(請安裝Taigi Unicode字形，配合Firefox瀏覽器來讀)
作者：蘇聖詠
2020年 10 月初 7，學校邀請 tī 台語教學足有經驗 ê 陳金花老師來專題分享，tī-chia 寫一寡個人 ê 感想 kā 記錄落來。一開始陳老師先紹介「台語 gín-á 古」，就是 gín-á ài 看 ê 台語故事冊，譬如講蔣為文教授 in 後生畫 ê 繪本；因為細漢 gín-á 上愛看 ê 冊就是有 ang-á 圖 ê 故事冊，所以若 beh hō͘ gín-á 自細漢就接觸 tio̍h 台語，就 ē-sái 用 in ài 看 ê 故事冊配合台語文，發揮「一兼二顧」ê 效果。另外，阮學分班 mā 有幾个同學有創作繪本 ê 經驗，mā 有 tī「左新圖書館」講台語故事 hō͘ gín-á 聽，實在真無簡單。其實我 mā bat 一、兩 kái tī-hiah，有 kah 別人做伙講故事 hō͘ gín-á 聽，hit 陣是 chhōe 一本繪本電子冊，kā 華語改做台語文，sòa–落用台語講出來。
M̄ 管是去冊店，抑是去圖書館，攏有 chiok 豐富 ê 冊，m̄-koh 若是 beh chhōe 用台語文寫 ê 冊，soah 變做無 jōa-chē，更加 m̄ 免講是台語 gín-á 古，所以製作台語 gín-á 古是有需要–ê。我 mā bat 去參加教人 án-chóaⁿ 做台語 gín-á 古 ê 課程，雖 bóng 真有興趣，m̄-koh 因為 ka-tī 對畫圖 是蓋專門，對出版冊 ê 成本 mā 無法度負擔，只好暫時 kā 這个計畫 khǹg tī 心肝底。
因為 chit-má 序大人 jú 來 jú 少和 gín-á 講台語，hō͘ gín-á 失去學台語 ê 環境，序大人若無講 hō͘ gín-á 聽，gín-á 就 bē-hiáu 講，連聽 mā 會出問題，台語就無法度傳承 ah！所以希望透過講台語 gín-á 古，用台語結合 gín-á ê 興趣，趁這个機會 hō͘ gín-á 來學習台語是上好–ê。雖 bóng chit-má 無法度達成出版繪本 ê 理想，m̄-koh tī 學校 leh 教台語 ê 時，我 mā 會 ka-tī chhōe 一 kóa 趣味 ê 故事，抑是利用課本內底 ê 看圖講故事，問一 kóa 問題進行搶答 ê 活動，hō͘ in tī 充滿華語 ê 生活中，漸漸產生對台語 ê 興趣。
金花老師 koh 有講 tio̍h tī 舊年11 月，Ngô͘ Hê-bí 先生和一陣長期關心台語 ê 朋友，tī 高雄舉辦「台文博覽會」ê 活動，這是全世界頭一个大型 ê 台語文慶典，地點 tī 三餘冊店、鹽埕市場、新興圖書館、旗津、哈瑪星等等 chia-ê 所在。我 mā 有參加過兩工 ê 活動，一遍是 teh 講柴山猴山仔 ê 故事，一遍是趙子賢 ê 藝術創作，其中藝術創作是 leh 傳達語言是文化 ê 中心，若是語言消失，所代表 ê 文化 mā 會 tòe leh 消失。
每一个活動 ê 主講者，攏盡量用台語來講，hō͘ 台語 chiâⁿ 做生活語言，我相信這 mā 是台文博覽會舉辦 ê 目的。雖 bóng 我參加 ê 兩个活動攏無 jōa-chē 人，可能是宣傳 iáu 無夠，抑是大多數 ê 人對台語 koh 無 hiah 重視，表示推 sak 台語這塊，koh 有真大 ê 進步空間，ǹg 望其他我無去參加 ê 活動是 chiâⁿ-chē 人，若 chún 講台文博覽會 koh 有規劃新 ê 活動，到時想 beh 參加 koh 較 chē，尤其戶外 ê 活動一定 jú 趣味。
