台南新樓書房出版 ê LŌ͘-TEK KÁI-KÀU Le̍k-sú Hì（《路德改教歷史戲》）。
小說 chit-thâu 有出版 siōng-chē Pe̍h-ōe-jī 小說 ê 作家 Lōa Jîn-seng（賴仁聲）ê 作品：THIÀN LÍ IÂN KUÈ THONG SÈ-KAN（《疼你贏過通世間》）。Che 是1955年台灣宣道社出版，lāi-té 有5篇短篇小說，頭一篇是 Éng-oán Tī-teh Jî-chhiáⁿ Chòe Úi-tāi–ê，chit 篇 ê 內容是 leh 批判 hiàng-sî ê 少年人，講 in kā 戀愛看做是 kiàn-siàu ê 保守 ê 愛情觀；第二篇號做 Hia̍p-le̍k Hōng-hiàn，內容是 leh khau-sé 宗教信仰 ê 人虛假 ê 虔誠表象；koh 來 chit 篇是：M-sī Siáu-soat，i ê 主題 leh 敘述不幸淪落煙花界 ê 弱勢女子，藉 ka-tī 堅定 ê 信仰，hō͘ 身體 kap 精神 lóng 得 tio̍h 救贖 ê 故事；第四篇號做 Kā Góa Chhut-khì，leh 講迷失自我 ê 青年，犯罪入獄所致，前程烏暗，lo̍h-bóe chhōe tio̍h 信仰，têng koh 得 tio̍h 新 sìⁿ-miā ê 故事；尾手 chit 篇是 Thiàⁿ Lí Iâⁿ-kòe Thong Sè-kan，內容 leh 論男女相知相惜之情，koh phì-lūn 人類最高境界 ê 愛是對上帝 ê 愛。
Lia̍h-gōa，賴仁聲 koh 有 chi̍t-phō chiâⁿ 有名，1960年台灣教會公報社出版 ê Pe̍h-ōe-jī 小說作品KHÓ-ÀI Ê SIÛ-JÎN（《可愛的仇人》），mā tī chit 批文物–lìn，hō͘ chit 批文物 ke 真價值。
教會史類文書
主要是教會歷史、地方教會週年紀念史、牧師紀念輯。內容有歐洲 ê 教會史、台灣 ê 教會史 kap 地方教會史。
Chit 批文物 lāi-té chhiūⁿ 1925年台南新樓書房出版 ê KÀU-HŌE KUI-CHÈNG Ê LEK-SÚ（《教會歸正的歷史》），內容 leh 講歐洲歸正教會 ê 發展，kap 路德馬丁 ê 宗教改革運動，hām 瑞士、英國、加拿大、美國、蘇格蘭歸正教會 ê 歷史。
台灣教會史 chit-pêng 有黃武東 tù，1954年2月21日台灣教會公報社出版 ê《台灣宣教》。Chit 本冊計共有五章，起頭先介紹17世紀荷蘭 kap 西班牙 tī 台灣 ê 宣教，koh 有19世紀英國長老教會傳道會來台灣傳教 ê 過程，mā 有講 tio̍h 戰後宣教 ê 歷史、宣教 ê 阻礙 kiau 傳道 ê 方針，是一本完整論述台灣基督教發展史 ê 歷史冊。
地方教會史有楊士養 tù 1953年出版 ê LÂM TÂI KÀU-HŌE SÚ（《南台教會史》）。Chit 本冊是台灣基督長老教會 tī 1952年成立歷史部 liáu-āu，開始進行歷史回顧 kap 書寫 ê 成果，主要 leh 講南部教會 ê 歷史。Lia̍h-gōa koh 有一本1955年台灣教會公報社出版 ê PHÊN-Ô͘ SOAN-TŌ 70 CHIU-NÎ KÌ-LIĀM KIÀN-CHÈNG CHI̍P（《澎湖宣道70週年紀念見證集》）。Chit 本冊 khioh-khí 記錄基督教去 kàu 澎湖 ê 歷史 lia̍h-gōa，mā 詳細 leh 描述澎湖 ê 地理、人文、風俗，對戰後初期 ê 澎湖研究 kap 地方教會史 ê 研究 lóng 有所幫贊。
