《少年新眼光》讀經 台語版試讀 2021年1月31日 Thoân-tō-su (傳道書) 4章1~16節

14

(請安裝Taigi Unicode字形,配合Firefox瀏覽器來讀)

說明 :《少年新眼光》讀經手冊對2015年開始到 taⁿ 已經滿5年。準備佇2021年第二季《少年新眼光》開始每個月至少有一篇母語文章。佇 chia 先試刊本季1月31日 ê 內容,敬請讀者支持、指教。

台譯:王美書

……我 koh oa̍t tńg 來看,看 tio̍h tī 日光 ê 下面所發生 ê 一切 ê 壓迫。你看,受壓迫 ê teh 流目屎,mā 無人安慰。In 無得 tio̍h 安慰,是因為壓迫 in ê 有勢力。……Sàn-chhiah koh 有智慧 ê 少年人,贏過年老 koh m̄ 肯受諫諍 ê 戇王。Chit-ê 人是 tùi 監內出來做王;tī 伊 ê 國內,出世是 sàn-chhiah 人。我看 tio̍h tī 日光 ê 下面 teh 行 ê 活人,lóng 遵 thàn hit-ê 少年人,to̍h 是第二个,續接伊 ê 位 ê 人。伊所管 ê 人民真 chē,算 bē 了;總是,後來 ê 人無為 tio̍h 伊來歡喜。這 mā 是空虛,mā 是掠風。(傳道書4章1~6節,巴克禮漢羅版)

毋是空空著磨(M̄ -sī khang-khang tio̍h-bôa)

傳說中,Só͘-lô-bûn(所羅門)王是 Thoân-tō-su ê 作者。咱就代先對所羅門來講起。Só͘-lô-bûn 用7冬 ê 時間起造上主 ê 聖殿,用13年起伊 ka-kī(家己) ê 王宮,顯明伊對重享樂贏過對重上主。所羅門不斷收集金銀財寶,他收集查某人 m̄-nā 欲滿足家己 ê 性慾,伊也將查某人當做統治 ê 手段。若用男性中心 ê 傳統父權社會來評價,所羅門是達成集「錢」、「權」、「色」佇一身 ê 最成功者,受濟濟以色列子孫 kap 世人稱頌做有智慧 koh 有能力 ê 王。

M̄-koh,傳道書 hoán-tńg kóng it-chhè ê lô-lo̍k(勞碌)、所有想空想縫 tit-tio̍h ê 攏是空虛。傳道書敢是所羅門 teh 講五四三?可能,是聰明 ê 作者借用所羅門 ê miâ 來罵所羅門「人心肝,牛腹肚」、罵所羅門 ê 囝(m̄ 聽智慧老臣 ê 建言去減輕人民 ê 重擔 ,卻聽趁愚戇少年 ê 意見 tì-kàu 國家分裂)。咱 koh 想起「無 khòa 頭殼 ê 所在」、為世人 piàⁿ-khang 家己來犧牲性命 ê 耶穌基督講過:「啥事為 tio̍h 衣裳掛慮 ah?試想山裡 ê 百合花,怎樣大欉;in 無 tio̍h 磨,無紡績 (cheh)。但是我 kā lín 講,當所羅門極 hâng-ngó͘ ê 時,伊所穿 ê m̄ 值 tio̍h chit 號花 ê 一蕊」(馬太福音6章28~29節)。


「我決意 pàng-sak 以前主宰我 ê 一切,將 ka-kī 奉獻佇祢面前。」1875年,巴克禮(Thomas Barclay)放棄佇英國做學者 ê 前途來到台灣。後來他創辦台灣第一間西式大學(台南神學院)、發行頭一份報紙(今名《台灣教會公報》)、推動白話字教育信徒 kap 平民、擔任和平使者保護台南人民、修訂甘字典。佇為主耶穌基督盡忠60年了後,埋骨佇台南。巴克禮所做 ê,上主 kap 台灣人攏記念。


祈禱 :主啊,祢揀選人來服事祢、kap 祢同工,我願意跤踏實地來回應祢 ê 呼召,懇求祢 ê 聖神來幫贊我。奉主耶穌基督 ê 名祈禱,阿們。

我有話要說