(請安裝Taigi Unicode字形，配合Firefox瀏覽器可閱讀)
作者：李南衡
看福伯笑咧笑咧，問伊有啥好孔–ê？福伯應講，那有啥好孔–ê，我是想起 in hiah-ê 人 ê 想法 kah 做法，煞起愛笑。6 月初 6 高雄市民罷免韓國瑜市長，以壓倒性 ê 93 萬 9090 票罷免成功，比年半前韓國瑜當選市長 ê 89 萬 2545 票，khah 濟過 4 萬 6545 票。Koh 6 月初 6 hit 暗，高雄市議長許崑源 ùi 大樓 liàn 落去不幸過身，「韓粉」kā 兩項代誌摻做伙，怪罪高雄市議員黃捷、台北市議員梁文傑、桃園市議員王浩宇、高雄市立委劉世芳、台中市立委陳柏惟五個人，列作全台第一批「報復性」ê 罷免。In 想講罷免是 hiah 簡單 ê 代誌，我笑 in 那像「老人看人食雞腱，khāuⁿ-khāuⁿ（Lāu-lâng khòaⁿ lâng chia̍h ke-kiān, khāuⁿ-khāuⁿ）！」我問講 chit 句俗語話是啥意思？福伯講，人老上害是耳仔聽 bē 清，目睭看 bē 明，嘴齒搖 ê 搖、落 ê 落，哺物件誠無好勢，真濟比較 khah 碇 khah 韌 ê 食物完全無法伊。M̄ -koh 看人食雞腱發出 khāuⁿ-khāuⁿ 叫 ê 聲，想講我來食應該 mā 無問題，家己一下食看覓才知苦，m̄ 是 hiah 簡單 hiah 好勢。
聽講鳳山罷免黃捷市議員連署人數已經超過兩萬人，最近會向中選會提出罷免案。黃捷市議員講伊會盡到家己應該做 ê 本分，會持續認真問政，地方服務 mā 會繼續拍拚，chhun ê tio̍h 留 hō͘ 鳳山選民做決定。真濟網友質疑，黃捷市議員問政 hiah 認真，罷免黃捷 ê 理由是啥？韓粉想歸晡攏想無，路尾才應講：黃捷上白目。笑死人，che 是啥物罷免 ê 理由？福伯愈講愈受氣，伊講，黃捷市議員佇高雄市議會質詢 ê 時，市政無半撇 ê 韓國瑜市長，那像曲盤跳針，khah 應 mā 應講「高雄發大財」，按呢才害黃捷市議員喝一聲「天啊！」反白目 hō͘ 記者翕相去，韓國瑜市長才 hō͘ 高雄市民看無起，才會 hông 罷免掉。
事實上，罷免一個市議員、立法委員抑是市長真無簡單，因為罷免、抑是補選，人民出來投票 ê 意願 bē 懸，以往 ê 經驗攏是差不多兩成外、三成 niā-niā，beh 親像罷免韓國瑜投票率 42%，是因為足濟人太受氣咧！
高雄市鳳山區選舉人數 28 萬 7829，若 beh 罷免黃捷市議員會成至少 tio̍h 四分之一、大約 7 萬 2500 票，若真正行到罷免投票 ê 坎站，黃捷市議員當然 tio̍h 拜託所有支持伊 ê、kah chit 遍鳳山區有出來投票同意罷韓 ê 11 萬 7795 位市民，出來投反對罷免黃捷市議員。Hō͘ 反對罷免黃捷市議員 ê 票，比 beh 罷免伊 ê 票加足濟足濟，濟 kah 有 thang 好曝干，hō͘ 全高雄、全台灣 ê 人知影，看高雄市民罷免韓國瑜，那像老人看人食雞腱：khāuⁿ-khāuⁿ！家己試看覓無 hiah 簡單。
台灣當流行種嘴齒，若是逐個老人嘴齒攏真好勢，chit 句俗語話 tio̍h bē 時行。
