(請安裝Taigi Unicode字形，配合Firefox瀏覽器可閱讀)
作者：杜謙遜
Hǎⁿ！牧會兼做穡？為啥物我 ài 兼作穡？因為阮老父車禍蒙主恩召，我 sòa hiông-hiông 著繼承家產。留一部分農地 hō͘ 阮阿母繼續做體藝，家己也著蹽落去 tàu 做，所以牧會以外兼做假日小農。我通過作穡，對信仰、農業、生態有進一步 ê 認識 kap 體驗。加上牧會，所以通講目前我是正港 ê「農牧業」（牧會+小農）工作者。
聖經 ê 頭尾講起農業是對伊甸園（世界起初）到新樂園（世界再造）上主要 ê 產業，也是上帝供應人活命需要 ê 恩典賞賜。人類始祖亞當第一個頭路是 tī 伊甸園作管家，主要 ê 工課是「種作顧守」（創世記 2 章 15 節）。後來始祖犯罪，土地受咒詛，人 ài 一世人流汗流洘才通得著食食。啟示錄世界 ê 終尾是新天新地新樂園，土地 tī 上帝末世救贖了後，無閣受咒詛，反倒轉 tī 活命水 ê 江河滋養下，河 ê 雙 pêng 有會結 12 種果子 ê 活命樹（每月 1 種），葉也有醫治列邦萬民 ê 妙用。
牧會是耕心種作上帝 ê 話語
主耶穌講過 iā 種 ê 譬喻。咱 ê 心是田地，上帝 ê 話（聖經）是好 ê 種子，咱是 iā 種 ê 人。當我實際大粒汗細粒汗參與 tī 做穡，真正非常會當認同主耶穌所講 ê chit ê 譬喻：
1.牧會著像殷勤拍拚 ê 做穡人。認真骨力耕耘經營田園，先 iā 種，續接管理、看顧，路尾才有收成 ê 喜樂。
2.好種落 tī 好土地才會有好收成。做穡首務是顧土（土地有充足有機質才會有生機孕育健康 ê 農作物）。仝款，人 ê 心 beh 成做好田地，一方面看對象，看人是 是有柔軟好教養 ê 心；一方面是牧養 ê 人是 是有願意成做拍拚 iā 種 ê 人（傳道書 11 章 6 節講：「早起時著 iā 你 ê 種子，下昏時也 通停你 ê 手，因為你 知 chit 个 hit 个叨落一个 beh 茂盛；抑是二個 beh 平平好。」），是 是有做好牧者（約翰福音 10 章 11 節）kap 做父 ê 心志（哥林多前書 4 章 15 節）。
3.信靠主佇祈禱中交託 hō͘ 上帝。種作 ê 過程對 iā 種到收成，ài 面對真濟變數：天氣、季節、土質、種苗、水源（灌沃、儲水、排水）、殺草、iā 肥、病蟲害、濺藥、修剪、倩工、農具、設備 kap 資材、採收、運搬、加工、收藏、市場買賣、農業政策，甚至國際化 ê 影響等等。菜土濟過菜金。牧會也 ài 面對無仝款 ê 人 kap 處理千百種 ê 問題。親像保羅所講：「我 iā 種，亞波羅沃水，-koh上帝 hō͘ 伊大欉。Iā 種 ê kap 沃水 ê 攏無重要，只有 hō͘ 伊大欉 ê 上帝才重要。Iā 種 ê kap 沃水 ê 攏仝款；上帝會照逐人 ê 工作 kā in 報賞。」（哥林多前書 3 章6～8 節）所以，無論做穡抑牧會，攏著信靠主，tī 祈禱中凡事交託 hō͘ 上帝。
營造生產、生活、生態「三生共榮」ê 幸福農業
做穡對我來講，第一大 ê 心得就是 kap 上帝同工營造生產、生活、生態「三生共榮」ê 幸福事業。講實在，tī 台灣「做穡」普遍是「ná 做 ná 失」，勞動濟 koh 收入少 ê 夕陽事業，專職從事農業生產 ê 少，老農占多數，連農校生畢業後願意從事農業 ê 也少，實在看無農業 ê「錢途」kap 遠景。大多數農民靠務農勉強飼活家己，beh 靠作穡趁大錢真 oh。農業運作主要靠農民（生產者）、盤商（農會、行口、市場大中小盤菜販仔、超市、商展、市集）、販售者、貨運倉儲業者、代耕者（犁耕、濺藥、iā 肥……）、資材商（種苗、設施、農機具、肥料等供應者）、食品加工廠、消費者（餐廳、機關、一般家庭主婦 kap 民眾等）。
照我 ê 觀察，台灣農業主要是建立 tī 對農民 ê 剝削、對土地 ê 摧殘、對生態 ê 破壞，致到農民利純低，消費者嘛無賺著健康！快樂農家其實是假象。M̄-koh 世界農業 ê 趨勢是「民以食為天」、「食飯皇帝大」，tòe 著全球氣候異常加上中國武漢肺炎影響，預測漸漸會發生普世性大糧荒，為著安全起見，應該提早佈局從事相關糧食產業鏈。所以農業的確會 ná 來 ná 受重視。我向望台灣 ê 農業通達到生產豐足、生活豐富與生態豐盛 ê「三生共榮」：生產豐足是農民透過農業經營（生產到銷售），有夠額利純會當飼家（有才調顧肚腹）；生活豐富是農民基本生活得著改善 kap 滿足，也有機會 kap 才調 1 禮拜歇 2 工 hām 享受人生；生態豐盛是對「慣行農法」（時常搜塗耕耘、使用化學農藥 hām 化學肥料為主 ê 現代農業）漸漸邁向「有機農法」（經過政府單位檢驗無毒生產並核可 ê 農地、農家、農產）kap 友善農法（農地和農產未經過政府檢驗，-koh採取無落過量化學肥和農藥），重視食材天然安全 kap 生態 hām 環保並重 ê 農業經營模式發展。
因為人是上帝所創造 ê，也是天生地養屬 tī 大自然 ê 一種生物。人遍滿全地管理土地，是透過從事逐種 ê 工課 kap 上帝同工經營自然世界，其中，農業是人生活 ê 基本，ài 透過食食來得著基本生活 ê 營養補給。所以，關心農業不但 kap 咱 ê 信仰實踐分 bōe 開，嘛是對咱 kap 咱 ê 子孫幸福 ê 未來 ê 關心。
