Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k.
請安裝Taigi Unicode字形，配合Firefox瀏覽器來讀。
Iok-pek-kì 約伯記3：1-26
後來約伯開嘴，咒詛伊 ê 日。約伯開嘴講：我出世 ê 日，願 hit-ê 日無去；講，有懷孕 ta-po͘-kiáⁿ hit 暝，願 hit-ê 暝也無去。願 hit-ê 日變做烏暗；願上帝無 tùi 頂面看顧伊，光也無照伊。願烏暗 kap 死蔭侵取伊；願密雲停 tī 伊 ê 頂面，願 hō͘ 日變烏暗 ê phah 驚伊。論到 hit 暝，願烏暗搶去；願伊無 kap 年中 hiah-ê 日同歡喜；也無入 tī hiah-ê 月 ê 數額。Ā！願 hit 暝無有生 kiáⁿ；in 中間無歡喜 ê 聲。願 hiah-ê 咒詛日 ê，咒詛伊；以及 hiah-ê 會激動龍 ê，咒詛伊。願 hit 暝天 phú 光 ê 星變烏暗；願伊 ǹg 望光也bōe 得 tio̍h；也無看見早起時天拆 ha̍h……─Iok-pek-kì 3：1-9
黑暗中欲顯出黎明
約伯講 ê 話顯明伊所受 ê 苦痛，伊咒詛家己 ê 生日，向望家己出世 hit-ê 日「天 phú 光 ê 星變烏暗；願伊 ǹg 望光也 bōe 得 tio̍h；也無看見早起時天拆 ha̍h」。通常，人若親像約伯遇到這款 ê 災禍，絕對有理由咒詛上帝、咒詛別人，甚至佇絕望中殺害家己、殺害別人；但是，約伯攏沒。約伯咒詛自己，希望無出世佇在這個世界。約伯指控上帝。
佇約伯記內裡，上帝容允人受試探。但是，人受著試探，就一定會墮落嗎？約伯記講，無的確。確實，因為無論外在環境怎樣，大部分 ê 人攏佇某種程度頂面會當決定欲做啥物、不做啥物，為家己 ê 行踏負起應該負 ê 責任。約伯無墮落、無罵上帝、無怨恨別人、無自我傷害、無傷害別人。
張玉蟬1946年 kap 張七郎 ê 第三 ê 囝張果仁結婚，想 bōe 到新婚無偌久，張七郎 kap 伊 ê 大囝張宗仁、張果仁父子三人，佇1947年4月4日攏 hō͘ 中國國民黨政府 ê 軍人導走、槍殺。佇2017年11月26日，鳳林教會舉行「仁壽醫院」看板（かんばん, kanban）歸還感恩禮拜，當時89歲 ê 張玉蟬想起早前發先 ê 代誌，目屎含咧，講養父、大伯、丈夫冤枉死去，就親像刀仔插佇心肝，是永遠 ê 痛。鳳林教會時任牧師陳明輝鼓勵會友手抄聖經，張玉蟬佇抄寫經文 ê 過程中得著對信仰來 ê 氣力。
祈禱：創造萬物 ê 主啊，當阮遇著困苦艱難 ê 時，猶原會持守信仰 kap 美善。奉主耶穌基督 ê 名求，阿們。
延伸閱讀：【少年新眼光台語版】
