(請安裝Taigi Unicode字形，配合Firefox瀏覽器來讀)
作者：李南衡
董娘看 tio̍h 80 歲 ê 阿姨來 in 兜，目屎流 bē 離，哭講：阿姨，你知影我偌呢苦戰？阿姨緊 the̍h 手巾仔 kā 拭目屎勸講：M̄ 好 háu，有話慢慢仔講。
講起 hit-ê「小三」實在真橫逆！竟然拍電話來講：你 chit-ê 老查某人，無人愛你 ah-lah，恁翁當然 mā khah 合意我 chit 號幼齒 ê。你乖乖看我接收恁翁。
阿姨輕聲細說講，恁台北囝仔，m̄ 知影咱佇庄腳倚山邊 ê 故鄉，差不多家家戶戶攏有飼雞仔鴨仔。日時攏 mā 放雞仔佇庭裡、樹仔跤四界去。有時會有鴟鴞（bā-hio̍h「老鷹」）飛來巡視，看有細隻雞仔，伊 tio̍h 會那像戰鬥機「Siŭ」一下衝落來咬去。囝仔若看 tio̍h 鴟鴞佇咱頭殼頂飛，tio̍h 會大細聲喝咻，有 ê 會夯竹篙 beh 拍鴟鴞。鴟鴞飛走了，明仔後日伊 tio̍h koh 飛來。所以咱庄腳有一句俗語話講：「關雞母，無拍鴟鴞。（Koaiⁿ ke-bó, bô phah bā-hio̍h.）」
董娘問講，我 leh 講阮翁，阿姨那會講對拍鴟鴞去？阿姨講，道理仝款。我講關雞母，m̄ 是 kā 恁阿明關死死顧 tiâu-tiâu。你 m̄ 知咱庄腳早前有一種職業叫作「牽豬哥」，一个人牽一隻豬哥，一庄行過一庄，去 chhōe beh 拍種 ê 豬母，伊一天行幾仔里路 mā 誠輕鬆，撇步是「軟索牽豬」，手裡牽一條兩米外長 ê 軟索仔縛佇豬哥身上，出在勇 koh 有力 ê 豬哥走過來 chông 過去無一時閒。豬哥按怎 chông mā bē 走出去。軟索牽豬，m̄ 是叫你一日到暗 kā 恁阿明管緊緊、顧 tiâu-tiâu。Tio̍h 佇恁阿明身上縛一條無形 ê 軟索，無論伊按怎走 chông 都攏無法度脫離 hit 條軟索。Hit 條軟索用啥做 ê？你 ê 溫柔 kah 體貼。一個查埔人無論伊佇外面按怎花，總是那像作賊會心虛，你大細聲罵 koh 唸 bē 煞，伊會見笑轉受氣，烏白來發脾氣。但是，你準明知一寡代誌 mā tio̍h 完全 tèⁿ m̄ 知、激戇戇。你若笑頭笑面、溫柔體貼，伊完全 m̄ 知 beh 按怎 kā 你解說，重點是免解說。伊無論按怎講，你攏微微仔笑恬恬仔聽、攏 mài 烏白插嘴，講久伊才發現世間上愛聽伊講話 ê 人原來是身軀邊 ê 你。以後，伊猶有啥物心內話 bē 對你講咧？
鴟鴞一隻趕了，另外一隻 tio̍h koh 飛來，只要恁阿明猶 koh teh 賺大錢，一定 tio̍h 有鴟鴞會飛來。上驚鴟鴞佇叼位飛你 m̄ 知，伊敢拍電話來 chhōe 你，上好。你 kah 恁後生查某子三個人鬥起來，比啥都 khah 大，你 tio̍h 老神在在啥物攏 m̄ 驚。Hit-ê 查某若拍電話來，你 tio̍h 嘴笑面笑 kā 講：真多謝，你 kā 阮翁照顧 kah chiah 好勢，伊定定 mā 佇我 ê 頭前謳咾你，講你誠溫柔！伊若 koh 拍電話來，一遍謳咾伊聲誠好聽，一遍講阮翁講你真 gâu 穿衫。幾遍了後伊 tio̍h bē koh 拍電話來。
問真濟人，攏 m̄ 知影鴟鴞是啥，相信 chit 句俗語話流傳 bē 久。
