(請安裝Taigi Unicode字形，配合Firefox瀏覽器來讀)
高雄市楠仔坑國小學生，指導老師：洪憶心
葉子齊（6年7班 Ia̍p Chú-chê）
這遍我去參加《旺來西瓜仙拚仙》節目，實在是足緊張–ê，因為老師派我 kah 小妹表演劍道。雖然緊張，put-jī-kò 有小妹陪伴 khah 袂 hiah 驚。主持人有問我是按怎會學劍道，是阮阿爸有 hō͘ 阮看過《劍道小精靈》ê 電影，koh 有阿爸阿母 ê 鼓勵，所以阮兄妹仔攏做伙學劍道。主持人 kā 我訪問足 chē neh，m̄-koh 攏鉸掉–ah，無彩！這擺去公視 ê 表演 hō͘ 我 ke 足有自信–ê，阮這隊 mā 有 tio̍h 獎金 kah 獎盃！
李秉毅（6年8班 Lí Péng-gē）
彼工去錄影我足緊張–ê，驚會 thut-chhôe。M̄ -koh 去攝影棚了後，頭拄仔 ê 緊張完全消失去–ah，換來 ê 新鮮感摻一點點仔 ê 興奮，原來這 tō 是演員拍片 ê 所在。等到輪 tio̍h 阮錄影 ê 時，我 koh 開始緊張–ah，足 kiaⁿ–ah 會因為我害著阮這隊輸去。好佳哉！阮這隊有贏 tio̍h 比賽，真正是祖公仔有保庇。
彼一暝，我提 tio̍h 比賽得 tio̍h ê 獎金，抱 tio̍h 歡喜 ê 心情坐高鐵轉來高雄，到厝看 tio̍h 阿爸阿母，我一直 kah in 分享講錄影有 gōa 好 sńg、gōa 趣味。
上好 sńg ê 是 tia̍k 算盤，beh 去提物件 ê 時感覺煩惱攏放袂記–ah，心情足輕鬆，算錢 ê 時陣 soah 顛倒緊張 kah 連話攏講袂清楚，尾仔，贏–ah！心情 hām 我提 ê 尪仔仝款足 súi！
彼一暗，我 mā 是歡喜 kah 睏袂去，真希望 koh 有後擺 ê 機會 koh 來去電視台錄影！
蘇奕安（6年1班 So͘ Ek-an）
這擺去電視台錄影我足歡喜，因為這是我第一擺上電視，嘛是第一擺去到電視台。
遐，冷氣有夠冷，好佳哉是熱–人，所以袂感覺寒，顛倒我感覺真爽快。
我去遐學 tio̍h 足 chē 智識，像總統府 ê 各種智識，原來壁邊 ê 孔竟然是 leh tàn 糞埽–ê，阮攏 ioh m̄-tio̍h，原來看燈 tō 知影總統有 tī「厝」無！
雖然有 ê 是 ioh–ê，-koh 我 mā 感覺足讚–ê！
吳辰紜（6年4班 Ngô͘ Sîn-ûn）
這是我頭一擺去公視錄影，是緊張 koh 歡喜，因為這全世界 ê 人攏看會 tio̍h neh！
攝影棚內底足大、足 chē 攝影機！喔～～原來攝影棚生做按呢！阮感覺真神奇，-koh kah 我所想 ê 差 kài-chē。
開始錄影是真好 sńg，逐關攏有無仝 ê 物件 ài 試驗，阮有贏 m̄-koh tī 最後 ê 羅馬字彼關輸去–ah，無提 tio̍h 獎金，m̄-koh 我真享受這種難得 ê 過程 kah 經驗，像 tia̍k 算盤逐个 ài kā 金額 pun-pheⁿ 除4份，去頭前提物件，koh 做伙看影片回答問題，這攏 hō͘ 我學 tio̍h 團隊合作 ê 精神。
真感謝老師 hō͘ 我機會 chhōa 阮去參加公視電視台 ê 錄影。
侯萬宏（6年10班 Hâu Bān-hông）
老師 hō͘ 我機會去參加公共電視 ê 錄影，有寡台語我原本袂曉–ê，去到遐那會攏變會曉–ah。
我發覺台北 kah 高雄 ê 腔口無啥仝，雖然大部分攏聽有，m̄-koh 有時仔主持人 in leh 講啥我真正攏聽無。
In ê 腔口我攏 sa 無，因為仝款 ê 物件講兩擺攏講無仝款 ê 音，實在聽 kah 霧煞煞！玻璃杯仔？玻璃襪仔？
「Hî-kng？」尾仔 khah 知影 in leh 講 ê 是魚櫥仔，「魚缸！」
這擺去錄影嘛會當講是去旅行 thit-thô，mā hō͘ 我學 tio̍h以前攏 m̄-bat 有 ê 經驗，我感覺阮 ê 團隊合作足好–ê，m̄-nā 有實力，運氣 mā 真好，希望後擺 koh 有機會去。
