【少年新眼光台文】約伯所認識 ê 上主

Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k.
請安裝Taigi Unicode字形,配合Firefox瀏覽器來讀。

少年新眼光 2021年1月9日

Iok-pek-kì (約伯記) 12:1─14:22

約伯應伊講, Lín 真正是百姓 ah,lín 死,智慧也 kap lín 死。我也有心思,親像 lín 一樣;我無 khah 輸 lín;chiah-ê tāi-chì 甚麼人 m̄ 知?我是求叫上帝,得 tio̍h 伊聽 ê 人,iáu-kú hō͘ 同伴譏刺;公義完全 ê 人,也 hō͘ 人譏刺。─Iok-pek-kì 12:1-4

約伯所認識的上主

 約伯記12─14章 ê 內容,是約伯反對伊 ê 「朋友」瑣法。因為瑣法認為約伯呣認罪、無反悔,致到約伯 ê 災厄連連。約伯抗辯,因為約伯認定家己呣是呣知「全能 ê 上主」、「創造萬有」以及「掌管一切動物ê性命,kap人類ê喘氣」ê 主宰。

約伯認識上主,伊也會講論上主 ê 智慧,承認上主是掌理天地萬象、自然倫常 kap 世間權勢興替 ê 主。Koh khah 重要 ê 是,約伯深知這位充滿大氣力 kap 智慧 ê 上主並非心心念念 beh 降災厄 hō͘ 人 ê 報仇者。其實,約伯比伊 ê 朋友更加了解上主,所以,約伯直接向上主講出心內 ê 委屈 kap 疑問。

面對困境,你認為 bōe-tàng 質疑上主、胡白講話 mah?你想講一切 ê 問題一定是自己造成 ê mah?或者是你感覺災難是上主對某某人、對某某群體 ê 「責罰」?約伯 ê 經歷 kā 咱講,答案無一定如此。咱會當向上主提出疑問。

祈禱:認識我 ê 主啊,祢創造我、認識我,明白我所有 ê 需要 kap 渴望,也接納我 ê 憢疑 kap 軟弱。感謝祢。奉主耶穌基督 ê 名求,阿們。

延伸閱讀:【少年新眼光台語版】


台文新眼光 TÂI-BÛN SIN GÁN-KONG

廣告/聖經充滿我-經文填充本

我有話要說