(請安裝Taigi Unicode字形，配合Firefox瀏覽器可閱讀)
作者：Chan bûn-sè
1.
烏面抐桮過冬鳥，
七股內海咧走跳，
佇遮毋驚腹肚枵，
春去秋來真奧妙。
1.
O͘-bīn-lā-poe kòe-tang-chiáu,
Chhit-kó͘ lāi-hái teh cháu-thiàu,
Tī chia m̄ kiaⁿ pak-tó͘ iau,
Chhun khì chhiu lâi chin ò-biāu.
2.
石化工場欲發展，
七股內海敢利便？
在地生活受挑戰，
環境破壞就了然。
2.
Chio̍h-hòa kang-tiûⁿ beh hoat-tián,
Chhit-kó͘-lāi-hái kám lī-piān?
Chāi-tē seng-oa̍h siū thiáu-chiàn,
Khoân-kéng phò-hoāi tō liáu-jiân.
3.
烏面抐桮罕得看，
上儕佇七股海岸，
工業汙染真倒彈，
守護自然相放伴。
3.
O͘-bīn-lā-poe hán-tit khòaⁿ,
Siōng chē tī Chhit-kó͘ hái-hōaⁿ,
Kang-gia̍p ù-jiám chin tò-tōaⁿ,
Siú-hō͘ chū-jiân sio pàng-phōaⁿ.
4.
工場開發又閣來，
彰化海邊大條代，
白海豬 á 生存 ê 所在，
恐驚會去夆破壞。
4.
Kang-tiûⁿ khai-hoat iū-koh lâi,
Chiong-hòa hái-piⁿ tōa-tiâu tāi,
Pe̍h-hái-ti-á seng-chûn ê só͘-chāi,
Khióng-kiaⁿ ē khì hŏng phò-hoāi.
5.
彰化海邊誠特殊，
白海豬 á 好安居，
毋但海豬閣有海牛，
海牛拖車重任務。
5.
Chiong-hòa hái-piⁿ chiâⁿ te̍k-sû,
Pe̍h-hái-ti-á hó an-ku,
M̄ -nā hái-ti koh ū Hái-gû,
Hái-gû thoa chhia tāng jīm-bū.
6.
海牛做穡袂藏水，
台灣全國今這位，
工場搶地若土匪，
生態保護鬥陣推。
6.
Hái-gû chò-sit bē chhàng-chúi,
Tâi-oân choân-kok taⁿ chit-ūi,
Kang-tiûⁿ chhiúⁿ tē ná thó͘-húi,
Seng-thài pó-hō͘ tàu-tīn chhui.
