雞仔腸,鳥仔肚

20

(請安裝Taigi Unicode字形,配合Firefox瀏覽器可閱讀)

作者:李南衡

隔壁阿福伯看報紙看 kah 笑瞇瞇,有一下仔,煞受氣大聲罵講:「Chit 種人有影是『雞仔腸,鳥仔肚(ke-á-tn̂g, chiau-á-tō͘)!』」In 阿孫問講,阿公你是講雞仔鳥仔食無濟是 boh?福伯講原本 ê 意思是按呢,路尾煞變作講一個人肚量小,那像雞仔鳥仔 ê 腸肚。我入來 in 厝坐咧,恬恬看阿福伯 ê 表情變化,感覺不止趣味,才問講:「福伯 gâu 早,你到底看啥物新聞,看 kah 亦會歡喜亦會受氣?」福伯講:新聞講蔡英文總統宣布 beh 送 1000 萬片嘴掩 hō͘ 咱 ê 友邦 kah 歐洲疫情嚴重 ê 國家。那像《聖經》所講 ê「憐憫人的人有福氣」。

中國武漢肺炎開始發作 ê 1 月 24,行政院長蘇貞昌宣布嘴掩禁止出口,馬英九前總統認為 he 是針對中國,罵蘇院長是「無人性」!甚至有一個藝人罵蘇院長是「狗官」。In  知影,1 月 24 hit 當時全台灣嘴掩一工 ê 生產量才 180 萬片 niā-niā,政府才會禁止嘴掩出口,koh 規定嘴掩工廠所生產 ê 嘴掩攏 tio̍h 賣 hō͘ 政府,由政府實施實名制用健保卡買嘴掩,一個人一禮拜會使買三片。政府緊拚落去買六十線製造嘴掩 ê 機器,由全台灣機械工廠 ê 頭家 kah 師傅無暝無日落去組立,六十外工 ê 工課一個月內完成,分配 hō͘ 全台灣嘴掩工廠日夜拚落去生產。

福伯愈講愈歡喜:當咱一工會 tàng 生產 1300 萬片 ê 時,提高國民兩禮拜會使買 9 片,4 月初 1蔡英文總統宣布捐出 1000 萬片,其中美國 200 萬片,歐洲疫情嚴重 ê 國家 700 萬片,邦交國 100 萬片。我問福伯,你抵 chiah 罵「雞仔腸,鳥仔肚」是 teh 罵啥人?福伯應講,咱嘴掩生產量有夠額,送 hō͘ 足需要 ê 國家 mā 有人罵,台北市議員、馬英九前總統 ê 徒弟仔徐巧芯講:「做外交  是 bē 使,但是應該先滿足國內 ê 需求,猶有人佇路邊排列等 beh 買嘴掩 ê 時,竟然免錢送 hō͘ 外人 1000 萬片,按呢敢 bē hông 感覺不平?」福伯罵講不平啥?你敢知影,當年美國援助咱台灣一年一億美金,援助十年 hō͘ 咱建設。Hit 陣「美援」上流行 ê 一句話是:「台灣出土腳,美國出 tama 膠。」我相信 hit 陣美國 mā 猶有食無飽 ê 人。所以,我講 che 是「愛心外交」!4 月初 9,外交部啟動第二批人道醫療物資援助,koh 捐 600 萬片嘴掩 hō͘ 北歐 kah 中東、中南美國家。5 月初 5,咱國啟動第三波國際人道援助行動,援助濟濟國第一線醫護人員,政府承諾數量有 707 萬片,另外,最近咱台灣人認捐個人嘴掩有 393 萬片,鬥起來做夥援助國際 1000 萬片嘴掩。那像蔡英文總統講 ê:台灣會 tàng 幫助人、mā 當 teh 幫助人。

台灣人有肚量有腹腸,相信將來佇台灣會 chhōe 無「雞仔腸鳥仔肚」ê 人,有一工,chit 句台灣俗語話 mā 無人會曉講。

我有話要說