◎鄭良光
阮舉辦「74th 228祭」，主題定做「性命。舌。台灣魂」，是因為阮感覺記念二二八，著愛 kā 咱 hō͘ 外來統治者割斷 ê 舌 chhōe 轉來，按呢台灣魂才會閣活，mā 只有按呢，記念二二八 chiah 有意義。咱大會 ê 宣言收集1000个連署，寄 hō͘ 蔡英文總統。雖然地理上咱離開真遠，雖然減采咱年紀相差兩、三个世代，總是咱 tùi 台灣 ê 疼，kā 咱 kho͘（箍） kah óa-óa-óa！期待咱「74th 228祭」會當 hō͘咱受傷心靈得著醫治，得著新 ê 向望 kap 氣力， hō͘咱對 taⁿ 以後會當勇敢 tī 公共正式 ê 場合，講咱台灣人強欲袂曉講、強欲聽無 ê 台語。
（作者為長老教會長老）
