(請安裝Taigi Unicode字形，配合Firefox瀏覽器來讀)
作者：Lîm Chùn-io̍k
阿昱 tī 暑假 chhōa 牽手 kah 國校一年 á ê cha-bó͘ kiáⁿ 阿恩去日月潭遊覽，in tòa hit 當時唯一 ê 大飯店涵碧樓。
透早 in 三人歡歡喜喜 tī 涵碧樓 ê 四kho͘ 圍 á 散步，欣賞美麗 ê 風景，呼吸新鮮 ê 空氣，這是 in 遠離 ak-chak ê 市內來 chia 度假 ê 目的。大飯店 ê 餐廳開門 ê 時，in to̍h 入去食早頓。
服務生親切 kā in àn-nāi 坐落來，阿昱看 tio̍h hiah 大間 ê 餐廳 kan-taⁿ 坐一个人客 tī 靠潭 ê 窗 á 邊，一看 to̍h 認出是蔣行政院長 tī hia teh 食西餐。院長看 tio̍h in mā kā in ia̍t 手招呼，kiám-chhái 是餐廳 ê 內規 tio̍h kah 院長保持社交距離五公尺，因為院長 hit 當時有相當 ê 威嚴。
阿昱點台菜清糜；食到一半 ê 時，院長食飽行 óa 來，kah 阿昱握手。福相 ê 笑面開嘴 to̍h 講：「Lín 吃糜！？」阿昱真自然回答講：「阮是農家子弟，慣勢食糜。」「Oh！我 ài 交農家朋友。我 kah 林縣長約會 ê 時間 iáu 有30分鐘久，我 kám ē-sái kah 你開講？」阿昱感覺 ká-ná 是天頂 lak 落來 ê 好機會，歡喜 kah bē 講得，kā 邊 á ê 椅 á 拖出來，講：「院長，請坐。我真歡喜 ē-tàng kah 院長講話！」
院長開嘴 to̍h 講：「你 ê 故鄉是 tó 位？」阿昱趕緊應講：「國姓鄉北山村，to̍h 是台中到日月潭 ê 公路邊。」院長嘴笑目笑講：「Ǒ͘ -oh！請你講你 ê 農家子弟故事 hō͘ 我聽 kám 好？」阿昱心內免打草稿，ká-ná 能高圳 ê 水流，講：「阮老父耕作九分 gōa 地 ê 水田，為 tio̍h 阮三兄弟 ê 教育費用，tī 伊49歲（1968年）to̍h 過勞死去。」阿昱講到 chia 停頓一下。
院長看 tio̍h 阿昱 teh kâm 目屎，to̍h 安慰伊講：「真 甘！我知農民家庭真 pháiⁿ 過日子，你有啥物苦情，做你講。」阿昱想講這是難得 ê 機會，to̍h 繼續講：「我 siōng ē 記得細漢 ê 時，阮老父 siōng 艱苦心 ê tāi-chì to̍h 是『粟 á 換肥料』（肥料換榖）。我讀大學一年 á ê 暑假，因為阮老父破病，伊叫我 tòe 鐵牛 á 車載粟 á 去國姓鄉農會換肥料。阮老父交帶 tio̍h 對農會總幹事 khah 客氣 leh，伊 lóng ē 講阮 ê 粟 á 無夠 ta，ē hō͘ 我換 khah 少 ê 肥料。Chit-ê 總幹事 ê kiáⁿ 讀國校 á ê 時 kah 我仝班，伊 ê 成績總是第二名，排 tī 我 ê 後壁，我 mā 有感覺 in ê 嫉妒心。」
阿昱 chit 時 ká-ná 嚨喉 kê-kê，院長看出伊 ê 艱苦心，就講：「Chit-ê『肥料換榖』ê 政策對農民是剝削 ê pháiⁿ 策施；我有讀過李登輝先生ê五篇改革『肥料換榖』ê 建議論文，伊一直 teh 提倡 tio̍h 廢除『肥料換榖』ê 惡法，m̄-koh，hit 時kan-taⁿ 伊一人主張廢除『肥料換榖』，hiah-ê 體制內 ê 既得利益者 koh teh 作怪，到六年前（1973年）chiah 廢除，to̍h 是 lín 老父過身五年了後，lín 老父 mā 是『肥料換榖』ê 受害者，我感覺對你有虧欠。」
阿昱心內知知李登輝總統對台灣人 ê 貢獻，尤其是對台灣農民。伊聽 tio̍h 院長最後 hit 句「我感覺對你有虧欠」，就 án-ne 恬落來。M̄-koh，院長繼續講：
「李登輝是一个真正疼台灣 ê 人，伊真正用基督 ê 疼心 teh 疼台灣人，我真歡喜有伊 ē-tàng 協助我來完成建設台灣 ê 工作。」
Tú 洗禮兩年久 ê 阿昱，聽 tio̍h 院長 chit 句「用基督 ê 疼心 teh 疼台灣人」，心內感覺真意愛有 khah chē 人來疼台灣。
