(請安裝Taigi Unicode字形，配合Firefox瀏覽器可閱讀)
Tân Kim-Hoa
Lâng ē 相逢 sī khò 緣分，nā 因為台語 ê 緣分相逢，有特別深 ê 感情。引用詩人講 ê 話：「母語是感情 ê 故鄉」。感情 ê 根基是母語，母語是族群 ê 靈魂。咱若會當自由寫母語，咱 ê 疼、咱 ê 愛就會深入族群釘根 tī 土地。我積極追求台語緣分，認真 tī 第一線開課教人寫白話字，用心等待逐期 ê 學員相逢 tī 台語這條路。
我佮意白話字 ê 各種故事，白話字會當 hō͘ 平凡 ê 人透過母語自由表達感情，消 tháu 情緒。Mā hō͘ 人真緊就學 tio̍h 別人 ê 語言。自我教台語到今 10 年，總是逐日抱著新 ê 向望，向望台語有出頭 ê 一工。便若一期 36 點鐘結業，就會看著學員第一擺用台語白話字寫 ê 文章，我攏足感動足歡喜。我上大 ê 快樂就是 tī 手機 á 用白話字佮學員對話。就按呢，我 tī 無台語讀寫概念 ê 台灣社會衝挵、挑戰。對高雄、台南到宜蘭，一期 koh 一期開台語羅馬字基礎讀寫 ê 課程，走揣我 ê 快樂。
這擺春天拄著武漢肺炎 ê 世界災難，阮台南班按照防疫規定全程掛喙掩，猶原堅持開課，結果學員交 ê 台語文章，hō͘ 我感覺 chit-ê 春天開出 ê 台語花芳 koh 媠。親愛 ê，我 kā 寫台語變簡單！我採用 ê 創意教材教法，規个教學過程，對初學者來講是無壓力 ê。口訣學寫台語白話字，複雜 ê 規則會當用畫圖簡單解說，來唱歌、跳舞 koh 講故事，就是我教台語攏 bē thiám ê 原因。
台灣人透過聖經 kā 台語白話字留 tī 咱 ê 土地，因為政治侵略、迫害割舌，強迫咱講華語，害咱母語攏得 tio̍h 語言癌；爸母攏 khap 著越頭症，越頭佮囝講華語，害咱母語強欲死。Sòa hō͘ 台語這條路變 chiah 歹行。今咱台語人 ài 家己拚，若欲疼惜咱 ê 故鄉咱 ê 情，緊改越頭症，緊教囝講母語，緊學寫羅馬字。我定定咧想，若教會組織願意用白話字救台語，台語一定 koh 活。偷偷問上帝 kám 會 koh 一擺救台灣魂相逢 tī 台語這條路？
