(請安裝Taigi Unicode字形，配合Firefox瀏覽器可閱讀)
作者：鄭雅怡
◆周金源 ê 見證
保成受掠以後，日本官方繼續消滅抗日勢力。小林文化工作者周金源講，伊 ê 阿公周清春 bat 提起，1939 年大批日本軍警來到小林圍捕「匪徒」ê 時，有動員在地百姓，連附近 ê 客人也 hông tiàu（召）來 chia「顧山」。頭到 tī 埔頭，軍隊行進 ê 聲 póng póng póng，軍車駛–過 ká–起來 ê 風飛沙，連小林山頂也聽會 tio̍h，看會 tio̍h。Hit-pang 受掠 ê 人，有一位是小竹溪仔 ê 潘欽（潘琴？），走難期間，in 某提米 hō͘ 伊 tī 山內煮。劉三連 tī in tau hông 掠–去，連抗日份子 ê 名冊也 hō͘ 日本軍警 chhiau–tio̍h、提走。另外，猶 koh 有過溪仔 ê 王丁獻，以及劉添丁、陳治等十幾名 mā hông 逮捕。佳 chài in 攏有 seng-hoân（生還），戰後倒轉–來小林。劉章文 ioh（猜想），in 老爸 kiám-chhái（可能）「潦」了較深入，罪行較重， hō͘ 日本官方就地處死 tī 獄中 ah？
Hín 周金源 ê 兩位阿公攏受牽連。In 老母 ê 老爸（我無愛用「外公」這個父權體制 ê 詞）劉川連因為伊 ê 牛索仔去 hō͘ 日本軍警提去掠犯人，有一站 hō͘ 小林人誤會伊是密報者。論到老爸這爿 ê 阿公，hit 時周清春 teh 做保甲兼警察，可能 hông 認定「督導不周」，調去藤枝兩年，才倒轉–來。
◆往事並無過去
1939 年劉章文 in 老爸 hông 掠–去 ê 時，伊 15 歲，in 大兄已經二十三、四歲。此外，劉章文猶有三个姊妹仔和三个小弟。代誌過了，日本官方強迫 in 全家搬去小林，尾手 in 才 koh 搬轉–來五里埔。Hín ta̍k 戶攏有飼牛，in 老母就駛牛犁替人犁田來度活。無的確伊 ê 老母具備平埔族女性 giám-ngē（儼硬，堅韌）兼樂觀知足 ê 心性，秉持「一枝草，一點露」，「人若生，天 tiō 飼」ê 信念，自按呢 kā 一陣細囝 chhiâⁿ 養成人。
回想八十外冬前 ê 往事，劉章文猶原會怨嘆，江保成是「來亡–ê（來害人的）」，「阮老爸 hō͘ 伊害–死」，「（阮老爸）thái hiah gōng（戇）！」總–是，伊 ê 親族中間，甚至 tī 小林人 ê kho͘-á-lāi（箍仔內，圈內），大家罕得講起，也無想 beh koh hōe（討論）江保成事件抑是 Tapani 反。劉章文用無奈 ê siaⁿ-sàu（聲嗽，口氣）講，老爸 hông 掠–去，而且 kàu-taⁿ 死因不明，「khah chheh，mā 無法度。」（按怎怨恨也無用）
周金源補充解說，tī 殖民結構下面，這兩個事變奪走 chōe-chōe 族人 ê 性命，毀掉 chōe-chōe 部落，受難者 tio̍h koh 背負「匪徒」ê 罪名。In ê 家屬 kan-ta 知厝內有人無緣無故「無–去」，無一定了解內中緣由，續認定這是極其「不祥」、「䆀」、「不名譽」ê 代誌，致到 in 無愛 koh 提起，寧可恬恬，獨自承擔所有 ê 艱苦。
周金源 ê 三叔，1936 年出世 ê 周坤全雖罔有講江保成和伊 ê 抗日同志是「功勞者」，不而過伊對 Tapani 反 ê 印象傾向去描述當初時民兵刣日本人 ê 恐怖情景：thǹg-pak-theh（上身赤裸）、穿烏長褲 ê 民兵 tùi 山坡 lìn–落來，kā 長刀 tùi 腰邊抽出–來，kā 日本人 ê 頭殼 phut–落來……，相對較無家己 ê 評論。
◆集體 ê「恬恬」
按呢 ê 集體「恬恬」，抑是「袂記得」，引我想起台南崗仔林一位 Siraya（西拉雅）朋友兼長老教會 ê 信徒 Ili Domok（穆伊莉）。伊 ê 老母來自甲仙 ê 匏仔寮，真有可能是大武壠後裔。1915 年 Tapani 反過了 ê 清庄，致到玉井、左鎮、大目降到甲仙彼帶真 chōe 無辜百姓受難。有 ê 庄頭無分男女老幼，規庄 châu（勦）–去；有 ê kan-ta 留婦女和囡仔，男性總 hông 掠–去，放火燒–死。Chiah-ni̍h 慘烈 ê 災禍連當時 ê 長老教會也有記錄–tio̍h。M̄-koh，伊莉講，伊 -bat 聽爸母雙爿 ê 家族序大講起 Tapani 反過了 ê 大屠殺，便若提起早前，in 攏是講 hiàng 時 ê 生活按怎樣困苦、散赤。
