◎潘玫足
逐个用本位主義的目睭看人，會發現每一个人攏是「番」。四、五百年前佇台灣島生湠的民族，竟然毋是台灣的主人，予人客歸類作生人、生番！《槍砲、病菌與鋼鐵》探討人類社會無平等的起因以及地理形成的原因，用達爾文的論述就是適者強，不適者弱，弱者就應該淘汰。這是殖民者的拗蠻角度，生做人，人人平等，但是人類的社會是族群互相歧視、排斥的。用暴力、利益唌人（飼狗）、歧視、侮辱的方式對待無仝的族群。若時空相替換，啥毋是弱者？啥毋是強者？
台灣選舉是民主的譴損，是台灣予國際看會起的社會運動，若講台灣1996年開始第一任民選總統算起，其實台灣的民主才24歲爾爾。2014年10月30，馬英九佇三峽溪洲的遷徙陳請會，無議誤紲喙講（我相信伊是表裡一致）：「我把你當人看！我教育你！你的基因沒問題！我給你機會！你要按照我的遊戲規則走！」這種我賜你食、賜你穿，你愛照我的意思行，我才是上位者的驕傲，敢講咱攏毋知？可惜，馬先生猶原當選兩任。原住民族濟濟人毋知家己是選舉時陣上好操弄的人票？
2020年第55屆金鐘獎報導「兒童少年節目主持人獎」著等的Pangoyod（鍾家駿）為著表示做Tao（達悟）的驕傲，佮對金鐘獎的尊重，身穿達悟族傳統慶典的服裝丁字褲上台領獎，紲予佮前總統馬英九仝款文化認捌悾闇的記者、媒體用粗淺的描述講「屁股蛋整顆露出」。記者的文化智識比國校的囝仔栽較不如。記者無了解Tao的文化就凊凊彩彩來形容Pangoyod的穿插，可見媒體佮馬總統無兩樣，攏是殖民者的頭殼。
蘭嶼國小校長Syamen Womzas（胡龍雄）佇面冊發表：「當我們的孩子知道入圍後，早早知會家人，準備嶄新的傳統禮服，要在頒獎典禮穿著，那是對典禮與承辦單位的尊重，更是為自己的努力感到驕傲……。」Pangoyod成作一个高貴的靈魂，光耀家己的族。若是台灣人，敢會看著豪氣的紅頭嶼？我非常感動伊愛民族的行動，予我看到伊專業佮拍拚，亦是我欲學習的精神。敬佩的心情， 到今猶袂退，我欲共伊拍噗仔足久足久。
各族群的文化智慧優秀的基因毋但愛靠家己拍拚、族群的團結意識來晟，若無會走去別國喝「我愛祖國」。
番身欲翻身，時也，運也，命也，非我所能也！
上貼近人民心內柔軟的上位者，請用國家、社會的力推捒弱勢文化翻身的機會，予「非我所能也！」成做非我所不能也！
（作者為退休教師）
