斑芝仔花 tng- teh 開

52

(請安裝Taigi Unicode字形,配合Firefox瀏覽器來讀)

作者:蘇晏德

2020年2月21是一个真有意義 ê 日子──世界母語日。彼日 ê 行程是欣賞斑芝仔花,順紲安排一寡田野調查。早時9點對路竹出發,沿國一高速公路,轉台86線快速道路,閣轉國三高速公路,來到白河。


第一站 台南白河林初埤(Lîm-chhe-pi)
林初是白河在地一个人 ê 名,伊 tī chit-ê 所在有一堀足大 ê 水埤仔,因為林初對地方有貢獻,為著記念伊,chiah 號做林初埤。最近5年,cht-ê 所在我大概來beh 20擺。M̄ 管是春夏秋冬我攏會來,斑芝仔花開 tī 2、3月,今仔日 ê 斑芝仔大概開五 siâⁿ。雖罔是拜五,m̄-koh 遊客嘛 bē 少,紅 phàⁿ-phàⁿ ê 斑芝仔,一蕊一蕊對烏墨墨 ê 花莓(m̂ )puh–出來,新 ê 性命新 ê ǹg 望對 chia 開始。除了斑芝仔,林初埤迷人閣妖嬌,粉紅色 ê 風鈴花嘛出來 kā 我 ia̍t 手。紅色、柑仔色 ê 斑芝仔閣加上粉紅 ê 風鈴花,kā 林初埤 chit-ê 單純 ê 少女 chng-thāⁿ kah 媠噹噹。Tī-chia 看 tio̍h 一 pû 用稻草所編做 ê 倉庫,我  知台語按怎講,tú 好有聽 tio̍h 對雲林來參觀 ê 人講:「這叫做 pòng-pūn」,另外一人講:「古亭 pūn」,ta̍k 所在講法無仝。Beh 離開林初埤 ê 時,tī-hia kā 一个少年家買一鑵玻璃珠仔汽水,感受一下仔囡仔時代 ê 趣味。順紲 kā 伊講今仔日是世界母語日,少年人講台語比阮 chē 歲人講台語較值錢。


第二站 台南後壁區菁(chheⁿ)寮老街
Sóa 跤離開林初埤,隔壁 tio̍h 是後壁區 ê 土溝社區,車來到台1線,peh chiūⁿ 後壁陸橋倒 oat,沿著南82線勻勻仔駛,tio̍h 到菁寮老街。Chia 是真出名 ê 無米樂菁寮嫁妝老街,轟動武林驚動萬教 ê 崑濱伯–à,tio̍h 是蹛 tī-chia。有台語連續劇 tī-chia 取景拍片,因為 chia 保留真濟古早時代 ê 元素。來到 chia 已經中晝12點40 ah,代先來享受一頓割稻仔飯 ê 滋味,閣來 se̍h 一下仔老街,回想一下仔古早古早 ê 記 kî,順紲買一寡菁寮囡仔所做 ê 食物。Teh 食割稻仔飯 ê 時,熟似頭家黃永全先生,伊是菁寮社區 ê 導覽員,嘛是農村再生 ê 專家,一面食飯一面聽伊話山話水。聽講 chia-ê 天主教堂,有一个外國神父足 gâu 講台語,本 chiâⁿ beh 去拜訪,m̄-koh 時間無 tú 好,只好伴著 m̄ 甘 ê 心離開菁寮。


第三站 嘉義縣水上鄉赤蘭溪駁岸
赤蘭溪是八掌溪 ê 支流。離開菁寮老街,車沿台1線轉台82線快速道路,來到165線水上鄉赤蘭溪駁岸。一 lo̍h 交流道,遠遠 tō 有看 tio̍h 一 bô͘ 一 bô͘ 粉紅色 ê 風鈴花,雖然 kan-na 五欉花,m̄-koh kā 無 tap 無 sap ê 駁岸妝甲媠媠,hō͘ 赤蘭溪駁岸親像抹粉點胭脂 ê 少女。因為 chia m̄ 是濟濟人知影 ê 地點,chit-ê 所在較 bih-sì,有加添一點仔神祕感。人講樹大欉 ē-tàng 做雨篷,花大蕊看起來較媠,相機 chhia̍k、chhia̍k、chhia̍k hip hō͘ 過癮,tī-chia 大約一點鐘久,徙跤 kā 赤蘭溪講再會。


第四站 台南鹽(kiâm)水台灣詩路
車 chiūⁿ 台82線快速道路轉台19甲線,來到台灣詩路。鹽水郊外 ê 田寮里,有一條真特別 ê 台灣詩路,詩路雙爿攏是種斑芝仔,今仔日 ê 花大約開二 siâⁿ niā-niā。雖罔猶無 kài chhia-iāⁿ,m̄-koh chia 是我思思念念 ê 所在,因為我 ê 情人蹛 tī-chia。M̄ 管斑芝仔花開花謝,一年四季我攏會來台灣詩路走 chhōe 詩人 ê 形影。有足 chē 我熟似 ê 詩人,in ê 詩攏 tī-chia,有閒請你來 kah 詩人鬥陣吟詩,beh 寫詩 ē-tàng 來台灣詩路 chhōe 靈感。最後 beh 說明一下,斑芝仔花華語叫做「木棉花」,台語千萬 m̄-thang 講 bo̍k-mî-hoe。

我有話要說