科學類 ê 文書
包含現代醫學教科書、數學、地理等等。
台灣人 ùi 教會引進 Pe̍h-ōe-jī，koh 利用 Pe̍h-ōe-jī ê 優點，kā 現代科學、新文明、新知識 chhōa 入來台灣，hō͘ 台灣人 chiâⁿ-chò 進步 ê 現代人，só͘-tì，Pe̍h-ōe-jī khioh-khí hŏng the̍h 來用 tī 基督教文書 ê 傳播 lia̍h-gōa，mā 普遍運用 tī ta̍k 項專業 ê 領域，chhiūⁿ 文學、數學、醫學、地理等等。
Tī chit 批 Pe̍h-ōe-jī 文物 lāi-té lán 台灣文學館有典藏 chi̍t-phō 醫學 ê 經典冊，tio̍h 是一世人奉獻 leh 做台灣 thái-ko 病 ê 醫療，創立樂生療養院 ê 前身「樂山園」ê 加拿大醫師戴仁壽（George Gushue-Taylor）tú，1917年新樓書房出版 ê LĀI GŌA KHO KHÀN-HŌ͘-HAK（《內外科看護學》）。Chit 本是 Pe̍h-ōe-jī ê 醫學教科書，lóng-chóng 有675頁，內容包含小兒科、婦產科、急診醫學、精神衛生、解剖學……，chiâⁿ 珍貴。
Khioh-khí 醫學冊，文學館 koh 有典藏一本真寶貴 ê 數學冊，tio̍h 是1900年出版，倪為霖（William Macgregor）tú ê Pit-soàn ê Chho͘-ha̍k Tē-jī pún（《筆算 ê 初學第二本》）。
Ùi téng-koân ê 介紹，lán ē-tàng 體會 Pe̍h-ōe-jī ê 發展 tī 台灣是一項真 chhàu-tú-khám ê tāi-chì，m̄-koh soah 深刻記錄19世紀後期 kàu-taⁿ，無 kāng 國家 ê 歷史 kau-tîⁿ，i kha-chiah-āu hia 複雜、深沉 ê 意義，tiāⁿ-tio̍h m̄-sī kan-na 一套拼音文字系統、一批書寫文件 án-ne niā-niā，i mā 是 koh 活 leh soah kiōng-beh 滅絕 ê 語言 ê 書寫系統，iā 是世界殖民史「接觸地帶」ê 一个特殊案例，koh-khah 是台灣史「語言解放」ê 特殊案例，siōng 重要 ê i 是台灣史–lìn「政治 ah-pà 語言」的 kan-chèng。
Pe̍h-ōe-jī 有 chiah-nih 重要 ê 台灣文學史 ê 意義，台灣文學館 khiā tī chhui-sak 台灣文學 ê 立場，kā chia 珍貴 ê 文獻 the̍h 去參加文化部 ê「台灣世界記憶國家名錄」登錄徵選，目的 tō 是 beh hō͘ 台灣社會大眾知影 lán 文化 ê 寶，chit-má 徵選已經通過，chit 批 Pe̍h-ōe-jī 文物 chiâⁿ-chò 文學館頭一批 hō͘「台灣世界記憶國家名錄」登錄 ê 珍貴文物，當然 ài hō͘ koh-khah-chē 人了解 lán ka-tī ê 文化、語言、文學、歷史，só͘-tì，lán 台灣文學館 phah-sǹg beh tī 今年11月初10開始 kàu 明年2月21，kō͘ chiah-ê 文物來 kap 台灣基督長老教會合作，做伙來舉辦書展、講座，ǹg-bāng hō͘ lán ê 文化 koh-chài tī lán ê 土地 sì-kè seⁿ-thòaⁿ。
