(請安裝Taigi Unicode字形，配合Firefox瀏覽器來讀)
作者：林碧堂
摩西是佇啥物時陣發現家己是希伯來人？
HollyWood 電影、 Disney báng-gah kap 濟濟小說創造出逐種無仝 ê 版本。有 ê 佇劇情內面講已經長大成人 ê 摩西，佇無意中聽見公主 kap 當時做伙佇河邊 kā 摩西抾起來 ê 宮女冤家，摩西就知影家己 ê 身分；有 ê 認為是摩西 ê 奶母──就是摩西 ê 親生老母──對摩西講 ê；也有人認為是因為摩西受過割禮，所以摩西 kap 別人鬥陣洗身軀 ê 時發現伊家己 kap 別人無仝。總是，以上 ê 版本 kap 猜測 lóng m̄-sī 經文 ê 描述。
到底，摩西是怎樣覺察自己 ê 身分？「後來摩西已經長成，伊出去到伊 ê 兄弟 hia，看見 in teh 擔 teh；看見一个埃及人 phah 一个希伯來人，就是伊 ê 兄弟。」（出埃及記2章11節，巴克禮漢羅版）咱讀此段經文 ê 前半段 ê 時，傾向認為摩西去探訪 ê「兄弟」是以色列人。但是，12 世紀 ê 猶太拉比 Abraham Ibn Ezra kap 一寡人有 bô-kâng ê 想法，chhōa 咱去探討出現佇這段經文起頭 kap 結尾 ê「兄弟」：
摩西「出去到伊 ê 『兄弟』 hia」，這是 teh 講埃及人（兄弟），因為摩西佇王 ê 宮殿成長。第二擺提起 ê 「伊 ê 兄弟」是指摩西 ê 出身，是指以色列人，就如同亞伯拉罕對羅得講 「咱是兄弟。」（創世記13章8節）所講 ê。
親像 Ibn Ezra 這款理解，摩西 ê 成長過程是一名埃及人。摩西最後 kap 希伯來原生家庭 ê 接觸佇伊斷奶了後就結束；伊身上亦無行過割禮 ê 身分記號； 摩西佇「莿 phè 互火燒」ê 情景中 tú 著上帝 ê 時，摩西甚至 m̄ 知伊 ê 列祖 ê 上帝 ê 名。所以，當摩西去看伊 ê 兄弟 ê 擔，是埃及王子去巡視伊 ê 埃及子民身上 ê 擔，因為埃及人要擔起「建造比東、蘭塞二個城，做府庫」ê 責任（對照出埃及記2章11節 kap 1章11節。Chiah-ê 擔是埃及人 ê，不是以色列人 ê）。但是，當摩西目睭金金看著一名埃及人殘殺（2章11節 ê「phah」這字佇希伯來 文中是殘殺、鞭打，kap 2章12節「phah 死」仝字）一名希伯來人 ê 時，摩西就放下皇族 ê 出身，伊為著受害者出頭。就是佇這个此刻，摩西明明指出啥人才是伊「真正」ê 兄弟，摩西深深認定 hiah-ê 佇壓迫中受苦 ê 人才是伊 ê 兄弟。
「摩西看左右，看『無人佇遐』，就 phah 死 hit ê 埃及人，掩佇沙裡。」（12 節）「無人佇遐」m̄-sī 講現場無人，是親像以賽亞書59章16節：「伊看無人拯救，無人替求，不止卬愕（gông-ngia̍h）」，摩西 teh 問，為啥物無人出手阻擋？為怎樣人人恬恬允准這款代誌發生？摩西個人「以暴制暴」，採取 hit 个埃及人殘殺以色列人 ê 手段來對付轉去。總是，效果如何？
隔日，摩西 hō͘ 一名以色列人責罵：「是誰設立你做首領及審判官來管阮？你想欲 phah 死我，親像 phah 死彼個埃及人嗎？」這名以色列人並無感激摩西 ê 拯救，反轉是已經將埃及人 ê 統治步數內化。這時 ê 以色列人憑啥物信任一名埃及人？「你想欲為阮出頭？想欲做阮 ê 頭？憑你？Mài 惹麻煩！」摩西驚，講：「此个代誌真正露出。」法老知影這件事，就欲殺害摩西。身為王子 ê 摩西袂因為殺害一名埃及人致到 hō͘ 法老索命，是因為法老知摩西認同以色列人，日後摩西成做法老王朝 ê 麻煩。是佇發動憐憫 kap 正義 ê 時，摩西才開始成做「以色列」── hō͘ 上帝治理 ê 人民。
