黑面耶穌 kap 黑面馬利亞

10

(請安裝Taigi Unicode字形,配合Firefox瀏覽器來讀)

作者:陳柏壽

前年 ê 美國因為發生幾擺警察拍死黑人事件,黑白衝突開始表面化,尤其是有人佇文章鼓吹,罵黑人做「黑鬼」,hō͘ 濟濟台灣人絞入去混亂 ê 漩渦,hō͘ 人 chhōe 無路。

這世間最大不公不義 ê 代誌,就是黑人來世間出世 ê 第一日就 hō͘ 人看無起,看做二等人。以前佇台灣猶無感覺,來到美國牧會以後,才知咱台灣人看輕黑人比白人看輕黑人閣較嚴重,in 講花園內上帝創造 ê 花有紅有白,但是黑 ê 真少,表示黑 ê 是䆀,無人插黑花佇頭殼頂面。

4、50年前 tú 來美國讀冊 ê 時,感覺美國學校、報紙、社會稱呼毋是白人 ê人攏叫做「有色人種」(people of color/colored people),我心內對這種稱呼感覺 ngai-gio̍h ngai-gio̍h,感覺 in 想講「白色」毋是色,別款人 ê 皮膚攏是「有色」。這種稱呼人 ê 方法到今仔日猶無啥改變。雖然按呢講,咱台灣人對黑人ê 歧視袂較輸白人。佳哉阮教會洪長老 ê查某囝去嫁黑人,閣生2位咖啡色 ê 囝,真得人疼。

幾百年來因為西方 ê 物質文明壯大,軍事力量真強,閣四界去占別人 ê 土地,所以認為別人 ê 文明 kap 人種攏較下等。對人 ê 審美觀念,包括真濟咱台灣人、日本人在內,攏受著西方文化 ê瞞騙,自然而然攏感覺白 ê 較媠,黑 ê較䆀。這點佇文化 ê 霸權 kap 競爭上,咱對開始已經輸。

本土化 ê 信仰面貌

前年去參加歐洲台灣人同鄉會,去到希臘,才發現真濟庄腳 ê 東方正教 ê 小教會內面拜 ê 馬利亞 kap 嬰孩耶穌,攏是黑面 ê。去到埃及嘛是仝款。這个情境對我是一个真大 ê 刺激 kap 啟發。

17世紀中旬,日本德川幕府開始迫害基督徒,尤其是西部長崎 ê 五島列島地區,總共處死3萬7000位日本基督徒。但是對彼時陣開始,佇日本有信上帝 ê 人,將 in ê 信仰進化、內化,變做隱身ê 基督徒(kakure krishitan),in 佇心內將馬利亞 ê 面形藏落去土底,hō͘ 伊變做「馬利亞觀音」:外口看是像日本觀音,內底是馬利亞。彼个地區到今猶維持這種真特殊 ê 信仰形式。

我想著中國 ê 白面媽祖出海來到台灣,煞變做黑面媽,因為伊一日到暗為著擔水飼家顧囝,舞到歸面黑黑黑。台灣 ê 宗教演變就是咱台灣人 ê 心路歷程,所以咱 ê 出海媽變做一个黑面媽是有原因 ê。咱台灣 ê 民間雖然有真強 ê媽祖信仰,雖然受著中國文化 ê 影響真大,信仰 ê 形態 kap 內容變質真濟。但是咱若是對正面方向去思考,將來嘛有可能演變做台灣人 ê「馬利亞媽祖」,因為無論是教義、理念、精神、面形各方面看,這二位神明真會當互相回應 kap交通,咱台灣人應該真容易去塑造台灣人 ê 馬利亞 kap 台灣人 ê 媽祖婆,將 in連做伙。這並毋是非常困難 ê 代誌,嘛自然有伊正面 ê 意義。

我想這世間任何宗教攏繼續 teh 本土化、在地化,歷史以來控制教條上嚴格ê 天主教,到今仔日嘛已經演變到天下多元 ê 教義。基督教閣較免講。

我想上帝欲愛 ê 世界毋是「世界大同」,伊是愛「世界大不同」,親像伊佇創世記交代世間人 ê 命令按呢(創世記9章1節)。毋但按呢,上帝降生來到地面,毋是繼續飛佇天頂,是 hō͘ 咱知上帝是 kap 咱 ê 土地結連做伙,上帝認定咱人是土粉,伊嘛是來世間做土粉,上帝認定黑土是咱 ê 基礎 kap 基地。

