Njoo Kwetu, Roho Mwema

(請安裝Taigi Unicode字形,配合Firefox瀏覽器來讀)

作者:林碧堂

「Karani 歌」!這是 A-Lu kā 聖詩165首〈疼痛聖神,求祢降臨〉(Njoo Kwetu, Roho Mwema)號 ê 名。幾年前,我 ê 太太去加拿大多倫多大學留學,全家搬去住佇大學 ê 家庭宿舍。當時,寄居佇加拿大 ê 外國旅客 nā-beh 送囡仔去日間托育,費用每個月是加拿大票1800箍,差不多新台票四萬,阮負擔 bōe 起,所以我佇厝顧二歲 ê 囝 A-Lu。隔壁住 ê 是肯亞 ê 留學生一家伙三人,太太 teh 讀博士;肯亞先生 ê 家境佇肯亞是誠好過,總是為著 beh 增加互 in 囝 Karani 去宿舍樓跤 ê 幼稚園 chhit-thô ê 時間,伊就去附近 ê Loblaws 超級市場剁肉加減討賺。每禮拜六 ē-chái,肯亞太太會將 Karani 寄佇阮遮。也有時,in 會幫忙照顧 A-Lu。A-Lu kap Karani 仝歲。

有一工,我掀聖詩目錄,看著聖詩165首是 Swahili 語。Swahili 語是肯亞、坦尚尼亞、盧安達、剛果 kap 烏干達 ê 官方語言。這首歌 ê 歌詞也有音譯。阮兩家做伙唱歌,肯亞厝邊佇異鄉聽到鄉音。彼工,肯亞太太講起:「有時我對窗仔邊看著 Karani 倒佇幼稚園遊樂場 ê 塗跤,有幾個囡仔 teh 給 Karani 踢 koh 拍,我 ǹg 幼稚園先生反應,總是 in 攏回答講並無這款代誌發生,我非常受氣,因為老師無用心。A-Lu bōe 給 Karani 欺負,我真歡喜 in 做伙耍。」A-Lu 佮 Karani 經過兩遍大雪、佇公園 peh 高 peh 低、挖土 khat 沙、同齊學騎三輪車、畫圖、踢球、唱歌、耍起厝柴頭(積木)佮𨑨迌火車 ê 日子。轉來台灣兩年,欲六歲 ê A-Lu,會用這首歌思念這位佇遠遠所在 ê 朋友。

廣告/美好腳蹤368認購

我有話要說