(請安裝Taigi Unicode字形，配合Firefox瀏覽器來讀)
作者：歹銅舊錫
徛佇遮共時間踅倒轉沓沓仔行踏
沓沓仔 hiau 開 hǒng 袂記 ê 歷史空隙
我 hō͘ 三月 ê 桂花芳雄雄按呢 chhh 倚過來 cha̍k–tio̍h
無人解說你名字佇清國橫霸 ê 天年展現 ê 蔘仔氣
干焦留 hō͘ 後人諍來換去 ê 漢字陪綴一世人
交落 ê 語言提早面對死亡 ê 審判
干焦留 hō͘ 老古博用走韻走調 ê 符碼看有發酵 ê 一工無？
無人替做旬 ê 有應公我假若閣聽會著怹咬牙切齒 ê 咒讖
頭殼額 ê 封條猶原威靈顯赫
軟晡時 sap-sap-á 雨加添這歷史虛幻 ê 苦楚
Ùi 漉糊糜仔路 ná 行 ná 點 to̍h 我 àu 臭 ê 成見
我拚勢坐清不時 chhîⁿ 過來 ê 白霧
好通 hō͘ 四百冬來 ê pit-sûn 收束
有應公伯 ín ê 笑桮（chhiò-poe）敢是應答我醬鹹 ê 詩句
猶原是白汫無味 ê 申訴！
無才調 hō͘ 怹發爐招引做咱敘事 ê 鐵干證
咱 ê 通霄欠一个歷史小說 ê 手路筆
無臭無潲、嘐六 ê 譬喻紹介咱 m̄ 成樣 ê 鄉愁上 kài bā
古早 ê 傳說講交落 ê 鬼仔古 nā 出喙箍就會咬斷喙舌
這攏是怹死目 願瞌 ê 怨
橫渡時間 ê 分流浮漂到 1895 驚蟄
看怹 kā 歷史 ê 輕重七除八扣
彼是啥人刁工妝飾帝國 ê 崩敗
講是欲洗清殖民者坦橫 ê 跤跡
掩崁驚人知影 ê 事情（sū-chêng）真相
咱相倚身過做伙點 to̍h 咱半生熟 ê 記持
你 nauh 一寡無人願意聽 ê 口白
二 pêng 石燭無對 ê 色水敢會是我個人 teh khêng-hun？
Hǒng 磨去 ê「昭和」字號欲按怎張鬥你 éng 時 ê 氣魄
斟酌聽，你輕-báng-báng ê 聲嗽不止仔無 ta-ôa
凍露漂雨一路行來，雄雄 phong 一聲！
共我拖到 1945 ê 路頭，看著
彼門慣勢守護大海 ê 孤炮
M̄ 知是 teh 罰徛 á-sī 反背家己 ê 天命
坦倒佇邊仔 ê 鐵錨仔
幔一身軀鉎（sian）敢等會著洗清身世 ê 一日
無影無跡 ê 借詞講是咱人有耳無喙 ê sai-khia 話
信篤篤承擔這筆誤是你一生 ê 歧義
是鎖袂牢我慢分 ê 心情
目睭前 ê 意象一直 ùi 頭殼內 kia̍t–過-來
向望這殖民 ê 輪迴 知當時才通收山
總–是，我陷佇時間捲螺水坑…… peh 袂出來
—————————————————–
註：通霄，舊名「吞霄」，原本是平埔族道卡斯族「吞霄」（Tonsuyan）社 ê 住所，實際上名 beh 按怎唸，pháng 是無人知–ah，目前 ê 名是日治時代改來–ê。此詩 leh 記發生佇 1699 年「吞霄社事變」，目前苗栗縣通宵鎮大坪頂山十八好漢祠，有座刻「靈魂」二字 ê 石碑，就是吞霄社事變清兵 kap 平埔族相戰骨骸合葬 ê 所在。另外通霄上有名 ê 歷史古蹟，是佇市區北爿虎頭山公園山腰 ê「通霄神社」kap 山頂一座台灣唯一日俄戰爭紀念碑。中國國民黨接收台灣後，soah kā 日本留落來 ê 建築破壞甚至變改。上好 ê 例是 kā 台灣日俄戰爭紀念碑改做「台灣光復紀念埤」，這「碑」筆誤寫做「埤」。這 mā 成做lán 歷史 ê 笑詼 kap 濟濟 知影 beh 按怎講 ê 哀悲。
