Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k.
請安裝Taigi Unicode字形，配合Firefox瀏覽器來讀。
Má-khó（馬可福音書） 3章13~35節
台譯：王美書
耶穌 ê 老母 kap 伊 ê 兄弟來，徛佇外面，差人去叫伊。有一陣人坐佇耶穌周圍；有人給伊講：「你看，你 ê 老母 kap 你 ê 小弟小妹佇外面欲尋你！」耶穌應講：「啥物人是我 ê 老母、我 ê 兄弟？」然後伊對坐佇周圍 ê 人一个一个給 in 看，講：「恁看，我 ê 老母，我 ê 兄弟！實行上帝旨意 ê 人就是我 ê 兄弟、姊妹，及老母。」（Má-khó 3章31～35節，現代台語譯本）
正港 ê 親人
耶穌厝內 ê 人干單對重家族 ê 名聲 mài 拍壞（認為耶穌起痟），耶路撒冷 ê 法律教師排斥耶穌 kap 祂所傳 ê 信息。但是，耶穌講，實行上主旨意 ê 人，就成做耶穌正港 ê 親人。耶穌對新家庭 ê 想像超越當時文化、宗教 kap 社會 ê 理解，對現代 ê 基督徒來講也非常困難。
雖然咱佇教會中間，攏用兄弟姊妹來相借問，總是，咱有去實踐上主 ê 旨意無？上主 ê 旨意是啥物？佇馬可福音內面，耶穌醫病、趕鬼，hō͘ 人對束縛 kap 驚惶中得到自由，重新落實信仰 ê 基本精神，引導人活出上主旨意（疼上主 koh 疼厝邊） ê 真實款式。
林美瑢1984年參加台南神學院舉辦 ê 母親節音樂會，看著舞臺頂一陣哭 kah 目屎流目屎滴 ê 阿美族女性，她去探問了後，才知影 chiah-ê 婦人人 ê 丈夫攏是討海人，hō͘ 他國政府扣留。這是因為台灣佇國際頂面無國格，遠洋漁船不時 hō͘ 外國政府扣押，漁民被他國掠走、hông 摃番頭（kòng-hoan-thâu，華語：擄人勒贖）；當時 ê 濟濟原住民漁工（taⁿ 是外國移工）不時受著船頭家 ê 欺負。1986年，林美瑢 kap 一寡有志佇台灣基督長老教會體制內面成立漁民中心，透過非政府組織救援、關懷傷殘 ê 漁工。漁民中心繼續運作直到今仔日，真正成做耶穌 ê 親人。
祈禱 ：Hō͘ 阮佇祢 ê 疼內面結連成做大家族 ê 主啊，求祢用疼充滿阮，hō͘ 阮好款待困苦軟弱 ê 人，行祢 ê 旨意，疼人親像家己，真正成做主耶穌 ê 親人。奉主耶穌基督 ê 名求，阿們。
請參考台灣基督長老教會漁民中心5週年特輯
《補漁網 Pó͘-hî-bāng》https://www.pubu.com.tw/ebook/66289
延伸閱讀：【少年新眼光台語版】
