三王來朝?!

42

(請安裝Taigi Unicode字形,配合Firefox瀏覽器來讀)

作者:林碧堂(台灣教會公報台文版主編)

就目前所知 ê 歷史文獻,主顯節上早出現佇主後3世紀,當時佇埃及 ê 亞歷山大城,有基督徒慶祝耶穌受洗禮,歡喜上帝 ê 子佇世間顯明。後來西方 ê 教會用主顯節期記念耶穌受洗禮、三博士朝見耶穌以及耶穌佇迦南婚宴 ê 神蹟。選佇正月初6,是因為 hit 日亞歷山大城慶祝 Aion 這個掌管時間 kap 永遠 ê 神明 ê 節期。基督徒無慶祝其他神明 ê 節期,所以將節期 ê 內涵轉化。台灣也有類似 ê 情形,一般民間信仰認為農曆7月是鬼月,要中元普渡,khiàn-sńg 真濟;基督徒將鬼月轉換,變做平安7月暝。

3世紀 ê 基督徒,將太陽神生日 ê 12月25日,定做聖誕節,新年 ê 開始;將時間神 ê 節期定做主顯節;用教會 ê 節期取代以前存在 ê 節期,攏是欲主張耶穌才是真正 ê 神。上清楚 ê,是早前攏是用皇帝做王第幾年來計算,kàu-taⁿ koh 有,親像現在日本猶有年號。Koh 譬如 July(7月)是記念 Julius Caesar;August(8月)是記念凱撒‧奧古斯都,表示皇帝是神 ê 代表,甚至是神。後來 ê 基督徒是用主後 kap 主前來算年;因為「普世」概念,最近大眾才改做公元幾年。教會節期 beh 記念 ê 代誌,可能有重要 ê 意義。

三博士 ê 起源 kap 講法

馬太福音 ê 經文是1世紀形成,經文講,有幾 nā 个博士 tùi 東方來到耶路撒冷;3世紀 ê 時,教會 ê 教父俄利根(Origen)代先講出三个博士,他可能因為禮物有三項,就認定為前來朝覲耶穌 ê 博士有三位。6世紀,有人提起三位博士是國王。9世紀,三个王 ê名 Caspar、Melchior 以及 Balthasar 開始大大流傳。有傳說講起,4世紀初,君士坦丁佇戰爭前看到異象,天頂有十字架,koh 有聲講:「用這記號,你會贏過對敵。」後來君士坦丁得勝做皇帝,基督教成做羅馬帝國合法 ê 宗教。有皇帝做靠山,基督教大大進展。

君士坦丁為著表示敬虔,佇今仔日 ê 土耳其伊斯坦堡起造聖蘇菲亞禮拜堂,叫他 ê 老母 Helena 收集神聖 ê 物件,親像釘耶穌 ê 十字架、耶穌頭頂 ê 莿-phè 以及三博士 ê 遺骨等等。後來,這三副遺骨,hō͘ Mauricius 皇帝佇6世紀徙去義大利 ê 米蘭。12世紀 ê 時,神聖羅馬帝國 ê 皇帝腓特烈一世發動戰爭占領義大利,他將三王 ê 遺骨當作禮物送 hō͘ 科隆大主教 Rainald von Dassel,報答科隆主教 ê 軍隊支援。後來ê 科隆主教委託打金仔師傅用25年製作金棺材,科隆因為三王金棺材吸引全歐洲 ê 朝聖者。1248年,當時 ê 主教 Konrad von Hochstaden,主持建造 thang 坐5500人 ê 大禮拜堂來滿足朝聖者;起到600外年後 ê 1880年才完成。咱若去參觀科隆主教座堂,就會看 tio̍h 這个三王金棺材。

咱無才調查三王骨骸、其他 ê 聖物到底是毋是真。不過,咱知,16世紀 ê 時,馬丁路德徛起 ê 威登堡內面,佇 Castle Church 這個禮拜堂就有5005項聖物,咱今仔日會知,是因為當時分封 ê 王 Frederickthe Wise 熱心收集聖物,他為著叫逐家也來威登堡朝聖,就請人畫圖,記錄所有 ê 收藏,裡面包含摩西 kap 亞倫 ê 枴仔、著火 ê 莿-phè ê 灰、幾滴耶穌 ê 母親馬利亞 ê 奶、耶穌用過 ê jiō-chū-á(尿苴仔)、博士獻 hō͘ 耶穌 ê 金仔 ê 碎片、耶穌 kap 門徒最後 ê 暗頓吃 ê pháng;另外,佇德國 Halle 城市就有超過8000件聖物,有耶穌佇迦南婚宴變成 ê 酒、甚至有上帝用來創造亞當 ê 土粉。這些聖物真正是非常奇妙。

耶穌險被害死?

