(請安裝Taigi Unicode字形，配合Firefox瀏覽器可閱讀)
作者：歹銅舊錫
He 無 ta-ôa ê 聲嗽
沓沓仔 tòe 風 tiāⁿ–去
Che 是第幾 pái tī 熱人 kap lín 面會
熱–人探無路
Hit 年開 ê 小路已經無塊看
Am-po͘-chê chhih-chhuh 敢是責備 iah 是久無見 leh 思念
行入去 ōm-ōm ê 樹林怎會是欲 chhiau-chhōe
拍無去真久 ê 靈魂
Lín 石碑頂孤一無二 ê 痕跡敢會堪時間 ê 消磨
是咱真熟似流浪 ê 滋味？抑是無站無節 ê 數念
予咱一冬閣一冬 saⁿ 見
菅芒搖 hàiⁿ
一句一句 kā 無人知影 ê 往過
綴風 ê 節奏，照天色變化 ê 深淺
沓沓仔放送
Kā 記持 tò͘ kah 烏白
一直抽 koân ê 記持
Kā 看袂清 ê 生張
換做心肝頭 ê 向望
我毋是詩人，欲刁意故弄一下仔文學手路
這是替 lín 寫 ê 狀書
是無張無持 seh 來 chia ê 風
偷偷仔 tháu 一个喟，予我聽–著害我綴 leh 怨慼
毋是氣苦 án-chóaⁿ kā só͘-ū oaiⁿ-chhoa̍h ê tāi-chì
chhiâu chiàⁿ.
La̍k-la̍k-chhoah ê 筆尖是為吞忍世人 ê 不目
Kap thiàⁿ-thàng lín 一世人 hŏng am-khàm ê 罪名
歷史 ê 鏡頭掠倒退一下
Ùi che pha-hng 無人行踏 ê 所在
Chhiâu-chhek tńg 去 che 無 ta-ôa ê 歷史
請 -thang 號做我欲咒 chhàm che 無臭無 siâu ê 歹字運
我 kan-taⁿ 欲 kā lín 堅凍起來等待世間人欲論證彼一工
請據在我放予虛構佇 chia 起 khián
請據在予 hiong-kông ê 思念起起落落
Chim-chiok 時間 liô 出來 ê 血逝
用 lín ê 血汗目屎做主題 ê 歌詩
顧人怨 ê 敘事觀點
閣欲 kā 故事 liù 一 pái koh 一擺
Ká-sú lín ê 血無 a̍k 落去這个土地
面對獨裁 ê 覺醒是比有做人 ê 尊嚴 koh-khah 大 ê 笑詼
Lín ê chheh-khùi 一陣一陣 poa̍h 落去阮 ê 心肝 khut-á
自由 ê 靈魂無通行入歷史 ê 鏡頭
向望天光 ê 目神 gāng-gāng
毋甘看 thàng lín 無 bô-lám-bô-nē ê 回應
咱 ê 目屎 chôaⁿ-á 據在佇 bâ-bū-kng 散–去
目睭金金看正義 hŏng 刣價
毋敢向望永過 ê 驚惶 gàn 做民主 ê 堅持
干焦遺留等待補 thīⁿ ê 空喙
Tòe chhàng-chhiū ê 菅芒 hàiⁿ 來 hàiⁿ 去
Haiⁿ-chhan ê 聲 kám 有影無法度 thàng 去後一代？
抑是成做一个閣一个無頭無尾 têng-têng-tâⁿ-tâⁿ ê 情節
這悲劇 kap 世間人無干礙！
準講這是有字有名 ê 人證
準講 lín 毋是 in 叔伯兄弟姊妹
Lín mā lóng 注定成做無人致意 ê 坱埃
啥人聽著 lín 靈魂孤 khut ê 聲嗽
啥人想著 lín 失去一个閣一个 ê 春天
Lín kā 我叮 -thang iáu-bōe 天光 tō 收筆
散掖掖 ê 草稿 bih-藏我空思夢想 ê 向望
目屎滴落去 tò͘ 紅拄寫好 ê 詩逝
無彩工使弄修辭來感動失去記持 ê 人
透中晝風倒絞天頂 ê 雲尪
據在無情 ê 銃聲穿 thàng lín 目 chiu 仁內 ê 驚惶
無細膩綴 lìn 身軀頂 nah-o ê 銃空跋落去
Ná 暗唸 lín ê 名字
指頭 á 巡石碑 ná 畫
Hō͘ 記持行入去據在伊沓沓仔坐清
Koh 驚 lín ài 我對 lín 無人致意 ê 死亡 kap 恐嚇做一个公道
Chhak 目 ê 日頭裂開 lín 當拄 puh-íⁿ ê 青春
唸 lín ê 名 kā 目屎 ùi 死冷 ê 大理石 pit-sûn 縫
Tèⁿ–出-來
我雄雄分袂清歷史 ê 方向
菅芒白白白 ná 海
搖搖 hàiⁿ-hiàⁿ 目 nih 看無著 lín
我應該用上 kài gia̍t ê 腔口
虛構 che 死無人哭 ê 歷史
佇咱後一 kái 會面進前
註：苗栗二二八紀念公園是受害者胡海基捐地佇頭屋鄉孔子廟邊起一个白色恐怖殉難者慰靈碑，頂頭有刻幾千名受難者名姓。苗栗縣政府佇2007年規劃做「台灣民主英烈祠」，成做公園欲予人追念。Siáng 知欠缺管理，lóng 總 pha-hng 去，無人相借問。
