(請安裝Taigi Unicode字形，配合Firefox瀏覽器來讀)
作者：姚志龍
蹛佇這 tè 美麗 ê 島嶼，逐人佇各行各業咧拍拚，貢獻才華、氣力以外；下班後閣趕緊去「鳳山社區大學」抑是逐所在 ê 社大進修，無論進修啥課程，攏是真可取 ê「終生學習」。這款跤步無停，隨時自我要求進步，毋是佇厝內吹冷氣、看電視輕鬆過日，會使講：「凡若有咧追求精進–ê，攏是真可取 ê 鄉親。」社大課程中有開台語課，真濟人感覺台語哪有啥通學？聽有就好。國小、國中雖然有「鄉土母語課程」囥入課表內，卻是成效無大，效果無足好。咱這代，母語嚴重流失是咱家己放棄–ê，佇厝內、佇校園、佇社會，大部分攏用華語，咱 ê 序細自然真少機會練習講佮聽母語。
台語講–來真簡單，聲調變化充滿語氣，真正好聽閣袂跳針，佇菜市仔、佇逐个角落，隨時攏會聽著，較有歲 ê 鄉親用台語咧開講，聽著實在真親切。頭一擺接觸台語，有心欲進修 ê 學員，若較專注、較用心–咧，差不多上課六、七暝，佇頭殼內就有完整 ê 聲母、韻母佮聲調 ê 結構。真緊會曉羅馬字、捌「台羅拼音」佮「教育部推薦用字」。我有真濟位成人學員，對無基礎開始，短短訓練後，參加教育部佮成大台語檢定考試，成績已經接近專業級 ê 分數。這毋是老師𠢕，是台語對在地人來講，真正無足困難。若拍拚過，猶讀無、寫無、袂曉分辨聲調，是無可能 ê 代誌！一定是無用心，無認真，無要意欲哪有好 ê 成績？羅馬字無遐困難啦，有拄好 ê 指導、小可仔自我加強練習，就會通過台語檢定認證。
欲講–ê 是，大家若較用心–咧！欲寫、欲講台語一定無問題，有熱情、有方法、認真練習就會達成。現在除了有紙本 ê 辭典，網路線頂閣較方便；蝦米老師開發 “Chhoe Taigi” App 有整合真四序 ê 電子辭典，真簡單佇手機仔頂，就會揣著正確 ê 語音、語詞，這是過去咱 ê 前輩想袂到 ê 代誌，毋免閣用紙本字典查 kah 目睭起花。咱若有認同、有疼惜家己 ê 祖語，想欲學習，真緊就會入門，寫佮講攏會削削叫。無論七字仔、鬥句 ê 詩詞，表達心情、天氣變化 ê 現代詩，抑是聽–過、看–過、經歷–過 ê 故事，攏是真精采 ê 素材。用心寫好 ê 文稿，若受採納變做印刷品，家己嘛真歡喜，閣會得通成做真媠 ê 文學作品。目前教育政策一直咧推捒，國小、國中佮高一，欲成做必修課程，需要大量 ê 師資。少年 ê 朋友，你若有準備，通過教育部 ê 檢定佮訓練，就有機會進入校園教真好聽 ê 母語。