傳說故事先講到遮,咱必須重新思考,聖經內面博士朝見耶穌 ê 記載,演變做三王拜耶穌,到現在濟濟人去科隆參觀三王骨骸,對咱有啥物啟發?咱就發現,其實,千幾年以來,濟濟 ê 王 kap 貴族通過金錢以及戰爭得到所謂神聖 ê 物件來展示「敬虔」、表明「上帝幫助」、得到「上帝 ê 保庇」。韓國 ê 作家金芝河佇〈戴金冠 ê 耶穌〉中有寫著一名刻薄對待喪鄉人 ê 公司頭家,這位頭家總是向頭戴金王冠 ê 耶穌像祈禱講:「耶穌啊,金 ê 王冠實在適合祢這位萬王 ê 王,祢戴起來實在好看緣投,祢 nā hō͘ 我賺大錢,明年 ê 聖誕節,我就 hō͘ 祢全身軀 lóng 框金,我絕對 bōe 白賊,而且,我欲奉獻建立濟濟大 koh 勇 ê 禮拜堂,bōe 親像當時韓國政府起 ê 大樓倒倒去!」Taⁿ 佇台北,有幾間專門為企業家 kap 好額人設立 ê 教會,in ê 禮拜 kap 祈禱 kám-ū 各樣?

M̄-koh,東方幾个博士演變做三王朝拜耶穌 ê 故事, kám 真正是按呢?經文講:「當希律王 ê 時,耶穌已經出世 tī 猶太 ê 伯利恆,有幾 nā 个博士 tùi 東方來到耶路撒冷,講,出世做猶太人 ê 王 ê tī tá-lo̍h?因為阮 tī 東方有看見伊 ê 星,chiah 來 beh 拜伊」。希律,是受著羅馬帝國指派管理猶大地方 ê 王。羅馬帝國拜 ê 星是 Jupiter(木星),意思是眾神之王;凱撒‧奧古斯都是神 ê 子,是 Jupiter ê 子。羅馬通過拜眾神 ê 王,得眾神 ê 王 Jupiter ê 保庇,羅馬皇帝發動戰爭,通過征服其他所在,來得著帝國 ê 和平 kap 財富。耶穌 ê 星 hām 戰神 ê 星有仝款無?

耶穌 ê 星引導東方 ê 博士來朝拜。東方博士看著京城就入去,紲發現不是佇遮。In 出耶路撒冷了後,看著星,就大歡喜,跟隨星 ê 引 chhōa 找著耶穌。其實,伯利恆到耶路撒冷只有行路兩點鐘 ê 路程,若按呢,博士為怎樣無對頭到尾就隨星 ê 腳步繼續行?反轉看到王宮就入去?咱想轉來,發現博士毋是對逐項代誌攏判斷正確,博士因為家己心中原本對王 ê 理解 kap 想法,走去王宮見希律,間接 hō͘ 伯利恆 ê 濟濟囡仔 hông 刣死、險險將耶穌害死。

根據馬太福音,希律王為著家己 ê 王位殺害嬰孩。佇現存 ê 歷史記載中,希律殺害家己 ê 太太、丈母以及家己 ê 三个子。希律得到穩固 ê 王權,是通過金錢o͘-se 羅馬帝國,是通過戰爭得著猶太地,是得著大祭司家族 kap 民間文士 ê 合作,想欲用起新 ê 聖殿來 hō͘人民因為宗教 ê 理由來支持他。科隆主教座堂三王金棺材 ê 傳說演變,講起世代以來,列王統治 ê 縮影攏 hām 希律當時 ê 帝國 kap 祭司系統仝款攏結黨做伙,無欲放棄自身 ê 利益、地位以及名聲,無欲真正去拜新 ê 猶太人 ê 王耶穌。反轉是東方外邦 ê 博士真正去拜耶穌。

東方博士拍開寶盒,佇猶是嬰孩 ê 耶穌面前獻上禮物。寶盒內面有代表錢財 ê 黃金、佇宗教禮儀中用來祭神 ê 乳香、提來抹屍體 ê 沒藥。Chiah-ê 物件表明 in 是世間 ê 王,但是,佇耶穌面前,in 攏總 pàng-sak。Chiah-ê 博士、chiah-ê 王放棄財寶、放棄最高 ê 宗教地位、放棄製造濟濟屍體 ê 戰爭。In hō͘ 耶穌做王。

主顯節期 ê 反省

救主顯明,三博士、三王改換 in 久長以來對王 ê 概念。祭司 kap 經學士選擇徛佇希律王 hit-pêng,殺害任何未來可能做王、任何威脅到 in 地位與利益 ê人。馬利亞 kap 約瑟保護嬰孩耶穌。咱 ê 國家是怎樣做?世間 ê 商業鉅子、宗教領袖、國家統治者 koh 是怎樣?咱是何種角色?佇主顯節期 ê 時,ǹg-bāng 咱通過聖神 ê 引 chhōa,來實踐三王朝覲耶穌 ê 意義。

 圖一,主後6世紀 ê mosaic,佇義大利 Ravenna ê Sant’ Apollinare Nuovo,東方三博士手捧禮物,跟隨星 ê 引導去伯利恆。三博士已經有名。

 

圖二,主後12世紀,雕刻師 Gislebertus ê 作品 ,佇法國 ê Autun Cathedral,博士已經成做國王。

圖三,德國科隆主教座堂 ê 三王金棺材。

(本版相片來源/維基百科)

我有話要說