(請安裝Taigi Unicode字形，配合Firefox瀏覽器來讀)
作者：李南衡
敢開飯店，毋驚人大食！ Káⁿ khui pn̄g-tiàm, m̄-kiaⁿ lâng tōa-chia̍h.
頂日抵 tio̍h 真久無見面 ê 阿水伯，講無三句話，伊 tio̍h 講咱來小公園仔 ê 椅仔 hia，我有一寡話 beh 講 hō͘ 你聽。我知影伊一定是有啥物不平 beh 講 hông 聽，小出氣一下。坐定，伊開始罵：「Ùi 2018年4月16開始，台北捷運公司推出一種1280箍食 kah 飽 ê 月票，tio̍h 是講買一張月票，一個月內，無論是坐雙北公車抑是台北捷運，無限次數出在你坐，會使講是真濟通勤族 ê 好消息。我大大 kā 謳咾。無疑誤，今年7月初9新聞報導，台北市長柯文哲前幾工佇交通會報舉出，有民眾使用月票坐超過3,000箍，甚至有人坐到超過一萬箍，hō͘ 伊相當 bē-tàng 了解『到底是何方神聖？』而且講 tio̍h 去查使用者 ê 行動腳跡，意思是講 tio̍h 查 chit 種人到底 ùi 佗位坐去佗位轉去佗位，按怎坐公車轉捷運才 koh 轉公車坐捷運，那會坐超過3000箍以上，甚至有人坐超過一萬箍？」
阿水伯問講：「你敢知影 ùi 外國流行到台灣 ê 一種西洋式自助餐 Buffet？中晝頓、下晡飲茶、暗頓三種價數無相 siâng，每一間餐廳 ê 價數 mā 攏無相 siâng，唯一仝款 ê 是 tī 一個用餐 ê 時間內，出在你食，英語講是 All you can eat，chit 20外年來佇咱台灣各大都市 mā 真時行。」
我問講：「你講台北捷運公司推出 ê 月票 kah 西洋式自助餐 Buffet 有啥關係？」阿水伯聽一下煞起受氣罵講：「你 chit-ê 人哪會 chiah-nī giàn-thâu？你無看出 in ê 共同點是出在你食、食 kah 飽。」我應講：「哦，按呢你是 teh 受氣啥物？」阿水伯罵講：「柯文哲 chit 號跤數，也敢 kah 人開飯店賣西洋式自助餐 Buffet 出在人食 kah 飽？你敢 m̄-bat 聽過『敢開飯店， 驚人大食！（Káⁿ khui pn̄g-tiàm, m̄-kiaⁿ lâng tōa-chia̍h.）』chit 句台灣俗語話？」
阿水伯講好佳哉，台北市公共運輸處初步指出，坐月票超過一萬箍 ê 攏是仝一個人使用，而且每日次數懸到30幾遍以上，一個月有坐超過1000遍，使用者 ê 行動腳跡、時間，攏是連續性 ê，並無違反1280元月票使用「食 kah 飽」ê 規定。所以 bē 去 chhōe 當事者來問。公運處 mā 講，準講是宅配抑是外送員使用 chit 種月票 mā 無算違規。以後是 m̄ 是會小可調整規則，等待市政府討論。
阿水伯 koh 大聲起來：「Beh 討論啥？規則有啥 thang 討論？君子講出 tio̍h 是話。政府 kah 人民訂 ê 契約，當然 tio̍h 照呼照行，那會使隨便改？若是有一間西式自助餐餐廳總經理，敢懷疑佗一个人客哪會食十盤八盤菜猶 teh 食，而且講出嘴叫經理查看是『何方神聖﹖』Chit 間餐廳按算 beh 倒店 ah！」
柯文哲市長真正 m̄-bat 聽過「敢開飯店，m̄ 驚人大食！」chit 句台灣俗語話？