歷代以來,無人會當證明耶穌是啥物色 ê 人,嘛無人知伊爸母約瑟 kap 馬利亞是啥物款色 ê 人,因為加利利是四面八方各種人出出入入 ê 交通中心,是東西貿易 ê 中心,是人種文化貨物交流ê 所在。上帝安排耶穌出世佇遐,實在是上高 ê 攝理。因為對耶穌出世佇加利利,世間人無啥物好相爭,因為按呢表示世間人種一切平等,所有人攏是上帝ê 囝,無法度用膚色互相比並。

 

我 ê 信仰歷程

我佇紐約協和神學院讀冊 ê 時,教我ê 一位黑人老師名叫做 James Cone,伊寫一本冊叫做《黑人 ê 解放神學》(A Black Theology of Liberation ),這本冊影響真濟學生,特別是黑人學生,漸漸發展出一種黑面耶穌 ê 神學,這是現代 ê宗教產物。

我將信仰 ê 中心對白人耶穌,轉換做黑面耶穌,是我將上帝內化入去我心靈ê 過程。我雖然毋是黑面,但是面對白人文化高壓 ê 勢力,我心靈中最大 ê 掙扎 kap 最後 ê 發現,就是發現這位受苦 ê黑面耶穌,來世間卻無位好來出世,最後生佇寒冷孤單 ê 伯利恆 ê 馬槽內面。伊來世間面對宗教 kap 政治 ê 惡勢力,hō͘ 人欺侮、窘逐、壓迫,最後 hō͘ 人釘死佇十字架頂,伊上清楚 ê 象徵就是一位黑面耶穌。

上帝來世間是來做咱 ê 土壤,是 hō͘ 人踳踏 ê 塗跤,是 hō͘ 人看無起 ê 人物。伊所傳 ê 福音 ê 真諦 kap 逆理,是叫咱世間人著疼世間至微細 ê 人、散赤人、艱苦人,親像咱著疼惜咱身軀愈下跤 ê 部分仝款,咱看咱下面彼二支跤:咱 ê 二支跤規日 kap o͘-mà-mà ê 土粉 lo̍k-kô͘-moâiⁿ黏黏做伙,伊偝著咱重 ìⁿ-ìⁿ 歸身軀,chhōa 咱行去世界咱愛去 ê 所在。實在想起來,咱經過一世人,下面 ê 二支腳比頂面 ê 頭殼閣較重要,咱著閣較保護疼惜伊才著(哥林多前書12章22~23節)。

咱 ê 祖先無論起頭是對叼位來,in 生活佇台灣是對耕作拖磨做穡開始,咱會使講攏是農奴 ê 囝孫,咱攏是黑腳出身ê 民族,咱攏是為著生存出外開拓拚天下 ê 人,kap 咱敬拜 ê 黑面耶穌 ê 出身完全仝款。咱是流浪天涯 ê 無位通去 ê 出外人。真濟佇世界各地 ê 台灣人攏是偝著這款流浪精神 ê 黑面台灣人。

我對一个毋是基督教世家 ê 散赤家庭出身,會使講是經過千山萬水,經過叢林惡勢力 ê 壓迫,才來到今仔日。我回想我信仰 ê 根本,目睭禠開看著較濟是黑土,不得不迫我去 chhōe 咱 ê 主耶穌ê 根,去 chhōe 一位對我有同情、同心、同苦、同命 ê 上帝。咱 kap 主耶穌 ê 結合毋但是佇咱 ê 外貌,閣是較佇咱 kap所有受苦同胞 ê 運命 ê 結合,這个結合ê 意思就是去迎接上帝進入咱內心 ê 結合。最後咱來去 chhōe 著 ê 上帝,會就是這位黑面耶穌以及黑面馬利亞,in 實在活佇咱 ê 靈魂內面。

我有話要說