偉大 ê 母愛

33

林俊仰

(請安裝Taigi Unicode字形,配合Firefox瀏覽器可閱讀)

佇我教冊十外冬的歲月中間,接觸過真濟爸母,毋過佇遐爾濟的家長中予我記憶上深的是楊女士,一个有兩位特殊教育囡仔的母親。

楊女士的兩位囡仔是自閉症的學生,一个是30歲的查埔囝──澤澤,另外是12歲的查某囝──庭庭。每日一透早伊就先愛載澤澤去庇護中心安置,紲落就愛隨轉去厝接庭庭到學校上課。有閒的時陣就引一寡仔臨時工來做,趁淡薄仔所費分擔家用。雖然講怹經濟狀況毋是蓋好,毋過伊對囡仔是足用心,對班上其他的囡仔嘛是足照顧,定定會攢一寡仔餅請逐个食。

雖然怹日子毋是蓋冗剩,嘛定愛走傱囡仔的代誌,不而過楊女士個性樂觀,不時面帶笑容,為人客氣,時常關心班上包括老師佮家長在內的所有人,嘛定定主動參加學校的活動,提供閣分享別个家長教囝的經驗佮建議,確實予逐个呵咾伊是阮的模範。

養育身心障礙子女的鹹酸苦汫毋是平常人會使體會。毋捌楊女士的人可能會替伊感覺真毋甘,但是伊定咧講這兩个囡仔是天公伯仔送予伊的禮物,嘛是怹兜的心肝仔寶貝,愛用愛心佮耐心共怹疼痛。經過誠濟冬辛苦扶養,這兩位囡仔沓沓仔平安大漢矣!予逐个見識著楊女士母愛的偉大。

楊女士是誠堅強的女性,嘛是足偉大的媽媽。向望怹規家伙仔會當健康快樂,一切困難會當順序順序。

 

Tī góa kà-chheh cha̍p-gōa-tang ê sòe-goa̍t tiong-kan, chiap-chhiok kòe chin-chē pē-bú. M̄ -koh tī hiah-nī chē ê ka-tiúⁿ tiong hō͘ góa kì-ek siōng-chhim ê sī Iûⁿ lú-sū, cht ê ū nn̄g-ūi te̍k-sû kàu-io̍k gín-á ê bú-chhin.

Iûⁿ lú-sū ê nn̄g-ūi gín-á lóng sī chū-pì-chèng ê ha̍k-seng, cht-ê sī 30 hòe ê cha-po͘-kiáⁿ Tek-tek, lēng-gōa sī 12 hòe ê cha-bó͘-kiáⁿ Têng-têng. Múi-jt cht-thàu-chá i tō ài tāi-seng chài Tek-tek khì pì-hō͘ tiong-sim an-tì, sòa–loh tō-ài sûi tńg-khì chhù chiap Têng-têng kàu ha̍k-hāu siōng-khò. Ū-êng ê sî-chūn tiō ín cht-kóa-á lîm-sî kang lâi chò, thàn tām-po̍h-á só͘-hùi hun-tam ka-iōng. Sui-jiân-kóng in keng-chè chōng-hóng  sī kài-hó, -koh i tùi gín-á sī chiok iōng-sim, tùi pan-siōng kî-thaⁿ ê gín-á mā sī chiok chiàu-kò͘, tiāⁿ-tiāⁿ ē chhoân cht-kóa-á piáⁿ chhiáⁿ ta̍k-ê chia̍h.

Sui-jiân in jt-chí  sī kài liōng-siōng, mā tiāⁿ ài cháu-chông gín-á ê tāi-chì, put-jî-kò Iûⁿ lú-sū kò-sèng lo̍k-koan, put-sî bīn tài chhiò-iông, ûi jîn kheh-khì, sî-siông koan-sim pan-siōng pau-koat lāu-su kap ka-tiúⁿ chāi-lāi só͘-ū ê lâng, mā tiāⁿ-tiāⁿ chú-tōng chham-ka ha̍k-hāu ê oa̍h-tāng, thê-kiong koh hun-hióng pa̍t-ê ka-tiúⁿ kà-kiáⁿ ê keng-giām kap kiàn-gī, khak-st hō͘ ta̍k-ê o-ló i sī gún-ê bô͘-hoān.

Ióng-io̍k sin-sim chiòng-gāi chú-lú ê kiâm-sng-khó͘-chiáⁿ  sī pêng-siông lâng ē-sái thé-hōe. M̄ -bat Iûⁿ lú-sū ê lâng khó-lêng ē thè i kám-kak chin -kam, tān-sī i tiāⁿ-leh-kóng chit nn̄g-ê gín-á sī thiⁿ-kong-peh–á sàng hō͘ i ê lé-bu̍t, mā-sī in-tau ê sim-koaⁿ-á pó-pòe, ài iōng ài-sim kap nāi-sim kā in thiàⁿ-thàng. Keng-kòe chiaⁿ-chē tang sin-khó͘ hû-ióng, chit nn̄g-ê gín-á tau̍h-tau̍h-á pêng-an tōa–hàn-ah! Hō͘ ta̍k-ê kiàn-sek tio̍h Iûⁿ lú-sū bó-ài ê úi-tāi.

Iûⁿ lú-sū sī chiâⁿ kian-kiông ê lú-sèng, mā sī chiok úi-tāi ê ma-ma. Ǹg-bāng in kui-ke-hóe-á ē-tàng kiān-khong khoài-lo̍k, it-chhè khùn-lân lóng ē-tàng sūn-sī-sūn-sī.

 

 

我有話要說