(請安裝Taigi Unicode字形，配合Firefox瀏覽器來讀)
作者：陳惠英
阮兜有六个兄弟姊妹仔，我是排第五 ê，老爸捌講，當伊細漢佇日治時期，袂愛讀冊，大來才知影捌字 ê 艱苦。所以，特別注重囡仔 ê 教育，伊講：「閣較艱苦嘛愛艱苦家己，著愛 hō͘ 序細加減仔捌字，較袂輸人傷濟。」自讀國校仔後，下課轉來厝 nih tō 愛鬥做工課，阮老爸掛佇喙邊 ê 彼句話：「恁若去教會讀夏季學校、去讀主日學 ê，攏愛去園仔、去田 nih 鬥做穡。」聽著這句話，較戇 ê 嘛攏欲去教會，坐佇禮拜廳內，罔聽故事、罔呼「a、i、u、oa、oe、oai」，教會這款「夏季學校佮主日學」有羅馬字 ê 教學，按呢敢有啥效果？當然有 no͘h！若是佇彼陣，加減 phah-lo̍h 基礎，今仔日欲哪會曉讀羅馬字？
後來，我 ê 翁婿時常寫羅馬字 ê 文章投稿，逐擺拍好 ê 稿件攏會先提 hō͘ 我過目，看佗位無順、錯字á-sī 有重複 ê，因為按呢迫我閣複習羅馬字。有時，文章會 hō͘ 我想起細漢時仔 ê 代誌，文稿 ê 音佮我日常咧講 ê 口音完全仝款，路尾讀較順閣會感覺心適心適。我發現 ùi 會曉讀欲到會曉寫羅馬字是無仝款ê，愛真拍拚咧，原來，台語 ê 書寫是寫「本調」，若是規句連讀 ê 讀音，逐字攏會自然變調，干焦尾仔字是「本調」。這是「聲調語言」上大 ê 特色，嘛是較歹入門 ê 所在，我感覺台灣人足厲害 ê，大大細細攏會曉自然變調閣袂出差錯。
1950年左右，阮兜 ê 囡仔攏有去教會，讀夏季學校佮主日學。課程除了聽聖經內 ê 宗教故事，唱囡仔歌、唱聖詩佮背金句，彼當時教會猶真重視羅馬字教學。鳳山教會佇禮拜日早起8點到9點半左右，教會主日學有開羅馬字班，請教會 ê 女執事、老姊妹撥時間來教囡仔讀羅馬字。現此時，我去教會禮拜，攏會帶家己咧讀 ê 彼本羅馬字聖經，讀著感覺真親切，較無彩 ê 是，阮兄妹仔干焦賰我佮70外歲ê 大姊，猶有咧讀羅馬字 ê 聖經。佇禮拜中已經真少看著會友 chah 羅馬字聖經來禮拜，時勢咧變動，凡事已經變 kah 方便 tō 好。我 ê 母語、我 ê 祖語，soah 佇方便中、佇無要意中，真緊咧消失。