論到 Siraya 復振運動，2010 年台南新化區口碑教會 ê 李孝忠牧師分享伊 ê 觀察。伊講平埔 hiuⁿ-siā（鄉社）普遍較散赤，散赤會致使人失去自尊，續喪失為著族群、族語來拍拚 ê 意願和自信，所致，若 beh 做平埔復興 ê 事工，根本 tek ài 改善規 ê 部落 ê 生活水準，hō͘ 族人重建尊嚴。Bô-tiāⁿ-tio̍h（無定著）物質 tek ê 缺乏也造成 Tapani 反和江保成事件中平埔族 ê 參與罕得 hông 書寫、討論，致到較少人認 bat 這段歷史？
1979 年 7月，tī Tapani 反 ê 戰場之一，現在甲仙市街 ê 甲仙公園–裡，高雄縣政府 tī 原底 ê 日本神社位所，khiā（徛）一塊「甲仙埔抗日志士紀念碑」，由 hit 當時 ê 高雄縣長黃友仁署名。日治時期 chia 本底 khiā 一塊 Tapani「警察官吏殉職紀念碑」，-ku 戰後 hông 毀掉。Taⁿ tùi 伊 ê 基座重新 khiā 一塊抗日記念石碑，見證百外冬前在地大武壠先賢 ê 抗爭血淚史，也反映新時代新 ê 歷史視野。
◆尾聲
文字無 thang 充分顯明史實抑是表達大武壠後裔 ê 心 chiâⁿ，好佳 chài 有「保成菜」這種大武壠民族植物，透過伊特有 ê 在地名，引咱翻頭去探 chhōe 大武壠前輩參與 Tapani 反和江保成事件 ê kha-jiah（跤跡）。保成菜特殊 ê 苦甘滋味通過咱 ê 喙舌，kā 這段常常 hông 淡忘 ê 反殖民奮鬥歷程，實實記錄 tī 咱 ê 腸仔肚、胃兜底。Tam 一喙保成菜，就會 koh 一擺想起大武壠，têng-thâu（重頭）kā 咱提醒，永遠 -thang 放袂記–得──小林、江保成事件，猶 koh 有，Tapani 反。
Tùi 這項也 thang 知，名是何等重要 ê 身世線索和文化記認，牽挽個人和群體 ê 歷史根源；號名又 koh 是 jōa-ni̍h-á 重要 ê 知識權利。過去 400 年，台灣 hō͘ 無 kâng ê 外來政權輪番殖民，致到咱 ê 族群名、地號名、動植物名號，甚至連本土語言 ê 名稱，也任由殖民政權一再改名，續 kā 咱 ê 祖先原本號名 ê in-toaⁿ 和思維，也就是咱 ê 歷史文化根源，規个 phu̍t 斷–去，才 koh 將殖民者 ê 意識型態和符號強灌輸（implant）tī 咱 ê 頭殼內，kā 咱洗腦，hō͘ 咱 kā chiah-ê 殖民知識「內化」（internalized），致到台灣人普遍對家己 ê 歷史、文化無知，對 tī 家己族語 ê jīn-bat（認識）無夠額，母語意識和台灣認同攏無夠深化、無夠堅定。
大多數台灣人對 tī 軍事、政治、外交、經濟 ê 壓迫可能較「有感」，總–是對 tī 母語 ê 被取代和洗腦，以及歷史斷根等心智方面 ê 殖民奴役，相對較無警覺性。就植物名來講，台灣 ê 原生植物以及歸化久久 ê 外來品種和這塊土地 ê 牽連既然 chiah-ni̍h 深落，敢講台灣人 m̄-bat kā in 號台灣名？Tio̍h 由在外來殖民政權用 in ê 殖民語、「國語」所號 ê 名，才 thang 算做「正式」（official）名稱？才夠「份量」來展現知識權威？我認為台灣有必要發起一个普遍 tek ê 正名運動，kā 咱 ê 國名、地號名、動植物名、語文名稱和各層次 ê 名號攏做一擺地毯式 ê 檢視和反省，chiah koh 用台灣 ê 款式重新號名，起手建構用台灣做主體 ê 知識系統。名就是咱 ê 根。祖先流傳–落來 ê 名字，是祖先留 hō͘ 咱 ê thiàⁿ（疼，愛），mā 是 in kau-tiōng hō͘ 咱 ê 責任。號名是一種「賦權」（empowerment）。重新爭取號名權是 beh 恢復這個基本權利，mā 落實文化 tek ê 轉型正義。
另外，kàu-taⁿ 猶有一寡中華意識 ê 學者和一部分平埔研究 ê 先行者堅持 kā 平埔議題限定 tī「族群」ê 範疇內，甚至 chhiàng 講，平埔復振若和台灣認同抑是「國族」（nation）ê 議題「掛鉤」，是「誤導」平埔研究，對平埔運動會不利。總–是，tùi 這 pang 保成菜、Tapani 反相關 ê 田野調查顯示，平埔族和台灣其他族群 ê 境遇其實牽連做一 kōaⁿ。咱攏屬 tī 台灣命運共同體，tng 殖民迫害臨到 ê 時，各族群會合作，tī 無 kâng ê kak-sì 協力對抗強權，雖罔動機無 tú 好完全 sio-siāng（相像）。Ǹg 望台灣各族群運用智慧來分辨是非，繼續持守咱對這塊土地 ê thiàⁿ 和信念，saⁿ-kap 來守護咱共同 ê 祖國──台灣。（全文完）
