數念敬疼 ê 張德香牧師

Image by Gábor Bejó from Pixabay
 ◎Lîm Chùn-io̍k 

慟聞全民台語聖經協會理事長張德香牧師 tī 11月22透早1點12分蒙主恩召,真 m̄ 甘!

2002年,我踏入台語文運動 to̍h 一直 teh 研究開發台語文輸入法,因為我深深感覺,電腦時代若無輸入法 ê 語言一定 ē 被淘汰。 Tùi 單字輸入 ê 「輕鬆輸入法」,koh 來詞條輸入 ê 「Kài 輕鬆輸入法」,到「信望愛台語客語輸入法」,我若去台南場分享,lóng 有看 tio̍h 張德香牧師帶 notebook 來參加。因為伊 ê 白話字真高段,伊bē 曉ㄅㄆㄇㄈ,對我用台語白話字 ê 輸入法特別認真來學。研習會 soah ,伊 lóng 來講 beh 請我食台南 ê 好料理;食飯 soah,當然 mā 順續 kā 伊安裝軟體 kah 更新,koh 做個別教學;阮就 án-ne 成做好朋友。

Hit 時,張牧師已經 tùi 台南神學院院長退休,m̄-koh iáu 是 ta̍k 工去學校做義工。伊特別關心咱信仰祖先留 hō͘ 咱 ê 白話字,伊學 ē 曉用「輕鬆輸入法」,to̍h tī「南神網站」kā ta̍k 篇中華民國語文翻譯做白話字,koh 是 kā 白話字 khǹg tī 中華民國語 ê 頭前,伊講「bē 曉讀白話字 chiah 去讀中華民國語。」張牧師真有疼心。我有一 pái 回台去 tòa 朋友陳憲國老師 tī 台南 ê 厝,to̍h 是南神隔壁 hit 棟「互助社大樓」ê 六樓。暗時11點外到位,發見冷氣機 bē 振動;我隨 khà 電話 hō͘ 張牧師,看伊有熟 sāi ê 冷氣機師傅 thang 來修理,結果是 hiah 暗無人 beh 來。有疼心 ê 張牧師 tī 電話中叫我去 tòa in tau,伊講 hiah 熱 ê 天擋 bē tiâu lah。我就 án-ne 去 tòa in tau;隔 tńg 工,牧師娘 chhoân 豐盛 ê 早頓 hō͘ 我食飽,chiah hō͘我去開門 hō͘ 師傅修理冷氣機。這是我一生難忘 ê 甜蜜回憶。

全民台語聖經協會 beh 成立 ê 時,張牧師一聲 to̍h 答應來做共同發起人;每年 ê 會員大會,張牧師從來 m̄-bat 缺席。創會理事長蕭清芬牧師做兩任四年了後,teh chhōe 接任 ê 人選 ê 時,張牧師 mā 一聲 to̍h 答應講:「若上帝允准,我 ē-sái 拚命來做一任兩年 ê 協會理事長。」

舊年2019年 ê 協會會員大會中,理事長蕭清芬牧師kā 協會 ê 大印移交 hō ͘張德香牧師。留念ê相片中,張牧師「受呼召 ê 使命感」ê 笑容 iáu tī 眼前,taⁿ 伊卻行完上帝賞賜伊 ê 一生,留落來深深 ê 數念,總是 hō͘ 人感覺真m̄ 甘。 (作者為全民台語聖經協會秘書長)

我有話要說