作者：陳金順
咱 ê 歷史，雨總是落袂離……。
春日尾，揀一个禮拜晝，踮南門公園樹蔭跤，展開《南瀛二二八誌》（凃叔君著），一字一句讀遐 ê 那遠那近 ê 人物誌。頭一位就是小說〈天良〉ê 主角湯德章。
紲落，兩月日來。《嘉義驛前二二八》《諸羅山城二二八》《嘉雲平野二二八》《臺北南港二二八》《臺北都會二二八》《淡水河域二二八》《悲情車站二二八》這七本口述歷史，予我楦闊家己 ê 視野。
張炎憲（1947～2014）教授，佇二十外冬前，chhōa 領胡慧玲、高淑媛、王昭文、黎中光……遮 ê 團隊成員，南北二路一步一跤印走揣受難者佮家屬，面對面、真拄真田野調查，記錄過了時袂煞了代 ê「二二八口述歷史」。
1947 年 3 月初 10，張炎憲出世佇嘉義中埔做穡人厝裡，1966 年入學台大歷史系。出業了後，踏佇台灣土地綿死綿爛研究台灣史，註該伊這世人佮二二八 ê 深緣。
目屎、吐氣、酸苦、無奈……成做一幅閣一幅悲傷 ê 形圖，我咧讀這 2400 外頁 ê 血字，相 siāng 摻濫目屎、吐氣、酸苦、無奈…… ê 心緒。
73 冬來，天袂齊光，理袂齊徹。
二二八，當該然有濟濟無仝 ê 樣相佮觀點。
官廳、民間，反亂、抗暴、無辜……。
3 月初 8，軍隊佇基隆登陸了後，並痟狗閣較青狂一萬倍，見著人就用機關銃掃射，無緣無故、無講無呾予無情 ê 銃子彈死 ê 無辜者，共基隆港染做血色 ê 地獄。
打狗街頭巷尾，規陣兵仔原在親像青狂 ê 痟狗，暗夜、日時銃聲無停睏，予這个熱情 ê 城市成做無差別屠殺 ê 刑場。
佇嘉義車頭仝日被銃殺 ê 陳澄波、潘木枝、盧鈵欽、柯麟，彼時攏是參議員。佇插政治進前，怹是畫家、醫生佮戲園頭家。成做地方頭人，怹盡本份出來維持社會平和，無疑誤，煞一伐一伐陷入死亡 ê 界線。
台北地頭 ê 林茂生、宋斐如、阮朝日、吳鴻麒、施江南、王育霖、林連宗、李瑞漢、李瑞峯、王添灯……相 siāng 是精英裡 ê 精英。
遮 ê gâu 人，齊齊予外來霸權者計畫滅口。這是真拄真 ê 代誌！設使怹好好仔活咧，組成台灣內閣，敢會較輸文化漚魯 ê 支那人？！
永過，談論二二八，反抗、戰鬥 ê 角度佮生張有較缺欠。
咱 ê 島民，佇二二八事變裡，該然親像先人仝款，佇外來強權者侵門踏戶 ê 坎站，定著徛出來參怹對敵。
恁共看：二七部隊佇埔里烏牛欄 ê 戰鬥，進攻水上機場 ê 勇士來自阿里山、嘉義、朴子、新港、北港……遮 ê 地頭，猶閣有斗六陳篡地 chhōa 領民兵捙拚……。
二二八 ê 故典講會了袂盡，嘛寫會了袂盡……。
咱 ê 詩人、小說家、編劇，的確愛盡咱 ê 本份，共二二八 ê 形圖化做詩篇、小說、戲齣，一代傳一代，湠出美麗 ê 光彩。
